పొగాకు రైతుల కోసం రంగంలోకి జగన్.. దేవరపల్లిలో కొనుగోలు కేంద్రం సందర్శనకు సిద్ధం

పొగాకు రైతుల (Tobacco Farmers) సమస్యలపై (Issues) గట్టిగా పోరాడతామని హామీ ఇచ్చిన వైఎస్సార్ కాంగ్రెస్ పార్టీ(YSRCP) అధ్యక్షుడు, మాజీ ముఖ్యమంత్రి వైఎస్ జగన్‌మోహన్ రెడ్డి (YS Jagan Mohan Reddy) తన కార్యాచరణను ప్రకటించారు. కొద్ది రోజుల క్రితం పొగాకు రైతులతో నిర్వహించిన సమావేశంలో మాట్లాడిన జగన్, రాష్ట్రంలో దళారులదే రాజ్యమని, ఏ పంటకూ గిట్టుబాటు ధర (Remunerative Price) లభించడం లేదని విమర్శించారు. ఆక్వా రైతులు (Aqua Farmers) కూడా ఇదే పరిస్థితిని ఎదుర్కొంటున్నారని, వ్యాపారులు సిండికేట్లుగా మారి రైతులను దోపిడీ చేస్తున్నారని ఆరోపించారు.

పొగాకు సీజన్ ముగిసే దశకు వచ్చినా కొనుగోళ్లు కేవలం 16.5 శాతమే జరిగాయని, తమ ప్రభుత్వ హయాంలో 2023–24లో పొగాకు కిలోకు గరిష్ఠంగా రూ.411, సగటున రూ.289 ధర లభించిందని గుర్తు చేశారు. ధరలు పడిపోయినప్పటికీ ప్రభుత్వం మార్క్‌ఫెడ్‌ను రంగంలోకి దింపలేదని, లైసెన్స్‌దారులపై చర్యలు ఎందుకు తీసుకోలేదని ప్రశ్నించారు. తమ ప్రభుత్వం రూ.3 వేల కోట్ల ధరల స్థిరీకరణ నిధిని (Price Stabilization Fund) ఏర్పాటు చేసి, ఐదేళ్లలో పంటల కొనుగోలుకు రూ.7,800 కోట్లు ఖర్చు చేసిందని తెలిపారు.

రైతులకు(Farmers) ఇచ్చిన హామీ మేరకు ఆగస్టు 5, 2026 (బుధవారం) పశ్చిమ గోదావరి జిల్లాలో (West Godavari District) జగన్ పర్యటించనున్నారు. ఈ సందర్భంగా దేవరపల్లి (Devarapalli) పొగాకు కొనుగోలు కేంద్రాన్ని సందర్శించి, అక్కడ జరుగుతున్న కొనుగోళ్లను పరిశీలించనున్నారు.

బుధవారం ఉదయం 9:30 గంటలకు తాడేపల్లిలోని తన నివాసం నుంచి బయలుదేరనున్న జగన్, ఉదయం 10:30 గంటలకు దేవరపల్లికి చేరుకుంటారు. అనంతరం పొగాకు కొనుగోలు కేంద్రాన్ని పరిశీలించి, రైతులతో నేరుగా ముఖాముఖి నిర్వహిస్తారు. పంట సాగు, గిట్టుబాటు ధర, కొనుగోళ్లు, రైతులు ఎదుర్కొంటున్న ఇబ్బందులు వంటి అంశాలపై వారి అభిప్రాయాలను తెలుసుకుని చర్చించనున్నారు.