అమెరికా జాతీయ ఇంటెలిజెన్స్ డైరెక్టర్గా (America National Intelligence Director) కొనసాగుతున్న తులసి గబ్బార్డ్ (Tulsi Gabbard) తన పదవికి రాజీనామా (Resignation) చేస్తున్నట్లు ప్రకటించడం అమెరికా రాజకీయాల్లో సంచలనంగా మారింది. ఆమె తన రాజీనామా లేఖను ఎక్స్ వేదికగా పంచుకుంటూ, భర్త అబ్రహామ్ విలియమ్స్కు (Abraham Williams) అత్యంత అరుదైన ఎముక క్యాన్సర్ నిర్ధారణ కావడంతో కుటుంబానికి సమయం కేటాయించాల్సిన అవసరం ఏర్పడిందని వెల్లడించారు. ఈ ప్రకటనతో అమెరికా రాజకీయ వర్గాలు ఒక్కసారిగా ఉలిక్కిపడ్డాయి.
తన జీవితంలో అత్యంత క్లిష్టమైన దశను ఎదుర్కొంటున్నానని తులసి పేర్కొన్నారు. 11 ఏళ్ల వివాహ బంధంలో తన భర్త ఎప్పుడూ అండగా నిలిచారని, ఇప్పుడు ఆయనకు తాను తోడుగా ఉండటం తన బాధ్యత అని ఆమె భావోద్వేగంగా వెల్లడించినట్లు అమెరికా మీడియా కథనాలు పేర్కొన్నాయి. కుటుంబ పరిస్థితుల కారణంగానే ఈ నిర్ణయం తీసుకున్నానని ఆమె స్పష్టం చేసినప్పటికీ, రాజకీయ వర్గాల్లో మాత్రం భిన్నమైన చర్చలు జరుగుతున్నాయి.
ప్రత్యేకంగా అమెరికా-ఇరాన్(America-Iran) ఉద్రిక్తతల విషయంలో తులసి గబ్బార్డ్ అభిప్రాయాలు అధ్యక్షుడు డోనాల్డ్ ట్రంప్ (Donald Trump) వైఖరికి భిన్నంగా ఉన్నాయని ఇప్పటికే వార్తలు వచ్చాయి. ఇరాన్పై అమెరికా దాడుల విషయంలో ఆమె మితవాద ధోరణి ప్రదర్శించడం వైట్ హౌస్కు (White House) అసంతృప్తిని కలిగించిందని కొన్ని నివేదికలు సూచిస్తున్నాయి. దీంతో ఆమె రాజీనామా వెనుక కేవలం వ్యక్తిగత కారణాలే కాకుండా రాజకీయ కారణాలు కూడా ఉన్నాయా అన్న అనుమానాలు వ్యక్తమవుతున్నాయి.
2025 ఫిబ్రవరిలో అమెరికా డైరెక్టర్ ఆఫ్ నేషనల్ ఇంటెలిజెన్స్ బాధ్యతలు చేపట్టిన తులసి గబ్బార్డ్, అమెరికా రాజకీయాల్లో ప్రత్యేక గుర్తింపు సంపాదించారు. మాజీ సైనికురాలిగా సేవలందించిన ఆమె, హవాయి నుంచి కాంగ్రెస్ సభ్యురాలిగా (Congresswoman) కూడా పనిచేశారు. ఒకప్పుడు డెమోక్రటిక్ పార్టీలో (Democratic Party) కీలక నేతగా ఉన్న ఆమె, తరువాత స్వతంత్ర రాజకీయ వైఖరితో వార్తల్లో నిలిచారు.
తులసి గబ్బార్డ్ రాజీనామా 2026 జూన్ 30 నుంచి అమల్లోకి రానుంది. అప్పటివరకు ఆమె విధుల్లో కొనసాగనున్నారు. ఆమె స్థానంలో ప్రస్తుతం డిప్యూటీ డైరెక్టర్గా ఉన్న ఆరోన్ లూకాస్ తాత్కాలిక బాధ్యతలు చేపట్టనున్నట్లు సమాచారం. తులసి గబ్బార్డ్ సేవలను కొనియాడిన డోనాల్డ్ ట్రంప్, డీఎన్ఐగా ఆమె గొప్ప పని చేశారని ప్రశంసించారు.
1981లో అమెరికన్ సమోవాలో మైక్ గబ్బార్డ్, కరోల్ గబ్బార్డ్ దంపతులకు తులసి జన్మించారు. గబ్బార్డ్ కుటుంబంలో ఆమె ఐదుగురు సంతానంలో ఒకరు. 1983లో ఆమె కుటుంబం హవాయికి వలస వెళ్లింది. అక్కడ ఆమె తల్లి హిందూ మతాన్ని స్వీకరించగా, తండ్రి రోమన్ కాథలిక్ మతంలో కొనసాగారు. హిందూ సంప్రదాయాల ప్రభావంతో పిల్లలకు హిందూ పేర్లు పెట్టారు. తులసి తనను హిందువుగా గుర్తించుకున్నప్పటికీ, ఆమె భారతీయ సంతతికి చెందినది కాదు.
I am deeply grateful for the trust President Trump placed in me and for the opportunity to lead @ODNIgov for the last year and a half.
— Tulsi Gabbard 🌺 (@TulsiGabbard) May 22, 2026
Unfortunately, I must submit my resignation, effective June 30, 2026. My husband, Abraham, has recently been diagnosed with an extremely rare… pic.twitter.com/PS0Dxp5zpd
తులసి తండ్రి 2004 నుంచి 2007 వరకు రిపబ్లికన్ పార్టీలో పనిచేసి, తరువాత డెమోక్రటిక్ పార్టీలో చేరారు. 2013లో తులసి హవాయి నుంచి మొదటిసారి ప్రతినిధుల సభకు ఎన్నికై, 2021 వరకు ఆ పదవిలో కొనసాగారు. రాజకీయాలతో పాటు ఆమె 20 ఏళ్లకు పైగా ఆర్మీ నేషనల్ గార్డ్లో ఇరాక్, కువైట్ ప్రాంతాల్లో సేవలందించారు.
2016 ఎన్నికల సమయంలో బెర్నీ శాండర్స్కు(Bernie Sanders) మద్దతుగా ప్రచారం చేసిన తులసి, 2020లో డెమోక్రటిక్ అధ్యక్ష అభ్యర్థిత్వ రేసులో కూడా కొంతకాలం కొనసాగారు. తరువాత జో బైడెన్కు (Joe Biden) మద్దతు ప్రకటించారు. అమెరికా కాంగ్రెస్లో తొలి హిందూ సభ్యురాలిగా చరిత్ర సృష్టించిన ఆమె, ప్రభుత్వ ఆధ్వర్యంలోని ఆరోగ్య సంరక్షణ, ఉచిత కళాశాల విద్య, తుపాకీ నియంత్రణ వంటి అంశాలకు బహిరంగ మద్దతు తెలిపారు.
