ప్రకాశం జిల్లా ఒంగోలులో (Ongole) పొగాకు రైతుల (Tobacco Farmers) ఆందోళనతో ఉద్రిక్త పరిస్థితులు నెలకొన్నాయి. గిట్టుబాటు ధర (Remunerative Price) కల్పించడంలో కేంద్ర, రాష్ట్ర ప్రభుత్వాలు పూర్తిగా విఫలమయ్యాయని ఆరోపిస్తూ వందలాది మంది రైతులు(Farmers) భారీ ఎత్తున రోడ్డెక్కారు. వందల ట్రాక్టర్లతో (Tractors) నిర్వహించిన ర్యాలీ ఒంగోలు నగరంలో ప్రధాన ఆకర్షణగా నిలిచింది. రైతుల నినాదాలతో నగరం మార్మోగిపోయింది.
ఒంగోలు మినీ స్టేడియం (Mini Stadium) నుంచి కలెక్టరేట్ (Collectorate) వరకు భారీ ర్యాలీ నిర్వహించిన రైతులు తమ సమస్యలను ప్రభుత్వం వెంటనే పరిష్కరించాలని డిమాండ్ చేశారు. రైతుల వద్ద మిగిలిపోయిన పొగాకు మొత్తాన్ని ప్రభుత్వమే కొనుగోలు చేయాలని కోరారు. ఇందుకోసం ప్రత్యేకంగా రూ.1000 కోట్లు కేటాయించి రైతులను ఆదుకోవాలని విజ్ఞప్తి చేశారు.
ఈ ఏడాది పంట దిగుబడి ఆశాజనకంగా వచ్చినప్పటికీ గిట్టుబాటు ధర లేక తీవ్రంగా నష్టపోతున్నామని రైతులు ఆవేదన వ్యక్తం చేశారు. ప్రైవేట్ కంపెనీలు చాలా తక్కువ ధరకు పొగాకును కొనుగోలు చేస్తున్నాయని ఆరోపించారు. ప్రస్తుతం వస్తున్న ధరతో కనీసం కూలీలకు చెల్లించే డబ్బులు, రవాణా ఖర్చులు కూడా రావడం లేదని తెలిపారు.
తమ సమస్యలను ఇప్పటికే స్థానిక ఎమ్మెల్యేలు(MLAs), సంబంధిత అధికారుల దృష్టికి తీసుకెళ్లినప్పటికీ ఇప్పటివరకు ఎలాంటి చర్యలు తీసుకోలేదని రైతులు అసంతృప్తి వ్యక్తం చేశారు. పలుమార్లు విజ్ఞప్తులు చేసినా స్పందన లేకపోవడంతో నిరసన బాట పట్టాల్సి వచ్చిందని పేర్కొన్నారు.
ఇప్పటికైనా ప్రభుత్వం (Government) అత్యవసరంగా స్పందించి గిట్టుబాటు ధర కల్పించడంతో పాటు రైతుల వద్ద ఉన్న పొగాకును కొనుగోలు చేసేలా చర్యలు తీసుకోవాలని రైతులు కోరుతున్నారు. తమకు న్యాయం జరిగే వరకు పోరాటం కొనసాగిస్తామని హెచ్చరించారు.
