తెనాలి థర్డ్ డిగ్రీ కేసులో బిగ్ ట్విస్ట్.. యువకులపై హత్యాయత్నం కేసు కొట్టివేత!

తెనాలిలో గతేడాది దుమారం రేపిన పోలీసుల థర్డ్ డిగ్రీ (Third Degree) వ్యవహారం మరోసారి చర్చనీయాంశంగా మారింది. కానిస్టేబుల్ (Constable) కన్నా చిరంజీవిపై (Kanna Chiranjeevi) దాడి చేశారనే ఆరోపణలతో యువకులపై నమోదు చేసిన హత్యాయత్నం కేసును తాజాగా కోర్టు కొట్టివేయడం ఈ వ్యవహారంలో కీలక పరిణామంగా మారింది. పోలీసులు సమర్పించిన సాక్ష్యాధారాలను పరిశీలించిన న్యాయస్థానం, కానిస్టేబుల్‌పై హత్యాయత్నం జరిగినట్లు నిర్ధారించేందుకు బలమైన ఆధారాలు లేవని పేర్కొంటూ కేసును కొట్టివేసింది. దీంతో ఏడాదిన్నర క్రితం తెనాలిలో జరిగిన ఘటనపై అప్పట్లో చేసిన ఆరోపణలు, పోలీసుల చర్యలు, బాధితులపై సాగిన ప్రచారం మరోసారి చర్చకు వస్తున్నాయి.

ఏప్రిల్ 2025లో గుంటూరు జిల్లా (Guntur District) తెనాలిలోని ఐతనగర్/లింగరాజు సెంటర్‌లో చేబ్రోలు జాన్ విక్టర్(Chebrolu John Victor), షేక్ బాబూలాల్ అలియాస్ కరీముల్లా(Shaik Baboolal alias Karimulla), దోమా రాకేష్‌లను (Doma Rakesh) పోలీసులు అదుపులోకి తీసుకున్న ఘటన అప్పట్లో తీవ్ర సంచలనం సృష్టించింది. యువకులను నడిరోడ్డుపై కూర్చోబెట్టి, అందరూ చూస్తుండగానే వారి అరికాళ్లపై లాఠీలతో కొట్టిన దృశ్యాలకు సంబంధించిన వీడియోలు మే 2025లో సోషల్ మీడియాలో వైరల్ అయ్యాయి. ఈ ఘటనపై రాష్ట్రవ్యాప్తంగా పౌర సమాజం నుంచి తీవ్ర నిరసనలు వ్యక్తమయ్యాయి. పోలీసుల కస్టడీలో ఉన్న వ్యక్తులపై ఇలాంటి చర్యలకు పాల్పడటం చట్టబద్ధమేనా? బాధ్యులైన పోలీసు అధికారులపై చర్యలు ఎందుకు తీసుకోకూడదనే ప్రశ్నలు అప్పట్లో తీవ్రంగా వినిపించాయి.

రాజ్యాంగబద్ధమైన ప్రాథమిక హక్కులను ఉల్లంఘించి యువకులపై బహిరంగంగా దాడి చేశారని ఆరోపిస్తూ హ్యూమన్ రైట్స్ ఫోరం (Human Rights Forum) స్పందించింది. బాధ్యులైన పోలీసు అధికారులపై చర్యలు తీసుకోవాలని, సంబంధిత చట్టాల కింద కేసులు నమోదు చేయాలని డిమాండ్ చేసింది. ఒక వ్యక్తిపై కేసు నమోదైనంత మాత్రాన అతడు నేరస్థుడు కాడని, నేరం నిరూపించే అధికారం న్యాయస్థానానిదేనని, పోలీసు కస్టడీలో ఉన్న వ్యక్తుల హక్కులను కూడా రక్షించాల్సిన బాధ్యత ప్రభుత్వానిదేనని మానవ హక్కుల సంఘాలు (Human Rights Organizations) ప్రశ్నించాయి.

