టీమిండియా క్రికెటర్ శ్రేయస్ అయ్యర్ సోదరి శ్రేష్ఠ అయ్యర్ తనపై జరిగిన ఆన్లైన్ ట్రోలింగ్ గురించి తాజాగా ఓ పోడ్కాస్ట్లో భావోద్వేగంగా స్పందించారు. ఐపీఎల్ సందర్భంగా వైరల్ అయిన ఒక వీడియో తర్వాత తనపై తీవ్ర స్థాయిలో వ్యక్తిగత దాడులు జరిగాయని ఆమె వెల్లడించారు. సోషల్ మీడియాలో కొందరు తనను లక్ష్యంగా చేసుకుని అసభ్యకరమైన వ్యాఖ్యలు చేయడంతో పాటు అత్యాచార బెదిరింపులు కూడా పంపారని చెప్పారు.
తన రూపం, వ్యక్తిత్వం, శరీరాకృతి గురించి అవమానకరంగా మాట్లాడారని, ఈ తరహా వ్యాఖ్యలు తనను తీవ్ర మానసిక వేదనకు గురి చేశాయని శ్రేష్ఠ తెలిపారు. పరిస్థితి మరింత దిగజారడంతో తనకు ప్రాణహాని బెదిరింపులు కూడా వచ్చాయని ఆవేదన వ్యక్తం చేశారు. ఇలాంటి వ్యాఖ్యలు చేసే వారి మనస్తత్వాన్నే అవి ప్రతిబింబిస్తాయని ఆమె అన్నారు.
ట్రోలింగ్ కేవలం తనతోనే ఆగిపోలేదని, తాను పనిచేస్తున్న సంస్థను కూడా కొందరు లక్ష్యంగా చేసుకున్నారని శ్రేష్ఠ వెల్లడించారు. తన సహోద్యోగులకు తెల్లవారుజామున ఫోన్ చేసి వేధింపులకు పాల్పడ్డారని, ఆ సంఘటనలు తనను తీవ్రంగా కలిచివేశాయని చెప్పారు.
ఈ అనుభవాలే తన సోదరుడు శ్రేయస్ అయ్యర్ సోషల్ మీడియాకు దూరంగా ఉండటానికి ప్రధాన కారణాల్లో ఒకటని ఆమె పేర్కొన్నారు. సామాజిక మాధ్యమాలను బాధ్యతాయుతంగా ఉపయోగించాల్సిన అవసరం ఉందని పరోక్షంగా సూచించారు. ఒక వైరల్ వీడియో కారణంగా వ్యక్తిగత జీవితాలను లక్ష్యంగా చేసుకుని దూషించడం, బెదిరించడం ఏమాత్రం సమంజసం కాదని ఆమె అభిప్రాయపడ్డారు.
