రవితేజ ‘ఇరుముడి’ నుంచి తొలి పాట ‘ఇరుముడి కట్టు’ విడుదల..

మాస్ మహారాజా రవితేజ (Ravi Teja) నటిస్తున్న అత్యంత ప్రతిష్టాత్మక ఎమోషనల్ ఫ్యామిలీ డ్రామా ‘ఇరుముడి’పై (Irumudi) ప్రేక్షకుల్లో భారీ అంచనాలు నెలకొన్నాయి. దర్శకుడు శివ నిర్వాణ (Shiva Nirvana) రూపొందిస్తున్న ఈ చిత్రాన్ని ప్రముఖ నిర్మాణ సంస్థ మైత్రీ మూవీ మేకర్స్(Mythri Movie Makers) అత్యంత భారీ స్థాయిలో నిర్మిస్తోంది. ఇప్పటికే విడుదలైన ఫస్ట్ గ్లింప్స్(First Glimpse) ప్రేక్షకుల నుంచి అద్భుతమైన స్పందన అందుకోగా, తాజాగా చిత్ర బృందం తొలి పాట ‘ఇరుముడి కట్టు’ (Irumudi Kattu)ను విడుదల చేసి సంగీత ప్రచారానికి ఘనంగా శ్రీకారం చుట్టింది.

సంగీత దర్శకుడు జి.వి. ప్రకాశ్ కుమార్ (G. V. Prakash Kumar) స్వరపరిచిన ‘ఇరుముడి కట్టు’ పూర్తిస్థాయి ఆధ్యాత్మిక భావోద్వేగాలతో నిండిన భక్తి గీతంగా నిలిచింది. అయ్యప్ప స్వామిపై అచంచల భక్తి, మండల దీక్ష (Mandala Deeksha) పవిత్రత, నియమ నిష్ఠల గొప్పతనాన్ని ఈ పాట ఎంతో హృద్యంగా ఆవిష్కరించింది. ప్రారంభం నుంచి ముగింపు వరకు ప్రతి స్వరం భక్తి పారవశ్యాన్ని కలిగించేలా స్వరకల్పన ఉండటం ప్రత్యేక ఆకర్షణగా మారింది.

ఈ పాటకు దర్శకుడు శివ నిర్వాణతో పాటు కళ్యాణ్ చక్రవర్తి (Kalyan Chakravarthy) సాహిత్యం అందించారు. అయ్యప్ప మాల ధరించి మండల దీక్షలో ఉన్న భక్తుడు ఇరుముడి కట్టుకుని శబరిమల యాత్రకు బయలుదేరే పవిత్ర ప్రయాణాన్ని సాహిత్యం ఎంతో భావోద్వేగంగా ప్రతిబింబించింది. అయ్యప్ప దీక్ష(Ayyappa Deeksha) వెనుక ఉన్న ఆధ్యాత్మికత, క్రమశిక్షణ, జీవన తత్వాన్ని కథానాయకుడి పాత్రతో అనుసంధానిస్తూ అర్థవంతంగా చూపించారు.

గాయకుడు అనంతు తన శక్తివంతమైన గాత్రంతో ప్రతి పదంలోనూ భక్తి భావాన్ని నింపి పాటను మరో స్థాయికి తీసుకెళ్లారు. జి.వి. ప్రకాశ్ కుమార్ అందించిన సంగీతం, అనంతు గాత్రం, సాహిత్యం కలయిక ఈ పాటను ఆధ్యాత్మిక సంగీత ప్రియులకు ప్రత్యేక అనుభూతిగా మార్చింది.

ఈ పాటలో రవితేజ అయ్యప్ప స్వామి భక్తుడి పాత్రలో పూర్తిగా ఒదిగిపోయారు. ఆయన లుక్, హావభావాలు, భక్తి భావం, స్క్రీన్ ప్రెజెన్స్ ప్రేక్షకులను ఆకట్టుకునేలా ఉన్నాయి. బాబా భాస్కర్ రూపొందించిన కొరియోగ్రఫీ పాటలోని ఆధ్యాత్మికతను మరింత గొప్పగా ఆవిష్కరించింది.

ప్రియా భవానీ శంకర్, బేబీ నక్షత్ర కనిపించే భావోద్వేగ సన్నివేశాలు కథలోని కుటుంబ అనుబంధాలను, భావోద్వేగాలను మరింత బలంగా చూపించాయి. దీంతో ‘ఇరుముడి కట్టు’ కేవలం ఒక పాటగానే కాకుండా సినిమా కథలోని భావోద్వేగ ప్రయాణానికి బలమైన పునాది వేసినట్లు అనిపిస్తోంది.

మొత్తంగా తొలి పాటతోనే ‘ఇరుముడి’ చిత్రంపై అంచనాలు మరింత పెరిగాయి. భక్తి, భావోద్వేగాలు, కుటుంబ అనుబంధాల సమ్మేళనంగా రూపొందుతున్న ఈ చిత్రం 21 ఆగస్టు రోజున ప్రపంచవ్యాప్తంగా గ్రాండ్‌గా థియేటర్లలో విడుదల కానుంది.