ఇండోనేషియాలో(Indonesia)భారీ నౌక ప్రమాదం (Major Ship Accident) సంభవించింది. సురాబయా(Surabaya) నుంచి దక్షిణ కాళీమంతన్‌కు (South Kalimantan) ప్రయాణిస్తున్న విర్గో ట్రాన్స్‌పోర్ట్ 8(Virgo Transport 8) అనే ప్రయాణికుల నౌక ప్రతికూల వాతావరణ పరిస్థితుల కారణంగా జావా సముద్రంలో ప్రమాదానికి గురైంది. ఈ ఘటన ఆదివారం తెల్లవారుజామున చోటుచేసుకోగా, నౌకలో 240 మందికి పైగా ప్రయాణికులు ఉన్నట్లు అధికారులు వెల్లడించారు.
తెల్లవారుజామున సుమారు 2 గంటల సమయంలో నౌకతో సంబంధాలు తెగిపోయినట్లు శోధన, సహాయక సంస్థ(Search and Rescue Agency) అధికారులు తెలిపారు. సమాచారం అందిన వెంటనే సహాయక బృందాలు అప్రమత్తమై రంగంలోకి దిగాయి. నౌకలు, హెలికాప్టర్ల సాయంతో సముద్రంలో విస్తృతంగా గాలింపు చర్యలు చేపట్టారు.
ఇప్పటివరకు 103 మంది ప్రయాణికులను ఇతర నౌకల సహాయంతో సురక్షితంగా రక్షించినట్లు బాంజర్మసిన్ శోధన కార్యాలయ అధిపతి ఐ పుటు సుదయాన (I Putu Sudayana) తెలిపారు. రక్షించిన ప్రయాణికులను తూర్పు జావాలోని ఓడరేవుకు తరలిస్తున్నారు.
అయితే మరో 130 మంది ప్రయాణికుల ఆచూకీ ఇంకా లభించలేదు. వారి కోసం సహాయక బృందాలు గాలింపు చర్యలను ముమ్మరం చేశాయి. ఈ ప్రమాదంలో ఇప్పటివరకు 6 మంది మృతి చెందినట్లు అధికారులు వెల్లడించారు.
ఇండోనేషియాలో దాదాపు 17,000 దీవులు ఉండటంతో జలరవాణా ప్రజల దైనందిన ప్రయాణాల్లో కీలక పాత్ర పోషిస్తోంది. అయితే నౌకల భద్రతా ప్రమాణాల విషయంలో లోపాలు, ప్రతికూల వాతావరణ పరిస్థితుల కారణంగా అక్కడ తరచూ నౌక ప్రమాదాలు చోటుచేసుకుంటున్నాయి.
