టాలీవుడ్‌లో విభిన్నమైన కథలను ఎంచుకుంటూ తనకంటూ ప్రత్యేక గుర్తింపు తెచ్చుకున్న యువ హీరో కిరణ్ అబ్బవరం (Kiran Abbavaram) ఇప్పుడు నిర్మాతగానూ (Producer) వరుస ప్రాజెక్టులతో ముందుకు సాగుతున్నారు. కొత్త ప్రతిభను ప్రోత్సహించాలనే ఉద్దేశంతో నిర్మాణ రంగంలోకి అడుగుపెట్టిన ఆయన ఇప్పటికే ‘తిమ్మరాజుపల్లి టీవీ’ చిత్రాన్ని నిర్మించారు. తాజాగా తన సొంత నిర్మాణ సంస్థలో(Production House) 2వ చిత్రంగా ‘హతః’ను (Hathah) రూపొందిస్తున్నారు.
అనుష్ గోరాక్ (Anush Gorak) దర్శకత్వంలో ‘హతః’ చిత్రం వినూత్న కథాంశంతో తెరకెక్కుతోంది. ఈ సినిమాకు సంబంధించిన టీజర్‌ను (Teaser) చిత్ర బృందం తాజాగా విడుదల చేసింది. దాదాపు చిత్రీకరణ పూర్తి చేసుకున్న ఈ సినిమా టీజర్‌తోనే ప్రేక్షకుల్లో ఆసక్తిని పెంచుతోంది. ఇందులోని మిస్టరీ, పాత్రల తీరు, కథనం సినిమాపై అంచనాలను పెంచేలా ఉన్నాయి.
‘హతః’ చిత్రంలో కుష్లు మద్దాల, రెహ్మాన్, నమ్రిత ఎంవీ, తనూజ పుట్టస్వామి ప్రధాన పాత్రల్లో నటిస్తున్నారు. కొత్త నటీనటులతో బలమైన కథను తెరకెక్కిస్తూ కిరణ్ అబ్బవరం ఈ సినిమాను నిర్మిస్తున్నారు. విభిన్నమైన కథలకు ప్రాధాన్యత ఇవ్వడంతో పాటు కొత్త ప్రతిభను ప్రోత్సహిస్తున్న ఆయన నిర్మాణ ప్రయాణంలో ‘హతః’ మరో కీలక చిత్రంగా నిలవనుంది.
కంటెంట్ ఆధారిత చిత్రాలకు పండగ సీజన్‌లో మంచి ఆదరణ లభిస్తుందనే ఉద్దేశంతో చిత్ర బృందం ‘హతః’ విడుదల తేదీని ఖరారు చేసింది. అన్ని కార్యక్రమాలను పూర్తి చేసి దీపావళి కానుకగా నవంబరు 6న ఈ సినిమాను ప్రపంచవ్యాప్తంగా థియేటర్లలో విడుదల చేయనున్నట్లు మేకర్స్ ప్రకటించారు.
హీరోగా వరుస సినిమాలు చేస్తూనే నిర్మాతగా కొత్త కథలు, దర్శకులు, నటీనటులను ప్రోత్సహిస్తున్న కిరణ్ అబ్బవరం.. ‘హతః’తో ప్రేక్షకులను ఎలా ఆకట్టుకుంటారో చూడాలి.
