సాయికృష్ణ (Sai Krishna) తల్లి(Mother) విజయలక్ష్మికి ముఖ్యమంత్రి చంద్రబాబు(Nara Chandrababu Naidu) స్వయంగా భరోసా ఇచ్చి 48 గంటలు గడిచిపోయాయని, కానీ ఇప్పటి వరకు ఎలాంటి పురోగతి కనిపించలేదని మాజీ మంత్రి పేర్ని నాని(Perni Nani) ప్రశ్నించారు. సాయికృష్ణ అదృశ్య ఘటనలో న్యాయం చేస్తామని ప్రభుత్వం ప్రకటించినప్పటికీ, ఇప్పటి వరకు స్పష్టమైన చర్యలు కనిపించకపోవడంపై ఆయన తీవ్ర అసంతృప్తి వ్యక్తం చేశారు.
సాయికృష్ణ అదృశ్యమై 40 రోజులు పూర్తయినా ఇప్పటికీ అతను బతికే ఉన్నాడా లేదా చనిపోయాడా అన్న విషయాన్ని కూడా అధికారులు వెల్లడించలేకపోతున్నారని పేర్ని నాని విమర్శించారు. మార్కాపురం నుంచి విజయవాడ(Vijayawada) కృష్ణలంకకు (Krishnalanka) తీసుకువచ్చిన తర్వాత సాయికృష్ణకు ఏమైందో ప్రభుత్వం సమాధానం చెప్పాలని డిమాండ్ చేశారు.
ఈ వ్యవహారం మొత్తం విజయవాడ సీపీ ఆదేశాల మేరకే జరిగి ఉండొచ్చనే అనుమానాలు ప్రజల్లో ఉన్నాయని ఆయన అన్నారు. సాయికృష్ణ అదృశ్యమైనప్పటి నుంచి పోలీసుల వ్యవహార శైలిపై ఎన్నో ప్రశ్నలు తలెత్తుతున్నా, బాధ్యులపై ఇప్పటి వరకు ఎలాంటి చర్యలు తీసుకోలేదని మండిపడ్డారు.
కృష్ణలంక సీఐ నాగరాజు(CI Nagaraju) వేధింపుల కారణంగానే మరో వ్యక్తి క్రాంత్ కుమార్ (Kranth Kumar) ఆత్మహత్య చేసుకున్నారని ఆరోపించిన పేర్ని నాని, ఆ ఘటనకు సంబంధించిన ఎఫ్ఐఆర్లో సెల్ఫీ వీడియో అంశాన్ని ఉద్దేశపూర్వకంగానే ప్రస్తావించలేదని అన్నారు. ఇలాంటి ఘటనల్లో నిజాలు వెలుగులోకి రాకుండా వ్యవహరిస్తున్నారనే అనుమానాలు మరింత బలపడుతున్నాయని వ్యాఖ్యానించారు.
మనుషుల ప్రాణాలతో చెలగాటం ఆడుతూ, తర్వాత సెటిల్మెంట్లతో వ్యవహారాన్ని ముగించే ప్రయత్నాలు జరుగుతున్నాయని పేర్ని నాని ఆరోపించారు. కేవలం సీఐ నాగరాజుపైనే కాకుండా, ఈ కేసుతో సంబంధం ఉన్న ప్రతి ఒక్కరిపై సమగ్ర విచారణ జరిపి నిజాలను బయటపెట్టాలని ఆయన డిమాండ్ చేశారు.
విచారణ అధికారులు ఒకే శ్మశానవాటికకు ఎందుకు వెళ్లారు? అక్కడ వారికి ఏవైనా కీలక ఆధారాలు లభించాయా? అనే విషయాలను ప్రభుత్వం ప్రజలకు వెల్లడించాలని పేర్ని నాని కోరారు. సాయికృష్ణ అదృశ్య కేసులో పూర్తి స్థాయి పారదర్శక దర్యాప్తు జరిపి బాధిత కుటుంబానికి న్యాయం చేయాలని ఆయన డిమాండ్ చేశారు.
