నగరం నడిబొడ్డున ఉన్న విలువైన ప్రభుత్వ భూములను (Government Lands) ప్రైవేటు వ్యక్తులకు అప్పగిస్తూ కాంగ్రెస్ ప్రభుత్వం (Congress Government) రియల్ ఎస్టేట్ (Real Estate) సంస్థలా వ్యవహరిస్తోందని బీఆర్ఎస్(BRS) సీనియర్ నాయకుడు, మాజీ మంత్రి హరీశ్ రావు (Harish Rao) ఆరోపించారు. ప్రజల సంక్షేమాన్ని పక్కనపెట్టి కమీషన్ల కోసం కోట్లాది రూపాయల విలువైన ప్రభుత్వ ఆస్తులను తక్కువ ధరకే ప్రైవేటు వ్యక్తులకు కట్టబెడుతున్నారని విమర్శించారు. అజామాబాద్ భూముల కేటాయింపుపై ముఖ్యమంత్రి రేవంత్ రెడ్డికి (Revanth Reddy) ఆయన బహిరంగ లేఖ రాశారు.
రూ.500 కోట్ల భూమి రూ.87 కోట్లకేనా?
హైదరాబాద్ (Hyderabad) ఆర్టీసీ క్రాస్ రోడ్స్ సమీపంలోని అజామాబాద్‌లో ఆయిల్‌ఫెడ్‌కు (Oilfed) చెందిన 3 ఎకరాల 23 గుంటల భూమి ఉందని హరీశ్ రావు తెలిపారు. మొత్తం 15,984 గజాల విస్తీర్ణం ఉన్న ఈ భూమి బహిరంగ మార్కెట్‌లో దాదాపు రూ.500 కోట్ల విలువ చేస్తుందని, అయితే కేవలం రూ.87 కోట్లకే ప్రైవేటు వ్యక్తికి అప్పగించేందుకు ప్రభుత్వం ప్రయత్నిస్తోందని ఆరోపించారు.
ఆయిల్‌ఫెడ్ సిద్ధంగా ఉన్నా ప్రైవేటు వ్యక్తికి ఎందుకు?
భూమికి సంబంధించిన రూ.87 కోట్లు చెల్లించేందుకు ప్రభుత్వ రంగ సంస్థ ఆయిల్‌ఫెడ్ సిద్ధంగా ఉన్నప్పటికీ, ఆ సంస్థను పక్కనపెట్టి ప్రైవేటు వ్యక్తికి భూమిని ఎందుకు అప్పగిస్తున్నారని హరీశ్ రావు ప్రశ్నించారు. ఈ వ్యవహారం వెనుక ఉన్న కారణాలను ప్రభుత్వం ప్రజలకు స్పష్టం చేయాలని డిమాండ్ చేశారు.
సుప్రీంకోర్టు తీర్పును హరీశ్ రావు ప్రస్తావన
1987లో ఒక ప్రైవేటు సంస్థ దాఖలు చేసిన పిటిషన్‌ను సుప్రీంకోర్టు (Supreme Court) కొట్టివేసిందని, భూమిపై ప్రభుత్వానికే పూర్తి హక్కులు ఉన్నట్లు స్పష్టం చేసిందని హరీశ్ రావు గుర్తుచేశారు. బీఆర్ఎస్ హయాంలో ప్రభుత్వ ఆస్తిని కాపాడామని తెలిపారు. మరోవైపు కోకాపేట, రాయదుర్గం, గచ్చిబౌలి, అజామాబాద్ వంటి ప్రాంతాల్లో విలువైన ప్రభుత్వ భూములను ప్రైవేటు వ్యక్తులకు అప్పగిస్తున్నారని కాంగ్రెస్ ప్రభుత్వంపై విమర్శలు చేశారు.
నిర్ణయం వెనక్కి తీసుకోకపోతే ఉద్యమం
ప్రభుత్వ ఆస్తులను ఇదే విధంగా విక్రయిస్తూ పోతే భవిష్యత్తులో ప్రజా అవసరాలకు భూమి కొరత ఏర్పడుతుందని హరీశ్ రావు హెచ్చరించారు. అజామాబాద్ భూమి కేటాయింపు నిర్ణయాన్ని వెంటనే రద్దు చేసి, పూర్తి హక్కులను ఆయిల్‌ఫెడ్‌కే కల్పించాలని డిమాండ్ చేశారు. నిర్ణయాన్ని వెనక్కి తీసుకునే వరకు న్యాయపోరాటంతో పాటు ప్రజా క్షేత్రంలోనూ పెద్దఎత్తున ఉద్యమం చేపడతామని స్పష్టం చేశారు.
