సింగీతం శ్రీనివాసరావు దర్శకత్వంలో రూపొందిన వినూత్న ప్రయోగాత్మక చిత్రం ‘సింగ్ గీతం’(Sing Geetham) ఇప్పుడు ఓటీటీ ప్రేక్షకులను అలరించేందుకు సిద్ధమైంది. వైజయంతి మూవీస్ బ్యానర్పై దర్శకుడు నాగ్ అశ్విన్ (Nag Ashwin) ప్రతిష్టాత్మకంగా నిర్మించిన ఈ చిత్రం థియేటర్లలో తన ప్రత్యేక కథనం, సంగీతం, ప్రదర్శనతో ప్రేక్షకుల నుంచి మంచి ప్రశంసలు అందుకుంది. అయాన్(Ayaan), అహల్య(Ahalya), శాలిని (Shalini) ప్రధాన పాత్రల్లో నటించిన ఈ సినిమా 2026 జూన్ 11న ప్రపంచవ్యాప్తంగా విడుదలై విమర్శకుల ప్రశంసలు కూడా సొంతం చేసుకుంది.
తాజా సమాచారం ప్రకారం ‘సింగ్ గీతం’ డిజిటల్ హక్కులను ప్రముఖ ఓటీటీ సంస్థ నెట్ఫ్లిక్స్ (Netflix) సొంతం చేసుకుంది. ఈ సినిమా 2026 జూలై 9 నుంచి నెట్ఫ్లిక్స్ వేదికగా స్ట్రీమింగ్కు అందుబాటులోకి రానున్నట్లు సమాచారం. అయితే దీనిపై అధికారిక ప్రకటన రావాల్సి ఉంది. థియేటర్లలో మిస్ అయిన ప్రేక్షకులకు ఇప్పుడు ఇంట్లోనే ఈ విభిన్న చిత్రాన్ని చూసే అవకాశం లభించనుంది.
ఈ చిత్రానికి రాక్స్టార్ దేవిశ్రీ ప్రసాద్ (Devi Sri Prasad) సంగీతం అందించగా, పాటలు మరియు నేపథ్య సంగీతం సినిమాకు ప్రధాన బలంగా నిలిచాయి. అలాగే విజయ్ దేవరకొండ, కేవీ అనుదీప్, రాహుల్ రవీంద్రన్, నివేద పేతురాజ్ అతిథి పాత్రల్లో కనిపించి ప్రేక్షకులకు ప్రత్యేకమైన సర్ప్రైజ్ ఇచ్చారు. వారి ప్రత్యేక పాత్రలు సినిమాపై మరింత ఆసక్తిని పెంచాయి.
కథ విషయానికి వస్తే ప్రతాప్ (Pratap) తన తండ్రి ఆస్తి కోసం కుబేరపురం (Kuberapuram) అనే గ్రామానికి చేరుకుంటాడు. ఒకప్పుడు పచ్చని ప్రకృతితో కళకళలాడిన ఆ ప్రాంతం ప్రస్తుతం పూర్తిగా మైనింగ్ కేంద్రంగా మారిపోతుంది. అక్కడ ఉన్న కుబేర గోల్డ్ మైన్స్లో(Kubera Gold Mines) తన తండ్రికి వాటా ఉందని తెలుసుకున్న ప్రతాప్, ప్రస్తుతం ఆ గనిని నిర్వహిస్తున్న రేణును కలిసి తన హక్కును పొందేందుకు ప్రయత్నిస్తాడు.
అయితే రేణు ఆ గనిని ఒక విదేశీ సంస్థకు విక్రయించే ప్రయత్నంలో ఉందని తెలుసుకున్న ప్రతాప్, ఆ ప్రక్రియలో భాగమవుతాడు. ఇదే సమయంలో గనిలో పనిచేస్తున్న గౌరి కారణంగా కుబేరపురం మొత్తం ఒక విచిత్రమైన శాపంలో చిక్కుకుంటుంది. ఆ శాపం ప్రభావంతో గ్రామంలోని ప్రతి ఒక్కరూ మాట్లాడే ప్రతి మాట పాటగా మారిపోతుంది. సాధారణ సంభాషణ కూడా సంగీత రూపంలోనే వినిపించడం కథలో ఆసక్తికర మలుపులను తీసుకొస్తుంది.
అసలు ఆ శాపం ఎందుకు వచ్చింది? దాని వెనుక ఉన్న రహస్యం ఏమిటి? గ్రామ ప్రజలు ఆ శాపం నుంచి ఎలా బయటపడ్డారు? తన తండ్రి వాటాను ప్రతాప్ దక్కించుకున్నాడా? చివరికి కుబేరపురంలో ఏం జరిగింది? వంటి ప్రశ్నలకు సమాధానాలు తెలుసుకోవాలంటే ‘సింగ్ గీతం’ చిత్రాన్ని తప్పక చూడాల్సిందే. విభిన్నమైన కథ, సంగీత ప్రధాన కథనం, భావోద్వేగాలతో రూపొందిన ఈ చిత్రం ఓటీటీ ప్రేక్షకులకు కూడా కొత్త అనుభూతిని అందించే అవకాశాలు కనిపిస్తున్నాయి.