అయితే, ఇదే సమయంలో సదరు యువకులు కానిస్టేబుల్ చిరంజీవిపై హత్యాయత్నానికి పాల్పడ్డారని పోలీసులు ఆరోపించారు. ఆ ఆరోపణ ఆధారంగా వారిపై తీవ్ర నేరారోపణలు నమోదయ్యాయి. ప్రభుత్వం, ప్రభుత్వ అనుకూల మీడియా వర్గాల నుంచి యువకులను ‘గంజాయి బ్యాచ్’(Ganja Batch), ‘రౌడీ షీటర్లు’(Rowdy-Sheeters), ‘సంఘవిద్రోహ శక్తులు’గా(Anti-Social Elements) చిత్రీకరిస్తూ కథనాలు, ప్రచారం సాగిందని బాధితుల తరఫు వర్గాలు ఆరోపించాయి. న్యాయస్థానంలో వాదనలు పూర్తికాకముందే తమను రౌడీలుగా చిత్రీకరిస్తూ మీడియా ట్రయల్స్ నిర్వహించడం సమంజసమేనా? అని వారు ప్రశ్నించారు.

హోం మంత్రి వంగలపూడి అనిత (Vangalapudi Anitha) కూడా అప్పట్లో పోలీసుల చర్యలను సమర్థిస్తూ, పోలీసులు రౌడీ షీటర్లు, గంజాయి బ్యాచ్‌పై చర్యలు తీసుకున్నారని, ఈ వ్యవహారానికి కులం, మతం ఆపాదించడం సరికాదని వ్యాఖ్యానించారు. అయితే, పోలీసుల థర్డ్ డిగ్రీ చర్యలను ఒక రాజ్యాంగ పదవిలో ఉన్న మంత్రి సమర్థించడం సరికాదని హ్యూమన్ రైట్స్ ఫోరం తీవ్రంగా అభ్యంతరం వ్యక్తం చేసింది. పోలీసుల చర్యలపై సమగ్ర విచారణ జరపాలని, బాధితుల హక్కులను పరిరక్షించాలని డిమాండ్ చేసింది.

ఈ ఘటనపై వైఎస్సార్‌సీపీ(YSRCP) అధినేత, మాజీ ముఖ్యమంత్రి వైఎస్ జగన్‌మోహన్ రెడ్డి (YS Jagan Mohan Reddy) కూడా అప్పట్లో స్పందించారు. బాధిత యువకులు దళిత, మైనార్టీ వర్గాలకు చెందినవారని పేర్కొంటూ, రాష్ట్రంలో చట్టబద్ధ పాలనకు బదులుగా ‘రెడ్ బుక్ రాజ్యాంగం’(Red Book Constitution) అమలవుతోందని విమర్శించారు. బాధిత కుటుంబాలకు అండగా నిలిచేందుకు 2025 జూన్ 3న తెనాలిలో వారి కుటుంబాలను జగన్ పరామర్శించారు. అయితే, జగన్ బాధితులను పరామర్శించడాన్ని కూడా రాజకీయంగా విమర్శిస్తూ, ఆయన సంఘవిద్రోహ శక్తులకు మద్దతు ఇస్తున్నారనే ప్రచారాన్ని అప్పట్లో అధికార పార్టీ వర్గాలు చేశాయి.

పోలీసులు చేసిన చర్యలపై పౌర సమాజం నుంచి తీవ్ర నిరసనలు వ్యక్తం కావడంతో, కానిస్టేబుల్ చిరంజీవి భార్య కళ్యాణి (Kalyani) కూడా మీడియా ముందుకు వచ్చి తన భర్తపై హత్యాయత్నం జరిగిందని ఆరోపించారు. ఆమెను ప్రభుత్వ అనుకూల మీడియా డిబేట్లకు ఆహ్వానించి, ఆమె వాదనలను ప్రసారం చేయడంతో ఈ వ్యవహారం మరింత రాజకీయ రంగు పులుముకుంది. బాధిత యువకుల వాదన పూర్తిగా విచారణలో తేలకముందే వారిని నేరస్థులుగా చిత్రీకరించేలా మీడియా ట్రయల్ జరిగిందని వారి తరఫు వర్గాలు ఆరోపించాయి. ఆ తర్వాత ఏపీ మహిళా కమిషన్ చైర్‌పర్సన్ రాయపాటి శైలజ (Rayapati Shailaja) కూడా కానిస్టేబుల్ చిరంజీవి నివాసానికి వెళ్లి వారి కుటుంబాన్ని పరామర్శించి, కమిషన్ తరఫున రక్షణ కల్పిస్తామని హామీ ఇచ్చారు. అలాగే, డిప్యూటీ స్పీకర్ రఘురామ రాజు (Raghu Rama Krishna Raju) కూడా జగన్ పర్యటనను తప్పుపట్టారు.

