ఆసియా క్రీడలు (Asian Games) 2026లో భారత మహిళల కబడ్డీ జట్టు (Indian Women’s Kabaddi Team) సత్తా చాటింది. ఉత్కంఠభరితంగా సాగిన ఫైనల్లో ఇరాన్‌ను(Iran) 37-34 తేడాతో ఓడించి స్వర్ణ పతకాన్ని(Gold Medal) సొంతం చేసుకుంది. చివరి వరకు హోరాహోరీగా సాగిన పోరులో కీలక సమయంలో భారత్(India) పైచేయి సాధించి విజయాన్ని అందుకుంది.
ఫైనల్లో ఉత్కంఠ.. చివర్లో భారత్‌దే పైచేయి
ఇరాన్‌తో జరిగిన ఫైనల్లో భారత్ ఆరంభం నుంచే ఆధిక్యంలో నిలిచింది. తొలి అర్ధభాగం ముగిసే సమయానికి 22-16తో ముందంజలో ఉంది. అయితే రెండో అర్ధభాగంలో ఇరాన్‌ దూకుడు పెంచింది. వరుస పాయింట్లతో భారత ఆధిక్యాన్ని తగ్గిస్తూ ఒక దశలో స్కోరును 26-27కు తీసుకొచ్చింది. దీంతో మ్యాచ్‌ చివరి నిమిషాల్లో తీవ్ర ఉత్కంఠ నెలకొంది.
ఈ సమయంలో భారత క్రీడాకారిణులు ఒత్తిడిని సమర్థంగా ఎదుర్కొన్నారు. కీలక పాయింట్లు సాధిస్తూ మళ్లీ ఆధిక్యంలోకి వచ్చిన భారత్.. చివరకు 37-34తో ఇరాన్‌పై విజయం సాధించింది.
మహిళల కబడ్డీలో నాలుగోసారి స్వర్ణం
ఈ విజయంతో ఆసియా క్రీడల మహిళల కబడ్డీలో భారత్‌కు నాలుగో స్వర్ణ పతకం (Fourth Gold Medal) లభించింది. 2010, 2014, 2022 ఆసియా క్రీడల్లోనూ భారత మహిళల జట్టు బంగారు పతకాలు సాధించింది. 2018లో రజతంతో సరిపెట్టుకున్న భారత్.. 2022లో చైనీస్‌ తైపీని 26-25తో ఓడించి టైటిల్‌ గెలిచింది. తాజాగా 2026లోనూ అదే జోరును కొనసాగించి మరో స్వర్ణాన్ని ఖాతాలో వేసుకుంది.
కబడ్డీలో కొనసాగుతున్న భారత ఆధిపత్యం
1990లో ఆసియా క్రీడల్లో కబడ్డీకి చోటు దక్కినప్పటి నుంచి ఈ క్రీడలో భారత్ కీలక శక్తిగా కొనసాగుతోంది. పురుషుల, మహిళల విభాగాల్లో పలు స్వర్ణ పతకాలు సాధించిన భారత జట్టు.. 2026 క్రీడల్లోనూ తన పతకాల ఖాతాలో మరో బంగారు పతకాన్ని చేర్చుకుంది.
ఆసియా క్రీడల్లో భారత్‌కు మూడో స్వర్ణం
మహిళల కబడ్డీ స్వర్ణంతో 2026 ఆసియా క్రీడల్లో భారత్ బంగారు పతకాల సంఖ్య మూడుకు చేరింది. అంతకుముందు మహిళల క్రికెట్‌లో భారత్ స్వర్ణం సాధించగా.. 10 మీటర్ల ఎయిర్‌ పిస్టల్‌ మిక్స్‌డ్‌ టీమ్‌ విభాగంలో షూటింగ్‌లోనూ బంగారు పతకం దక్కింది. తాజాగా మహిళల కబడ్డీ జట్టు విజయం భారత బృందానికి మరో స్వర్ణాన్ని అందించింది.
