ఫిల్మ్నగర్లో గురువారం అర్ధరాత్రి భారీ కారు ప్రమాదం కలకలం రేపింది. అతివేగంగా దూసుకొచ్చిన ఓ లగ్జరీ కారు అదుపుతప్పి ప్రముఖ నటుడు ధర్మ నివాసంలోకి దూసుకెళ్లింది. సినీ ప్రముఖులు నివసించే ప్రాంతంలో జరిగిన ఈ ఘటనతో స్థానికులు ఒక్కసారిగా భయాందోళనలకు గురయ్యారు.
పోలీసులు తెలిపిన వివరాల ప్రకారం, కొంతమంది యువకులు లగ్జరీ కారులో ఫిల్మ్నగర్ రోడ్డుపై అత్యంత వేగంగా ప్రయాణిస్తున్నారు. మలుపు వద్ద వేగాన్ని నియంత్రించలేకపోవడంతో కారు అదుపుతప్పి రోడ్డుపక్కనున్న డివైడర్ను దాటింది. అనంతరం నేరుగా నటుడు ధర్మ ఇంటి కాంపౌండ్ గోడను, ప్రధాన గేటును బలంగా ఢీకొట్టి ఇంటి ప్రాంగణంలోకి దూసుకెళ్లింది.
ప్రమాదం జరిగిన సమయంలో కారును నడిపిన యువకులు మద్యం మత్తులో ఉన్నట్లు పోలీసులు అనుమానిస్తున్నారు. ఈ కోణంలో విచారణ కొనసాగిస్తూ వారి నుంచి పూర్తి వివరాలను సేకరిస్తున్నారు.
భారీ శబ్దం వినిపించడంతో నటుడు ధర్మ కుటుంబ సభ్యులు, స్థానికులు వెంటనే బయటకు పరుగులు తీశారు. అదృష్టవశాత్తూ ఈ ప్రమాదంలో కుటుంబ సభ్యులకు ఎలాంటి గాయాలు కాకపోవడంతో అందరూ ఊపిరి పీల్చుకున్నారు. తృటిలో పెద్ద ప్రమాదం తప్పిందని స్థానికులు చెబుతున్నారు.
ఘటనపై నటుడు ధర్మ, ఆయన కుటుంబ సభ్యులు వెంటనే స్థానిక పోలీసులకు ఫిర్యాదు చేశారు. కేసు నమోదు చేసిన పోలీసులు కారులో ఉన్న యువకులను అదుపులోకి తీసుకుని పోలీస్ స్టేషన్కు తరలించారు. ప్రమాదానికి గల పూర్తి కారణాలపై దర్యాప్తు కొనసాగుతోంది.
