టైటిల్: టాక్సిక్: ఎ ఫెయిరీ టేల్ ఫర్ గ్రోన్-అప్స్
నటీనటులు : యశ్, నయనతార, కియరా అద్వానీ, హ్యుమా ఖురేషి, తారా సుతారియా, రుక్ష్మిణి వసంత్, డారెల్ డి సిల్వా తదితరులు
నిర్మాణ సంస్థలు: కేవీఎన్ ప్రొడక్షన్స్, మాన్స్టర్ మైండ్ క్రియేషన్స్
నిర్మాత: వెంకట్ కె. నారాయణ, యష్
కథ: గీతూ మోహన్దాస్, యష్
దర్శకత్వం: గీతూ మోహన్దాస్
సంగీతం: విశాల్ మిశ్రా,రవి బస్రూర్,తనిష్క్ బాగ్చీ, ఫహీమ్ అబ్దుల్లా, అర్స్లాన్ నిజామీ
నేపథ్య సంగీతం: రవి బస్రూర్
సినిమాటోగ్రఫీ రాజీవ్ రవి
విడుదల తేది: ఆగస్టు 26, 2026
‘కేజీఎఫ్ 2’ తర్వాత యశ్ నటించిన భారీ యాక్షన్ చిత్రం ‘టాక్సిక్’. దాదాపు మూడేళ్ల క్రితమే ప్రకటించిన ఈ సినిమాపై భారీ అంచనాలు ఏర్పడ్డాయి. పోస్టర్లు, టీజర్, ట్రైలర్తో అంచనాలు మరింత పెరిగాయి. భారీ ప్రచారంతో విడుదలకు ముందే దేశవ్యాప్తంగా మంచి హైప్ తీసుకొచ్చారు. మరి విడుదల తర్వాత ‘టాక్సిక్’ ఆ అంచనాలను అందుకుందా? యశ్ మరో విజయాన్ని అందుకున్నారా? చూద్దాం.
కథేంటంటే..
1947 నుంచి 1967 మధ్య గోవా నేపథ్యంలో కథ సాగుతుంది. భారత్కు స్వాతంత్య్రం వచ్చినా గోవా అప్పటికీ పోర్చుగీసుల పాలనలోనే ఉంటుంది. అక్కడ డ్రగ్స్, అక్రమ వ్యాపారాలు, గ్యాంగ్ వార్లు కొనసాగుతుంటాయి. ఈ నేర సామ్రాజ్యాన్ని సాల్వడార్ అనే గ్యాంగ్స్టర్ నడిపిస్తుంటాడు. ఈ ప్రపంచంలోకి రాయ అడుగుపెట్టి, క్రమంగా తనకంటూ ఓ సామ్రాజ్యాన్ని నిర్మించుకుంటాడు.
చిన్నతనంలోనే తల్లిదండ్రులను కోల్పోయిన రాయను అతని అక్క గంగ పెంచుతుంది. రాయను గ్యాంగ్స్టర్గా చూడాలన్నది ఆమె కోరిక. మరోవైపు రాయల్ సర్కస్కు చెందిన నడియాతో రాయ ప్రేమలో పడతాడు. అయితే అప్పటికే సాల్వడార్ కుమార్తె రెబెకాతో రాయకు వివాహం జరుగుతుంది. నడియా రాయ జీవితంలోకి వచ్చిన తర్వాత ఏం జరిగింది? అధికారం, డబ్బు కోసం జరిగిన పోరులో రాయ చేసిన తప్పులేంటి? నడియా గర్భవతి అని తెలిసినా ఆమెకు ఎందుకు దూరమయ్యాడు? ఈ కథలో మెలిసా పాత్ర ఏంటి? అనేదే సినిమా.
ఎలా ఉందంటే..
గ్యాంగ్స్టర్ కథల్లో తరచుగా కనిపించే అంశాలతోనే ‘టాక్సిక్’ తెరకెక్కింది. నేర ప్రపంచంలోకి అడుగుపెట్టడం, తనకంటూ సామ్రాజ్యాన్ని నిర్మించుకోవడం, ప్రత్యర్థులను ఎదుర్కోవడం, చివరికి గతంలో చేసిన తప్పులే సమస్యగా మారడం వంటి అంశాలు ఇందులో కనిపిస్తాయి.
