కూటమి పాలనలో వరుస ఫుడ్ పాయిజన్ ఘటనలు- ఆందోళన వ్యక్తం చేస్తున్న ప్రజా సంఘాలు

ఆంధ్రప్రదేశ్‌లో(Andhra Pradesh) కూటమి ప్రభుత్వం (Coalition Government) అధికారంలోకి వచ్చిన తర్వాత ప్రభుత్వ పాఠశాలలు(Government Schools), గురుకులాలు(Gurukul Schools), సంక్షేమ వసతి గృహాలు(Welfare Hostels), అంగన్వాడీలు(Anganwadi Centres), కళాశాల హాస్టళ్లలో (College Hostels) కలుషిత ఆహారం, ఫుడ్ పాయిజన్ ఘటనలు ఆందోళనకరంగా పెరుగుతున్నాయనే విమర్శలు వినిపిస్తున్నాయి. ప్రభుత్వం డొక్కా సీతమ్మ (Dokka Seethamma) పేరుతో మధ్యాహ్న భోజన పథకాన్ని ప్రచారం చేస్తూ, ముఖ్యమంత్రి చంద్రబాబు నాయుడు, ఉప ముఖ్యమంత్రి పవన్ కళ్యాణ్(Pawan Kalyan), విద్యాశాఖ మంత్రి నారా లోకేష్(Nara Lokesh) విద్యార్థులతో కలిసి భోజనం చేసిన దృశ్యాలను విస్తృతంగా ప్రచారం చేసినప్పటికీ, క్షేత్ర స్థాయిలో మాత్రం పరిస్థితులు పూర్తిగా భిన్నంగా కనిపిస్తున్నాయని తల్లితండ్రుల నుండి ఆరోపణలు వినిపిస్తున్నాయి.

రాష్ట్రవ్యాప్తంగా వరుసగా వెలుగులోకి వస్తున్న ఫుడ్ పాయిజన్ ఘటనలు (Food Poisoning Incidents) తల్లిదండ్రుల్లో తీవ్ర ఆందోళనకు కారణమవుతున్నాయి. గతంలో ఎన్నడూ లేని విధంగా జాతీయ మానవ హక్కుల కమిషన్ (National Human Rights Commission – NHRC) కూడా రాష్ట్ర అధికారులకు నోటీసులు జారీ చేసినప్పటికీ, పరిస్థితుల్లో గణనీయమైన మార్పు కనిపించడం లేదనే అభిప్రాయం వ్యక్తమవుతోంది.

పరిస్థితి ఎంత దారుణంగా ఉందో చూపించే సంఘటనగా, అనకాపల్లి జిల్లాలో బీసీ బాలికల గురుకుల హాస్టల్‌ను సందర్శించిన రాష్ట్ర హోంమంత్రి వంగలపూడి అనిత (Vangalapudi Anitha) విద్యార్థులతో కలిసి భోజనం చేస్తుండగా, ఆమె ప్లేటులోనే బొద్దింక కనిపించడం రాష్ట్రవ్యాప్తంగా చర్చనీయాంశమైంది. ఈ ఘటన ప్రభుత్వ ఆహార నాణ్యతపై మరిన్ని ప్రశ్నలు లేవనెత్తింది.

తాజాగా తిరుపతిలోని (Tirupati) రిమ్స్ డెంటల్ కళాశాల (RIMS Dental College) వసతి గృహంలో ఫుడ్ పాయిజన్ ఘటన చోటుచేసుకుంది. దోసె, చట్నీ తిన్న అనంతరం విద్యార్థినులు వాంతులు, విరేచనాలతో అస్వస్థతకు గురికావడంతో బాధితుల సంఖ్య క్రమంగా పెరిగి 30 మందికి చేరుకుంది. వారిని వెంటనే ఆస్పత్రికి తరలించి చికిత్స అందించగా, ప్రస్తుతం అందరూ కోలుకుంటున్నారని అధికారులు తెలిపారు.

అయితే ఈ ఒక్క ఘటన మాత్రమే కాదు. 2024 జూన్ నుంచి 2026 ఫిబ్రవరి వరకు రాష్ట్రంలోని అనంతపురం, వైఎస్ఆర్ జిల్లా, విశాఖపట్నం, నెల్లూరు, కాకినాడ, నూజివీడు, అల్లూరి సీతారామరాజు జిల్లా, విజయనగరం, తిరుపతి, ఏలూరు, శ్రీ సత్యసాయి, తూర్పు గోదావరి, శ్రీకాకుళం, కర్నూలు, పోలవరం తదితర ప్రాంతాల్లో వరుసగా ఫుడ్ పాయిజన్ ఘటనలు నమోదయ్యాయి. ఈ ఘటనల్లో వందలాది మంది విద్యార్థులు(Students) అస్వస్థతకు గురవగా, కొన్ని చోట్ల కుళ్లిన గుడ్లు, నాసిరకం ఆహారం, కలుషిత నీరు, గడువు ముగిసిన పదార్థాలు, పరిశుభ్రత లోపాలు కారణాలుగా ఆరోపణలు వచ్చాయి.

కొన్ని విద్యాసంస్థల్లో విద్యార్థులు భోజనం నాణ్యతపై నిరసన వ్యక్తం చేయగా, మరికొన్ని చోట్ల వాంతులు, విరేచనాలతో ఆస్పత్రులకు తరలించాల్సిన పరిస్థితులు ఏర్పడ్డాయి. కురుపాం గురుకులంలో కలుషిత నీటి కారణంగా విద్యార్థులు తీవ్ర అనారోగ్యానికి గురవడం, మరణాలు నమోదవడం కూడా తీవ్ర ఆందోళన కలిగించిన ఘటనగా నిలిచింది.

డొక్కా సీతమ్మ వంటి మహనీయురాలి పేరును పథకానికి పెట్టడం మాత్రమే కాకుండా, ఆమె సేవాస్ఫూర్తికి తగ్గట్టుగా ప్రతి విద్యార్థికి సురక్షితమైన, పరిశుభ్రమైన, నాణ్యమైన ఆహారం అందేలా ప్రభుత్వం చర్యలు తీసుకోవాల్సిన అవసరం ఉంది. ప్రచార కార్యక్రమాల కంటే పర్యవేక్షణ, నాణ్యత నియంత్రణ, బాధ్యులపై కఠిన చర్యలు, ఆహార భద్రత ప్రమాణాల అమలుపై దృష్టి సారించాలని వారు డిమాండ్ చేస్తున్నారు.

రాష్ట్రంలో వరుసగా నమోదవుతున్న ఈ ఘటనలు ప్రభుత్వ విద్యాసంస్థల్లో ఆహార భద్రతపై తీవ్ర ప్రశ్నలను లేవనెత్తుతున్నాయి. పిల్లల ఆరోగ్యం, వారి భవిష్యత్తుకు సంబంధించిన ఈ అంశంలో ప్రభుత్వం అత్యవసరంగా సమగ్ర చర్యలు తీసుకోవాల్సిన అవసరం ఉందని విద్యావేత్తలు, తల్లిదండ్రులు, ప్రజా సంఘాలు అభిప్రాయపడుతున్నాయి.