టీమిండియా క్రికెటర్ రింకు సింగ్(Rinku Singh), సమాజ్‌వాదీ పార్టీ ఎంపీ (Samajwadi Party MP) ప్రియా సరోజ్‌ల (Priya Saroj) వివాహానికి ముహూర్తం (Wedding Date) ఖరారైనట్లు సమాచారం. ఇరు కుటుంబాల అంగీకారంతో 2026 డిసెంబర్ 4న లక్నోలోని రమాడా హోటల్‌లో(Ramada Hotel) వీరి వివాహం జరగనున్నట్లు తెలుస్తోంది. తేదీ, వేదిక ఖరారు కావడంతో కుటుంబ సభ్యులు పెళ్లి ఏర్పాట్లను ప్రారంభించినట్లు సమాచారం.
రింకు సింగ్, ప్రియా సరోజ్‌ల నిశ్చితార్థం 2025 జూన్ 8న లక్నోలోని (Lucknow) ది సెంట్రమ్ హోటల్‌లో కుటుంబ సభ్యులు, సన్నిహితుల సమక్షంలో జరిగింది. అప్పటి నుంచి వీరి వివాహం ఎప్పుడు జరుగుతుందనే విషయంపై అభిమానుల్లో ఆసక్తి నెలకొంది.
తాజా సమాచారం ప్రకారం డిసెంబర్ 4న లక్నోలో వివాహ వేడుక నిర్వహించాలని ఇరు కుటుంబాలు నిర్ణయించినట్లు తెలుస్తోంది. ఈ వేడుకకు కుటుంబ సభ్యులు, బంధువులతో పాటు క్రికెట్, రాజకీయ రంగాలకు చెందిన పలువురు ప్రముఖులు హాజరయ్యే అవకాశం ఉన్నట్లు నివేదికలు పేర్కొంటున్నాయి.
ప్రియా సరోజ్ ఉత్తరప్రదేశ్‌లోని(Uttar Pradesh) మచ్లిషహర్ లోక్‌సభ నియోజకవర్గం నుంచి సమాజ్‌వాదీ పార్టీ తరఫున ఎంపీగా ఉన్నారు. 2024 లోక్‌సభ ఎన్నికల్లో విజయం సాధించి పార్లమెంట్‌లో అడుగుపెట్టారు. ఆమె తండ్రి తూఫానీ సరోజ్ ప్రస్తుతం కేరాకత్ నియోజకవర్గానికి ఎమ్మెల్యేగా ఉన్నారు.
మరోవైపు రింకు సింగ్ టీ20 క్రికెట్‌లో దూకుడైన బ్యాటింగ్‌తో గుర్తింపు పొందారు. ఒకే ఓవర్‌లో వరుసగా 5 సిక్సర్లు బాదిన ఇన్నింగ్స్‌తో ఆయన ప్రత్యేక గుర్తింపు సంపాదించారు. తాజాగా వివాహ తేదీ, వేదిక ఖరారైనట్లు సమాచారం రావడంతో ఇరు కుటుంబాలు పెళ్లి ఏర్పాట్లలో నిమగ్నమయ్యాయి.