దర్శకురాలు గీతూ మోహన్దాస్ ఈ కథకు కుటుంబ బంధాలు, ప్రేమ, ద్రోహం, ప్రతీకారం, విముక్తి వంటి అంశాలను జోడించారు. భారీ యాక్షన్ సన్నివేశాలు, ఎలివేషన్స్, రొమాన్స్ ఉన్నప్పటికీ అసలు కథ ఏంటి? పాత్రల ఉద్దేశాలు ఏమిటి? దర్శకురాలు ఏం చెప్పాలనుకున్నారు? అనే ప్రశ్నలకు స్పష్టత కనిపించదు.
హింస, యాక్షన్, రొమాన్స్ ఎక్కువగా ఉన్నా అవి ఆశించిన స్థాయిలో ప్రభావం చూపవు. సోదరి, సోదరుడి సెంటిమెంట్ కూడా పెద్దగా కనెక్ట్ కాదు. మొదటి భాగం మాత్రం యశ్ సంభాషణలు, లొకేషన్లు, యాక్షన్ సన్నివేశాలతో కొంత ఆసక్తికరంగా సాగుతుంది.
విరామం తర్వాత సినిమా నెమ్మదిస్తుంది. తండ్రి, కొడుకుల ప్రతీకార కథ మొదలైన తర్వాత సాగదీత సన్నివేశాలు ఎక్కువవుతాయి. 194 నిమిషాల నిడివి కూడా సినిమాకు మైనస్గా మారింది. పాత్రలతో ప్రేక్షకుడు పూర్తిగా అనుసంధానం కాకపోవడంతో సినిమా ఎప్పుడు ముగుస్తుందా అనే భావన కలుగుతుంది. క్లైమాక్స్ కూడా పెద్దగా ఆకట్టుకోదు.
ఎవరెలా చేశారంటే..
యశ్ నటన సినిమాకు ప్రధాన బలం. రాయ గ్యాంగ్స్టర్ పాత్రలో తనదైన శైలిలో ఆకట్టుకున్నారు. భారీ యాక్షన్, ఎలివేషన్ సన్నివేశాల్లో మెప్పించారు. అయితే ‘కేజీఎఫ్’తో పోలిస్తే ఇక్కడ పాత్రకు బలమైన కథ లేకపోవడంతో పూర్తిస్థాయిలో కనెక్ట్ కాలేం. రాయ కొడుకు టికెట్ పాత్రలోనూ యశ్ భిన్నంగా కనిపించారు.
రాయ అక్క గంగగా నయనతార చక్కగా సరిపోయారు. రాయ ప్రియురాలు నడియాగా కియరా అద్వానీ బాగానే నటించారు. వీరిద్దరి మధ్య ప్రేమ సన్నివేశాలు ఆకట్టుకుంటాయి. తారా సుతారియా, రుక్మిణి వసంత్, డారెల్ డి సిల్వా తమ పరిధిలో నటించారు.
సాంకేతికంగా సినిమా పర్వాలేదనిపిస్తుంది. రాజీవ్ రవి సినిమాటోగ్రఫీ బాగుంది. భారీ లొకేషన్లు, యాక్షన్ సన్నివేశాలను ఆకట్టుకునేలా చూపించారు. రవి బస్రూర్ నేపథ్య సంగీతం సాధారణంగానే ఉంది. పాటలు పర్వాలేదు. ఎడిటింగ్పై మరింత శ్రద్ధ పెట్టాల్సింది. కొన్ని సన్నివేశాలను కుదించి ఉంటే నిడివి తగ్గి సినిమా మరింత ఆసక్తికరంగా ఉండేది. నిర్మాణ విలువలు ఉన్నతంగా ఉన్నాయి.
తీర్పు..
భారీ యాక్షన్, ఎలివేషన్స్, రొమాన్స్ ఉన్నప్పటికీ బలమైన కథనం లేకపోవడం ‘టాక్సిక్’కు ప్రధాన లోపం. మొదటి భాగం కొంతవరకు ఆకట్టుకున్నా ద్వితీయార్థం సాగదీతగా మారుతుంది. యశ్ నటన, యాక్షన్ సన్నివేశాలు, సినిమాటోగ్రఫీ, నిర్మాణ విలువలు మెప్పించినా కథ, కథనం మాత్రం పూర్తిస్థాయిలో ఆకట్టుకోలేకపోయాయి.
రేటింగ్: 2.5/5
