సినీ పరిశ్రమలో తనకంటూ ప్రత్యేకమైన గుర్తింపు తెచ్చుకున్న కథానాయిక శ్రుతి హాసన్(Shruti Haasan).. వ్యక్తిగత విషయాలపై ముక్కుసూటిగా మాట్లాడే ఆమె తాజాగా ఓ పాడ్‌కాస్ట్‌లో తన పెళ్లి(Marriage), వ్యక్తిగత స్వేచ్ఛ(Personal Freedom), మాతృత్వం (Motherhood) గురించి ఆసక్తికరమైన విషయాలను పంచుకున్నారు. ఆమె వ్యాఖ్యలు ప్రస్తుతం సామాజిక మాధ్యమాల్లో వైరల్‌గా మారాయి.
తాను వివాహానికి పూర్తిగా వ్యతిరేకం కాదని శ్రుతి హాసన్ స్పష్టం చేశారు. అయితే గతంలో ఒకసారి పెళ్లి చేసుకునే ఆలోచన వరకు వెళ్లి, చివరి నిమిషంలో ఆ నిర్ణయం నుంచి వెనక్కి వచ్చినట్లు తెలిపారు. వివాహ బంధం ఒకరి స్వేచ్ఛను మరొకరు హరించేలా ఉండకూడదని, పెళ్లి పేరుతో తన వ్యక్తిత్వాన్ని కోల్పోయి బందీగా ఉండటం తనకు ఇష్టం లేదని పేర్కొన్నారు.
పెళ్లిళ్ల పేరుతో జరుగుతున్న భారీ ఖర్చులపైనా(Huge Expenses) ఆమె స్పందించారు. వివాహాన్ని ఘనంగా నిర్వహించుకోవడంలో తప్పేమీ లేదని, కానీ ఒక్కరోజు వేడుక కోసం కోట్లాది రూపాయలు ఖర్చు చేయడం అవసరం లేదని అభిప్రాయపడ్డారు. ఆ మొత్తాన్ని ఆర్థిక ఇబ్బందుల్లో(Financial Difficulties) ఉన్నవారికి అందిస్తే ఎంతో ప్రయోజనం ఉంటుందని అన్నారు.
ఇక మాతృత్వం గురించి మాట్లాడుతూ.. తాను తల్లిగా మారాలని, ఆ అనుభూతిని పొందాలని కోరుకుంటున్నట్లు శ్రుతి హాసన్ తెలిపారు. అయితే ఇందుకోసం తప్పనిసరిగా పెళ్లి చేసుకోవాల్సిన అవసరం లేదని చెప్పారు. భవిష్యత్తులో ఓ బిడ్డను దత్తత (Child Adoption) తీసుకుని పెంచుకోవాలనే ఆలోచన తనకు ఉందని వెల్లడించారు.
తన స్వతంత్ర భావాల గురించి శ్రుతి హాసన్ గతంలోనూ పలు సందర్భాల్లో మాట్లాడారు. సమాజంలో తనకంటూ ప్రత్యేకమైన గుర్తింపు తెచ్చుకోవడానికి ఎంతో కష్టపడ్డానని, ఆ గుర్తింపును కేవలం పెళ్లి అనే బంధంతో పరిమితం చేసుకోవాలనే ఆలోచన తనకు అసౌకర్యంగా ఉంటుందని ఆమె పేర్కొన్నారు.
ప్రస్తుతం శ్రుతి హాసన్ వ్యాఖ్యలు సామాజిక మాధ్యమాల్లో విస్తృతంగా చర్చకు దారితీశాయి. పెళ్లి, వ్యక్తిగత స్వేచ్ఛ, మాతృత్వంపై ఆమె వెల్లడించిన అభిప్రాయాలపై అభిమానులు, నెటిజన్లు స్పందిస్తున్నారు.
