శ్రీవారి లడ్డూ వివాదంలో కీలక మలుపు.. జంతువుల కొవ్వు లేదని తేల్చిన ఈడీ!

తిరుమల తిరుపతి దేవస్థానం (టీటీడీ) (TTD) శ్రీవారి లడ్డూ ప్రసాదం తయారీలో(Srivari Laddu Prasadam) ఉపయోగించిన నెయ్యిలో(Ghee) జంతువుల కొవ్వు(Animal Fat) కలిసిందనే ఆరోపణలపై దర్యాప్తు కొనసాగుతున్న వేళ కీలక పరిణామం చోటుచేసుకుంది. తిరుపతి ఈస్ట్‌ పోలీస్‌ స్టేషన్‌లో(Tirupati East Police Station) నమోదైన ఎఫ్‌ఐఆర్‌ ఆధారంగా దర్యాప్తు చేపట్టిన ఎన్‌ఫోర్స్‌మెంట్‌ డైరెక్టరేట్‌ (ఈడీ)(ED).. 2019–2024 మధ్య టీటీడీకి సరఫరా అయిన నెయ్యికి సంబంధించిన అంశాలను పరిశీలించినట్లు పేర్కొంది. ఈ వ్యవహారంలో జంతువుల కొవ్వు కలిసినట్లు నిర్ధారించే ఆధారాలు లభించలేదని ఈడీ తన ప్రకటనలో పేర్కొంది.

ఇదే అంశంపై గతంలో సీబీఐ(CBI) కూడా దర్యాప్తు చేసి, జంతువుల కొవ్వు కలిసినట్లు నిర్ధారించే ఆధారాలు (Evidence) లేవని ప్రకటించింది. మరోవైపు, నెయ్యి సరఫరా, నాణ్యత పరీక్షలు, ట్యాంకర్ల తిరస్కరణ వంటి అంశాలు రాజకీయంగా తీవ్ర చర్చకు దారితీశాయి. జంతువుల కొవ్వు కలిసిందనే ఆరోపణలను ముఖ్యమంత్రి చంద్రబాబు నాయుడు(Chandrababu Naidu), ఉప ముఖ్యమంత్రి పవన్‌ కళ్యాణ్‌ (Pawan Kalyan) సహా కూటమి నేతలు ప్రస్తావించారు. అయితే తాజాగా ఈడీ దర్యాప్తులో అలాంటి కల్తీకి ఆధారాలు లేవని తేలిందన్న అంశం ఈ వివాదంపై మరోసారి చర్చకు దారితీసింది.

అదే సమయంలో, ఈడీ దర్యాప్తులో రిఫైన్డ్‌ పామ్‌ ఆయిల్‌, పామ్‌ కెర్నల్‌ ఆయిల్‌, పాల్మోలిన్‌, ఎం.జి.-90, మోనోగ్లిజరైడ్స్‌, మైవాసెట్‌ సాఫ్ట్‌ 400, ఎసిటిక్‌ యాసిడ్‌ ఎస్టర్‌ వంటి పదార్థాల ప్రస్తావన రావడం మరో అంశంగా మారింది. ఈ పదార్థాలు ఎప్పుడు, ఏ విధంగా నెయ్యి సరఫరా ప్రక్రియలోకి వచ్చాయి? వాటి వినియోగం ఏ కాలానికి సంబంధించినది? అన్నది దర్యాప్తు సంస్థల నివేదికలు, కోర్టు పరిధిలో తేలాల్సిన అంశంగా ఉంది.

ముఖ్యంగా 2019 ఫిబ్రవరి నాటి (చంద్రబాబు పరిపాలనా హయాం) సరఫరాలకు సంబంధించిన అంశాలు కూడా ప్రస్తావనకు రావడంతో.. లడ్డూ తయారీలో నాణ్యతా ప్రమాణాల ఉల్లంఘన అప్పుడే ప్రారంభమైందన్న ప్రశ్నలు ముందుకు వస్తున్నాయి. అయితే, జంతువుల కొవ్వు కలిసిందనే ఆరోపణకు ఆధారాలు ఎక్కడా లేని నేపథ్యంలో, ఇతర నాణ్యతా లోపాల అంశాన్ని వేరుగా చూడాల్సిన అవసరం ఉంది.

ఈ నేపథ్యంలో, జంతువుల కొవ్వు కలిసిందంటూ చేసిన ఆరోపణలకు ఇప్పుడు దర్యాప్తు సంస్థలు ఆధారాలు లేవని తేల్చడం ప్రధాన చర్చగా మారింది. పవిత్రమైన శ్రీవారి లడ్డూ ప్రసాదంపై ఆధారాలు లేకుండా తీవ్రమైన ఆరోపణలు ఎందుకు చేశారనే ప్రశ్నలు కూడా రాజకీయంగా వినిపిస్తున్నాయి.

ఈ పరిణామాల నేపథ్యంలో భక్తుల మనోభావాలు గాయపడేలా గతంలో చేసిన ఆరోపణలపై చంద్రబాబు(Chandrababu), పవన్‌ కళ్యాణ్‌(Pawan Kalyan), నారా లోకేష్‌(Nara Lokesh) ఎలాంటి వివరణ ఇస్తారన్నది ఆసక్తికరంగా మారింది.