మాజీ మంత్రి హరీష్ రావు(Harish Rao) తెలంగాణ భవన్లో (Telangana Bhavan) నిర్వహించిన మీడియా సమావేశంలో సీఎం రేవంత్ రెడ్డి(Revanth Reddy) ప్రభుత్వంపై తీవ్ర విమర్శలు చేశారు. కాళేశ్వరం ప్రాజెక్టు (Kaleshwaram), మేడిగడ్డ బ్యారేజ్ (Medigadda), తుమ్మిడిహట్టి(Tummidihatti), సాగునీటి ప్రాజెక్టుల (Irrigation Projects) విషయంలో ప్రభుత్వం పూర్తిగా విఫలమైందని ఆరోపించారు. ముఖ్యంగా రైతులకు(Farmers) సాగునీరు అందించాల్సిన సమయంలో ప్రభుత్వం రాజకీయాలకే ఎక్కువ ప్రాధాన్యం ఇస్తోందని మండిపడ్డారు. రేవంత్ రెడ్డికి ఇరిగేషన్ వ్యవస్థపై కనీస అవగాహన కూడా లేదని, ప్రజలను తప్పుదోవ పట్టించే ప్రయత్నం చేస్తున్నారని విమర్శించారు.
ప్రస్తుతం గోదావరిలో (Godavari River) లక్షల క్యూసెక్కుల నీరు ప్రవహిస్తున్నప్పటికీ కన్నెపల్లి పంప్ హౌస్లో (Kannepalli Pump House) మోటార్లు ఆన్ చేయకపోవడం ప్రభుత్వ నిర్లక్ష్యానికి నిదర్శనమని హరీష్ రావు అన్నారు. మేడిగడ్డ వద్ద తగినంత నీటి నిల్వ ఉందని, వెంటనే కన్నెపల్లి పంప్ హౌస్ను ప్రారంభిస్తే రోజుకు 3 టీఎంసీల వరకు నీటిని ఎల్లంపల్లికి తరలించే అవకాశం ఉందన్నారు. రైతుల అవసరాల కంటే రాజకీయ ప్రయోజనాలనే ప్రభుత్వం ముందుకు పెడుతోందని ఆరోపించారు.
తనకు కేవలం 3 నెలల పాటు నీటి పారుదల శాఖ బాధ్యతలు అప్పగిస్తే ఎల్లంపల్లికి (Yellampalli Reservoir) నీటిని ఎలా తరలించాలో చేసి చూపిస్తానని హరీష్ రావు సవాల్ విసిరారు. ఒకవేళ తాను చెప్పిన విధంగా చేయలేకపోతే శాశ్వతంగా రాజకీయాల నుంచి తప్పుకుంటానని ప్రకటించారు. కాళేశ్వరం ప్రాజెక్టును మళ్లీ పూర్తి స్థాయిలో గాడిలో పెట్టే సామర్థ్యం బీఆర్ఎస్కే ఉందని ఆయన స్పష్టం చేశారు.
కాళేశ్వరం ప్రాజెక్టు ద్వారా 240 టీఎంసీల నీటి వినియోగానికి అవసరమైన అన్ని అనుమతులు బీఆర్ఎస్ ప్రభుత్వమే తీసుకొచ్చిందని హరీష్ రావు గుర్తుచేశారు. మేడిగడ్డ బ్యారేజ్లో మొత్తం 85 పిల్లర్లలో కేవలం 1 పిల్లర్ మాత్రమే కుంగిపోయిందని, దానిని సాకుగా చూపించి మొత్తం ప్రాజెక్టును నిలిపివేయడం సరైన నిర్ణయం కాదన్నారు. కన్నెపల్లి పంప్ హౌస్ను నిర్మాణ సంస్థ అదనపు ప్రభుత్వ వ్యయం లేకుండా కేవలం 45 రోజుల్లో మరమ్మతు చేసి సిద్ధం చేసిందని తెలిపారు. కాళేశ్వరం ప్రాజెక్టు, సాగునీటి అంశాలపై అసెంబ్లీలో ప్రత్యేక చర్చ నిర్వహించాలని డిమాండ్ చేశారు. కేసీఆర్ రావాల్సిన అవసరం లేదని, బీఆర్ఎస్(BRS) తరఫున తామే చర్చకు సిద్ధమని పేర్కొన్నారు. ప్రభుత్వం చేసే ప్రతి ఆరోపణకు వాస్తవాలతో సమాధానం ఇస్తామని చెప్పారు.
తుమ్మిడిహట్టి ప్రాజెక్టుకు అవసరమైన అనుమతుల విషయంలో గత 2.5 సంవత్సరాల్లో మహారాష్ట్ర ప్రభుత్వంతో ఒక్కసారి అయినా చర్చలు జరిపారా అని హరీష్ రావు ప్రశ్నించారు. తుమ్మిడిహట్టికి అనుమతులు తీసుకొచ్చామని ప్రభుత్వం నిరూపిస్తే తాను వెంటనే రాజీనామా చేసేందుకు సిద్ధమని సవాల్ విసిరారు.
ప్రెస్మీట్లో సీఎం రేవంత్ రెడ్డి(Revanth Reddy) తనపై చేసిన వ్యక్తిగత వ్యాఖ్యలకూ హరీష్ రావు స్పందించారు. వ్యక్తిగతంగా ఎత్తు గురించి వ్యాఖ్యలు చేయడం రాజకీయ సంస్కృతి కాదన్నారు. కేసీఆర్ను(KCR) గౌరవించే విజ్ఞత ముఖ్యమంత్రికి లేదని ఆరోపించారు. అసెంబ్లీలో ప్రధాన ప్రతిపక్ష నేతకు కేటాయించిన గదిని కూడా ప్రభుత్వం తొలగించిందని విమర్శించారు. ఉద్యమకారులు, నిరుద్యోగులు, గన్పార్క్ అంశాలపై ప్రభుత్వం సమాధానం చెప్పకుండా ప్రజా సమస్యలను పక్కనబెట్టి రాజకీయ విమర్శలకే పరిమితమైందని హరీష్ రావు ఆరోపించారు.
