ఎన్టీఆర్‌ జిల్లా మైలవరం మండలం కొత్తగూడెంలో ఓ వివాహితను జనసేన నేత (Jana Sena leader) ఎడ్ల సుధాకర్‌ (Edla Sudhakar) వేధిస్తూ, తనతో మాట్లాడాలని ఒత్తిడి చేసినట్లు బాధితురాలు ఆరోపించింది. తనపై అసభ్యంగా ప్రవర్తించడంతో పాటు దాడి చేసి, తనను, తన భర్తను (Husband) చంపేస్తానని బెదిరించాడని ఆమె పోలీసులకు ఫిర్యాదు చేసినట్లు సమాచారం. గతంలోనూ ఈ విషయంపై గ్రామ పెద్దల సమక్షంలో పంచాయితీ నిర్వహించి సుధాకర్‌ను మందలించినప్పటికీ, అతని ప్రవర్తనలో మార్పు రాలేదని బాధితురాలు తెలిపింది.
శుక్రవారం సుధాకర్‌ ఇద్దరు వ్యక్తులను తన వద్దకు పంపి మాట్లాడేందుకు ప్రయత్నించాడని, తాను నిరాకరించడంతో నేరుగా వచ్చి అసభ్యంగా ప్రవర్తించి దాడి చేశాడని ఆమె ఆరోపించింది. అనంతరం కుటుంబ సభ్యులతో కలిసి మైలవరం పోలీసులను (Mylavaram police) ఆశ్రయించగా, సుధాకర్‌తో పాటు మరో ఇద్దరిని స్టేషన్‌కు పిలిపించిన పోలీసులు కేసు నమోదు చేసిన అనంతరం విడుదల చేశారని బాధితురాలి వర్గాలు పేర్కొన్నాయి. ఈ ఘటనకు సంబంధించిన దృశ్యాలు సీసీ కెమెరాల్లో (CCTV cameras) నమోదయ్యాయని, ఆధారాలు ఉన్నప్పటికీ పోలీసులు కఠిన చర్యలు తీసుకోలేదని వారు ఆరోపిస్తున్నారు.
రాష్ట్రంలో మహిళలపై (Women) జనసేన నాయకులు, కార్యకర్తలకు సంబంధించిన పలు వివాదాస్పద ఘటనలు ఇప్పటికే చర్చకు వచ్చిన నేపథ్యంలో తాజాగా ఈ ఘటనపై కూడా మహిళా సంఘాలు ఆందోళన వ్యక్తం చేస్తున్నాయి. మహిళల భద్రత (Women’s Safety) విషయంలో పోలీసులు కఠినంగా వ్యవహరించాలని, రాజకీయ ప్రభావాలకు అతీతంగా ఫిర్యాదులపై చట్ట ప్రకారం చర్యలు తీసుకోవాలని డిమాండ్ చేస్తున్నాయి. ఈ ఘటనపై జనసేన నాయకత్వం, పోలీసుల తదుపరి చర్యలు ఎలా ఉంటాయన్నది ఇప్పుడు చర్చనీయాంశంగా మారింది.
