చైనా అధ్యక్షుడు జిన్‌పింగ్ (Xi Jinping) వచ్చే వారం అమెరికాలో(United States) పర్యటించనున్నారు. సెప్టెంబర్ 24న వైట్‌హౌస్‌లో అమెరికా అధ్యక్షుడు డొనాల్డ్ ట్రంప్‌తో(Donald Trump) ఆయన సమావేశం కానున్నారు. గత మేలో చైనాలో(China) పర్యటించిన ట్రంప్.. జిన్‌పింగ్‌ను అమెరికాకు ఆహ్వానించారు. దాదాపు 10 ఏళ్ల తర్వాత జిన్‌పింగ్ వైట్‌హౌస్‌లో(White House) పర్యటించే అవకాశం ఉండటంతో ఈ భేటీకి ప్రాధాన్యత ఏర్పడింది.
సెప్టెంబర్ 24 భేటీలో వాణిజ్యం, చైనా కార్ల దిగుమతులు, బోయింగ్ విమానాలు, తైవాన్, కృత్రిమ మేధస్సు, సాంకేతిక ఆంక్షలు, ఉక్రెయిన్, గాజా, ఇరాన్ వంటి అంశాలు చర్చకు వచ్చే అవకాశం ఉంది. అమెరికా, చైనా మధ్య కొనసాగుతున్న సుంకాలు(Tariffs), సాంకేతిక ఆంక్షల (Technology Restrictions) నేపథ్యంలో సమావేశం కీలకంగా మారింది.
చైనా కార్లపై భారీ సుంకాలు
చైనా కార్లపై (Chinese Cars) అమెరికా విధిస్తున్న 100 శాతం నుంచి 150 శాతం వరకు సుంకాలను ట్రంప్ సమర్థించారు. చైనా వాహనాలు అమెరికా మార్కెట్లోకి భారీగా రాకుండా తానే అడ్డుకున్నానని చెప్పారు. అయితే చైనా కంపెనీలు అమెరికాలోనే కార్లను తయారు చేసి స్థానికులకు ఉద్యోగాలు కల్పిస్తే అంగీకరించే అవకాశం ఉందని ట్రంప్ గతంలో సంకేతాలు ఇచ్చారు.
బోయింగ్ విమానాల కొనుగోలుపై చర్చ
ట్రంప్, జిన్‌పింగ్ భేటీలో బోయింగ్ విమానాల (Boeing Aircraft) కొనుగోలు అంశం కూడా చర్చకు రానుంది. మేలో కుదిరిన ఆర్థిక అవగాహనల్లో భాగంగా అమెరికాలో తయారైన సుమారు 200 బోయింగ్ విమానాలను కొనుగోలు చేసేందుకు చైనా అంగీకరించినట్లు సమాచారం. ఈ ఒప్పందంపై సమావేశంలో మరింత స్పష్టత వచ్చే అవకాశం ఉంది.
తైవాన్ అంశం అత్యంత సున్నితం
తైవాన్ అంశం (Taiwan Issue) భేటీలో అత్యంత సున్నితమైన అంశంగా మారనుంది. తైవాన్‌కు అమెరికా కొత్త ఆయుధ విక్రయాలకు ఆమోదం తెలిపితే సమావేశాన్ని రద్దు చేసే అవకాశం ఉందని చైనా హెచ్చరించినట్లు వార్తలు వచ్చాయి. తైవాన్‌ను చైనా తన భూభాగంలో భాగంగా పరిగణిస్తోంది. ఈ విషయంలో ఏవైనా తప్పిదాలు జరిగితే ఇరు దేశాల మధ్య ఘర్షణకు దారితీసే ప్రమాదం ఉందని జిన్‌పింగ్ గతంలో హెచ్చరించినట్లు సమాచారం.
వాణిజ్యం, సాంకేతికతపై చర్చ
ఇరు దేశాల మధ్య సుంకాలు(Tariffs), ద్వైపాక్షిక వాణిజ్యం(Bilateral Trade), చైనా పెట్టుబడులు(Chinese Investments), మార్కెట్ ప్రాప్యత(Market Access), వ్యూహాత్మక సాంకేతికతలపై ఆంక్షలు (Restrictions on Strategic Technologies) ప్రధాన చర్చాంశాలుగా ఉండనున్నాయి. పరస్పర సుంకాలను తగ్గించే విషయంలో ఒప్పందం కుదుర్చుకోవాలని చైనా కోరుకుంటోంది.
కృత్రిమ మేధస్సుపై పోటీ
కృత్రిమ మేధస్సు రంగంలో(Artificial Intelligence Sector) అమెరికా, చైనా మధ్య పోటీ కూడా భేటీలో ప్రస్తావనకు రానుంది. అత్యాధునిక చిప్‌లు(Advanced Chips), కృత్రిమ మేధస్సు మౌలిక సదుపాయాలకు చైనా ప్రాప్యతను అమెరికా పరిమితం చేస్తోంది. మరోవైపు చైనా సంస్థలు ఈ రంగంలో అమెరికా సంస్థలకు గట్టి పోటీ ఇస్తున్నాయి.
ఉక్రెయిన్, గాజా, ఇరాన్‌పై చర్చ
ఉక్రెయిన్ యుద్ధం(Ukraine War), గాజా(Gaza), పశ్చిమాసియా పరిస్థితులు కూడా చర్చకు వచ్చే అవకాశం ఉంది. ముఖ్యంగా ఇరాన్ అంశం కీలకంగా మారనుంది. ఇరాన్‌తో చైనా దౌత్య, ఆర్థిక సంబంధాలను కొనసాగిస్తుండగా, అమెరికా ఇరాన్ ఘర్షణలో నేరుగా భాగస్వామిగా ఉంది. ఈ నేపథ్యంలో ఇరాన్ విషయంలో చైనా దౌత్యపరమైన పాత్రపై కూడా చర్చ జరిగే అవకాశం ఉంది.
ఇరాన్‌కు చైనా నిఘా సమాచారం ఇచ్చిందా?
జోర్డాన్‌లోని(Jordan) అమెరికా, మిత్రదేశాల సైనిక స్థావరాలకు సంబంధించిన ఉపగ్రహ చిత్రాలను చైనాకు చెందిన సంస్థలు ఇరాన్‌కు (Iran) అందించి ఉండవచ్చన్న ఆరోపణలు కూడా చర్చకు రావచ్చు. ఈ అంశంపై జిన్‌పింగ్‌ను నేరుగా ప్రశ్నిస్తారా అనే దానిపై ట్రంప్ స్పష్టత ఇవ్వలేదు.
మొత్తంగా సెప్టెంబర్ 24న జరగనున్న ట్రంప్, జిన్‌పింగ్ భేటీ వాణిజ్య అంశాలకే పరిమితం కాకుండా తైవాన్, కృత్రిమ మేధస్సు, సాంకేతికత, ఉక్రెయిన్, ఇరాన్ వంటి అంతర్జాతీయంగా సున్నితమైన అంశాలపై కీలక చర్చలకు వేదికగా మారే అవకాశం ఉంది.
