అమెరికా (America) అధ్యక్షుడి అధికారిక నివాసమైన వైట్ హౌస్ (White House) సమీపంలో శనివారం సాయంత్రం జరిగిన భారీ కాల్పుల ఘటన దేశవ్యాప్తంగా కలకలం రేపింది. వైట్ హౌస్ పరిసరాల్లోని 17th స్ట్రీట్, పెన్సిల్వేనియా అవెన్యూ (Pennsylvania Avenue) కూడలి వద్ద ఉన్న సీక్రెట్ సర్వీస్ చెక్పాయింట్ దగ్గరకు ఓ అపరిచిత వ్యక్తి చేరుకుని, ఒక్కసారిగా తన వద్ద ఉన్న ఆయుధంతో అక్కడ విధుల్లో ఉన్న భద్రతా సిబ్బందిపై (Security Personnel) కాల్పులకు తెగబడ్డాడు.
ఊహించని ఈ దాడితో వెంటనే అప్రమత్తమైన సీక్రెట్ సర్వీస్ అధికారులు ఎదురుకాల్పులు జరిపారు. ఈ కాల్పుల్లో దుండగుడు అక్కడికక్కడే మృతి చెందినట్లు అధికారులు వెల్లడించారు. పరస్పర కాల్పుల సమయంలో అక్కడ ఉన్న ఒక సాధారణ పౌరుడికి (Civilian) గాయాలైనట్లు సమాచారం. అతడిని వెంటనే సమీప ఆసుపత్రికి తరలించి చికిత్స అందిస్తున్నారు.
ఈ ఘటన సమయంలో అమెరికా అధ్యక్షుడు డొనాల్డ్ ట్రంప్ (Donald Trump) వైట్ హౌస్ లోపలే ఉన్నప్పటికీ, భద్రతా సిబ్బంది వేగంగా స్పందించడంతో ఆయనకు ఎలాంటి ప్రమాదం జరగలేదని వైట్ హౌస్ అధికారులు స్పష్టం చేశారు. ట్రంప్ పూర్తిగా సురక్షితంగా ఉన్నారని వెల్లడించారు.
కాల్పులు జరిగిన వెంటనే వైట్ హౌస్ పరిసర ప్రాంతాలను అధికారులు తాత్కాలికంగా లాక్డౌన్ (Lockdown) చేశారు. కొద్ది సేపటి తర్వాత పరిస్థితి అదుపులోకి రావడంతో ఆంక్షలను ఎత్తివేశారు. ప్రస్తుతం ఈ దాడి వెనుక ఉన్న ఉద్దేశాలపై ఎఫ్బీఐ అధికారులు లోతుగా దర్యాప్తు చేపట్టారు.
ప్రపంచంలోనే అత్యంత కట్టుదిట్టమైన భద్రత ఉండే వైట్ హౌస్ చెక్పాయింట్ వద్దే ఈ ఘటన చోటుచేసుకోవడం అంతర్జాతీయంగా చర్చనీయాంశమైంది. అమెరికా అధ్యక్ష భవనం భద్రతా ఏర్పాట్లపై మళ్లీ పెద్ద ఎత్తున చర్చ మొదలైంది.
