ఏలూరు జిల్లా కొయ్యలగూడెం ప్రాంతంలో మట్టి తవ్వకాల ఆర్థిక లావాదేవీలకు సంబంధించిన వివాదం పోలవరం జనసేన ఎమ్మెల్యే చిర్రి బాలరాజు చుట్టూ రాజకీయ చర్చకు దారితీసింది. ఈ వ్యవహారంలో రూ.13 లక్షల నగదు పంపకాలపై ఎమ్మెల్యే జోక్యం చేసుకున్నారనే ఆరోపణలు వెలువడ్డాయి. దీనికి సంబంధించినదిగా చెబుతున్న ఫోన్ సంభాషణలు సామాజిక మాధ్యమాల్లో వైరల్ కావడంతో వివాదం మరింత చర్చనీయాంశమైంది.
ఈ ఆరోపణల నేపథ్యంలో జనసేన పార్టీ అధ్యక్షుడు పవన్ కళ్యాణ్.. ఎమ్మెల్యే బాలరాజుపై మీడియాలో వచ్చిన ఆరోపణలపై విచారణ జరిపేందుకు ఉన్నతస్థాయి కమిటీని నియమించినట్లు పార్టీ ప్రకటించింది. గతంలోనూ బాలరాజు వ్యవహారశైలిపై పార్టీ అధిష్ఠానం అసంతృప్తి వ్యక్తం చేసిందని, తాజా పరిణామాలపై కమిటీ నివేదిక ఆధారంగా తదుపరి చర్యలు తీసుకుంటామని వెల్లడించినట్లు సమాచారం.
అయితే, జనసేనలో గతంలోనూ వివాదాస్పద నేతలపై విచారణ కమిటీల నియామకం జరిగిన సందర్భాలను ప్రస్తావిస్తూ, ఈసారి కూడా విచారణ ప్రక్రియతోనే సరిపెడతారా? లేక ఆరోపణలపై స్పష్టమైన చర్యలు తీసుకుంటారా? అనే ప్రశ్నలు రాజకీయ వర్గాల్లో వ్యక్తమవుతున్నాయి. రైల్వే కోడూరు ఎమ్మెల్యే అరవ శ్రీధర్, తిరుపతికి చెందిన జనసేన నాయకుడు కిరణ్ రాయల్‌కు సంబంధించిన గత వివాదాలను కూడా ఈ సందర్భంగా కొందరు ప్రస్తావిస్తున్నారు. అయితే, బాలరాజుపై వచ్చిన ఆరోపణలపై కమిటీ విచారణ, దాని నివేదిక, పార్టీ తీసుకునే తుది నిర్ణయం కీలకంగా మారాయి.
