ఆంధ్రప్రదేశ్‌లో మహిళల భద్రతపై మరోసారి ఆందోళనలు వ్యక్తమవుతున్నాయి. అస్సాం రాష్ట్రానికి చెందిన 20 ఏళ్ల విద్యార్థిని హిమశ్రీ బోరో శ్రీకాకుళం జిల్లాలో రైల్వే ట్రాక్ సమీపంలో అనుమానాస్పద స్థితిలో మృతిచెందడం తీవ్ర కలకలం రేపుతోంది. రైలు ప్రయాణంలో తనకు భద్రత లేదని కుటుంబ సభ్యులకు సమాచారం ఇచ్చిన కొద్దిసేపటికే ఆమె ఫోన్ అందుబాటులో లేకుండా పోవడం పలు అనుమానాలకు తావిస్తోంది. ఈ ఘటనపై సమగ్ర విచారణ జరిపించాలని అస్సాం ముఖ్యమంత్రి హిమంత బిశ్వ శర్మ ఆంధ్రప్రదేశ్ ప్రభుత్వాన్ని, కేంద్ర రైల్వే మంత్రిని కోరడం ప్రాధాన్యత సంతరించుకుంది.
అస్సాంలోని గువాహటికి చెందిన హిమశ్రీ బోరో బి. బరువా కళాశాలలో విద్యనభ్యసిస్తోంది. సాంస్కృతిక నృత్య బృందంలో భాగంగా విశాఖపట్నానికి వచ్చిన ఆమె, పరీక్షలు సమీపిస్తుండటంతో స్వగ్రామానికి తిరిగి వెళ్లేందుకు అక్టోబర్ 5న విశాఖపట్నంలో వివేక్ ఎక్స్‌ప్రెస్ రైలు ఎక్కింది. అయితే, అక్టోబర్ 6 తెల్లవారుజామున తన బోగీలో కొందరు యువకులు అసభ్యంగా ప్రవర్తిస్తున్నారని, తనకు భద్రత లేదని కుటుంబ సభ్యులకు, స్నేహితుడికి ఫోన్ ద్వారా తెలిపినట్లు సమాచారం. ఆ తర్వాత ఆమె ఫోన్ అందుబాటులో లేకుండా పోయింది.
రైలు గువాహటికి చేరుకున్నప్పుడు హిమశ్రీ కనిపించకపోవడం, ఆమె సామాన్లు, పత్రాలు మాత్రం ఎస్‌2 బోగీలోనే లభించడంతో కుటుంబ సభ్యులు ఆందోళనకు గురయ్యారు. అనంతరం అక్టోబర్ 7న శ్రీకాకుళం జిల్లాలోని మలయపురం, తిక్కులంపురం పరిసర ప్రాంతాల్లో రైల్వే ట్రాక్ సమీపంలోని అటవీ ప్రాంతంలో ఆమె మృతదేహాన్ని గుర్తించారు.
హిమశ్రీ మృతికి గల కారణాలు ఇంకా స్పష్టంగా తెలియరాలేదు. ఆమె ప్రయాణిస్తున్న రైలు నుంచి ప్రమాదవశాత్తూ పడిపోయిందా? లేక ఆమెపై ఎవరైనా దాడికి పాల్పడ్డారా? అనే కోణాల్లో రైల్వే పోలీసులు దర్యాప్తు చేస్తున్నారు. పాలాస, శ్రీకాకుళం ప్రాంతాలకు చెందిన ప్రభుత్వ రైల్వే పోలీసు అధికారులు ఈ కేసును పరిశీలిస్తున్నారు.
ఆంధ్రప్రదేశ్‌లో మహిళలపై జరుగుతున్న నేరాలు, వేధింపుల ఘటనలు ప్రజల్లో ఆందోళన కలిగిస్తున్నాయి. రాష్ట్రంలో మహిళలకు భద్రత కల్పించడంలో ప్రభుత్వం విఫలమవుతోందంటూ ఇప్పటికే ప్రతిపక్షాలు విమర్శలు గుప్పిస్తున్నాయి. ఈ నేపథ్యంలో హిమశ్రీ బోరో మృతి ఘటన మహిళల భద్రతపై మరోసారి చర్చకు దారితీసింది. ముఖ్యంగా రైలు ప్రయాణంలోనే తనకు భద్రత లేదని ఒక యువతి కుటుంబ సభ్యులకు సమాచారం ఇచ్చినట్లు వస్తున్న వివరాలు ప్రయాణికుల రక్షణ వ్యవస్థపై ప్రశ్నలు లేవనెత్తుతున్నాయి.
తన రాష్ట్రానికి చెందిన యువతి ఆంధ్రప్రదేశ్‌లో మృతిచెందడంపై అస్సాం ముఖ్యమంత్రి హిమంత బిశ్వ శర్మ తీవ్ర దిగ్భ్రాంతి వ్యక్తం చేశారు. ఈ ఘటనపై సమగ్రంగా, ప్రాధాన్యతతో విచారణ జరిపించాలని ఆంధ్రప్రదేశ్ ప్రభుత్వానికి, కేంద్ర రైల్వే మంత్రికి లేఖ రాశారు. మరోవైపు, గువాహటిలో విద్యార్థులు, వివిధ సామాజిక సంఘాలు నిరసనలు చేపట్టి హిమశ్రీకి న్యాయం చేయాలని, ఘటనకు సంబంధించిన వాస్తవాలను వెల్లడించాలని డిమాండ్ చేస్తున్నాయి.