నిజానికి, తెనాలికి చెందిన జాన్ విక్టర్ ఎంతో కష్టపడి చదివి జూనియర్ న్యాయవాదిగా మారిన యువకుడని, అతనితో పాటు ఇతరులను సంఘవిద్రోహ శక్తులుగా ముద్ర వేసేందుకు ప్రయత్నించారని దళిత, ప్రజా సంఘాలు ఆరోపించాయి. సివిల్ డ్రెస్‌లో ఉన్న వ్యక్తి గొడవపడుతుండగా, అతను కానిస్టేబుల్ అని తెలియక ప్రశ్నించినందుకే పగబట్టి, మంగళగిరి నుంచి కొట్టుకుంటూ తీసుకొచ్చి ఐతనగర్‌లో చితకబాదారని, ఆ తర్వాత హత్యాయత్నం కేసు నమోదు చేశారని వారు ఆరోపించారు. ఈ ఆరోపణలకు సంబంధించిన వాస్తవాలు, పోలీసుల వాదన, బాధితుల వాదన అన్నీ న్యాయపరమైన విచారణలోనే తేలాల్సిన అంశాలుగా అప్పట్లో నిలిచాయి.

ఇప్పుడు అదే వ్యవహారంలో కోర్టు కీలకమైన నిర్ణయం తీసుకుని కానిస్టేబుల్‌పై హత్యాయత్నం జరిగినట్లు నిర్ధారించేందుకు తగిన బలమైన ఆధారాలు లేవని పేర్కొంటూ కేసును కొట్టివేయడం ద్వారా, యువకులపై నమోదైన ప్రధాన ఆరోపణకు న్యాయపరమైన ఆధారం ఎంతవరకు ఉందనే ప్రశ్నకు కోర్టు తీర్పు ఒక స్పష్టమైన దిశను చూపించిందని పలువురు వ్యాఖ్యానిస్తున్నారు.

ఈ తీర్పు నేపథ్యంలో అప్పట్లో ప్రభుత్వ అనుకూల మీడియా, అధికార పార్టీ వర్గాల సోషల్ మీడియాలో జరిగిన ప్రచారంపై కూడా ప్రశ్నలు తలెత్తుతున్నాయి. పోలీసులు ఒక వ్యక్తిపై నేరారోపణలు చేసిన వెంటనే, కోర్టు తీర్పు వెలువడకముందే అతడిని నేరస్థుడిగా ప్రజల ముందు నిలబెట్టడం, ఆ విధంగానే సోషల్ మీడియాలో ప్రచారం చేయడం సమంజసం కాదని విమర్శలు వ్యక్తమవుతున్నాయి. న్యాయస్థానం తుది తీర్పు ఇవ్వకముందే ఒక వ్యక్తిపై ముద్ర వేయడం ద్వారా మీడియా ట్రయల్‌కు పాల్పడటం ఎంతవరకు సమర్థనీయం అనే ప్రశ్న ఇప్పుడు మరోసారి ముందుకు వస్తోంది.

అదే సమయంలో, నాడు ఈ ఘటనపై ఎన్ని ఆరోపణలు, విమర్శలు వచ్చినా వైఎస్ జగన్ బాధిత కుటుంబాల పక్షాన నిలబడి వారి వాదనను వినడం, వారికి అండగా ఉండటం ఇప్పుడు మరోసారి గుర్తుచేసుకుంటున్నారు. అప్పట్లో జగన్‌పై విమర్శలు చేసినవారు, యువకులపై తీవ్ర ఆరోపణలు చేస్తూ ప్రచారం చేసినవారు, తాజా కోర్టు తీర్పు నేపథ్యంలో తమ అప్పటి వైఖరిపై పునరాలోచించాల్సిన అవసరం ఉందని బాధితుల తరఫు వర్గాలు పేర్కొంటున్నాయి.