సినిమా ప్రపంచంలో కొన్ని చిత్రాలు విడుదలైన తర్వాత కూడా చాలా రోజుల పాటు ప్రేక్షకుల్లో అదే క్రేజ్ను కొనసాగిస్తుంటాయి. ఇప్పుడు అలాంటి సంచలన విజయగాథనే రాస్తోంది సూర్య నటించిన ‘కరుప్పు’. థియేటర్లలో భారీ విజయాన్ని అందుకున్న ఈ మాస్ యాక్షన్ ఎంటర్టైనర్ త్వరలోనే ఓటీటీ ప్రేక్షకుల ముందుకు రాబోతుందన్న వార్త సినీ అభిమానుల్లో కొత్త ఉత్సాహాన్ని నింపుతోంది.
దర్శకుడు ఆర్.జె. బాలాజీ తెరకెక్కించిన ఈ చిత్రానికి విడుదలైన తొలి రోజు నుంచే అద్భుత స్పందన లభించింది. డ్రీమ్ వారియర్ పిక్చర్స్ నిర్మించిన ఈ సినిమాలో సూర్య చాలా కాలం తర్వాత పూర్తి స్థాయి మాస్ పాత్రలో కనిపించడం అభిమానులకు ప్రత్యేక ఆకర్షణగా మారింది. పవర్ఫుల్ పాత్ర, ఉత్కంఠభరితమైన కథనం, భారీ యాక్షన్ సన్నివేశాలు కలిసి ఈ చిత్రాన్ని బాక్సాఫీస్ వద్ద బ్లాక్బస్టర్గా నిలబెట్టాయి. ముఖ్యంగా సూర్య నటనపై ప్రేక్షకులతో పాటు విమర్శకులు కూడా ప్రశంసలు కురిపిస్తున్నారు.
ఇప్పటికే ఈ చిత్రం థియేటర్లలో 25 రోజుల ప్రదర్శన పూర్తి చేసుకునే దశకు చేరుకుంది. అయినప్పటికీ వసూళ్ల పరంగా దూకుడు మాత్రం తగ్గలేదు. ప్రపంచవ్యాప్తంగా ఈ సినిమా రూ.300 కోట్లకు పైగా గ్రాస్ కలెక్షన్లు సాధించినట్లు సినీ వర్గాలు చెబుతున్నాయి. 2026లో తమిళ చిత్ర పరిశ్రమకు వచ్చిన అతిపెద్ద విజయాల్లో ‘కరుప్పు’ ఒకటిగా నిలిచింది. ఈ విజయంతో సూర్య కెరీర్లో మరో కీలక మైలురాయిగా ఈ చిత్రం నిలిచిపోయింది.
థియేటర్లలో విజయయాత్ర కొనసాగుతుండగానే ఇప్పుడు ఓటీటీ విడుదలపై కూడా ఆసక్తికరమైన అప్డేట్ బయటకు వచ్చింది. ఈ చిత్రానికి సంబంధించిన డిజిటల్ స్ట్రీమింగ్ హక్కులను అమెజాన్ ప్రైమ్ వీడియో సొంతం చేసుకున్నట్లు సమాచారం. ఇప్పటికే ఈ సినిమా త్వరలో స్ట్రీమింగ్కు రానుందని ప్లాట్ఫామ్ పరోక్షంగా సంకేతాలు ఇచ్చినట్లు తెలుస్తోంది. ప్రస్తుతం వినిపిస్తున్న సమాచారం ప్రకారం ‘కరుప్పు’ 2026 జూన్ 12 నుంచి ఓటీటీలో స్ట్రీమింగ్ అయ్యే అవకాశాలు ఎక్కువగా కనిపిస్తున్నాయి. తమిళంతో పాటు తెలుగు సహా పలు భాషల్లో ఈ చిత్రం అందుబాటులోకి రానుందని సమాచారం. దీనిపై అధికారిక ప్రకటన మరో 1 లేదా 2 రోజుల్లో వెలువడే అవకాశం ఉందని సినీ వర్గాలు చెబుతున్నాయి.
ఈ చిత్రంలో సూర్యతో పాటు త్రిష, ఇంద్రన్, స్వాసిక కీలక పాత్రల్లో నటించారు. వీరి నటనకు కూడా ప్రేక్షకుల నుంచి మంచి ప్రశంసలు లభించాయి. మరోవైపు సంగీత దర్శకుడు సాయి అభ్యంక్కర్ అందించిన నేపథ్య సంగీతం, పాటలు సినిమాకు మరింత హైలైట్గా నిలిచాయి. థియేటర్లలో సంచలన విజయాన్ని అందుకున్న ‘కరుప్పు’ ఇప్పుడు ఓటీటీ వేదికపై కూడా అదే స్థాయి ప్రభావం చూపుతుందా అన్న ఆసక్తి ప్రేక్షకుల్లో నెలకొంది. అధికారిక స్ట్రీమింగ్ ప్రకటన కోసం అభిమానులు ఆసక్తిగా ఎదురుచూస్తున్నారు.
