సెర్బియాలో (Serbia) కీలక రాజకీయ పరిణామం చోటుచేసుకుంది. అధ్యక్షుడు అలెగ్జాండర్ వుసిచ్ (Aleksandar Vucic) తన పదవికి రాజీనామా (Resignation) చేశారు. రెండోసారి అధ్యక్షుడిగా కొనసాగుతున్న ఆయన పదవీకాలం పూర్తికాకముందే వైదొలగడం ప్రాధాన్యం సంతరించుకుంది. అక్టోబర్ 25న జరగనున్న ముందస్తు పార్లమెంటరీ ఎన్నికలకు ముందు ఆయన ఈ నిర్ణయం తీసుకున్నారు.
రాజీనామాతో వుసిచ్ సాధారణ పౌరుడిగా ఎన్నికల్లో పోటీ చేసేందుకు మార్గం ఏర్పడింది. తన సెర్బియన్ ప్రోగ్రెసివ్ పార్టీ (Serbian Progressive Party) తరఫున ప్రధానమంత్రి అభ్యర్థిగా Prime Ministerial Candidate) బరిలోకి దిగే అవకాశం ఉంది. మూడోసారి అధ్యక్ష పదవికి పోటీ చేసే అవకాశం లేకపోవడంతో ఆయన పార్లమెంటరీ ఎన్నికల వైపు మొగ్గుచూపారు.
రాజీనామా అనంతరం అధ్యక్ష బాధ్యతలను పార్లమెంట్ స్పీకర్ (Parliament Speaker) అనా బర్నాబిచ్‌కు (Ana Brnabic) అప్పగించారు. కొత్త అధ్యక్షుడు ఎన్నికయ్యే వరకు ఆమె తాత్కాలిక అధ్యక్షురాలిగా కొనసాగనున్నారు.
వుసిచ్ 2017లో తొలిసారి, 2022లో రెండోసారి సెర్బియా అధ్యక్షుడిగా ఎన్నికయ్యారు. ప్రస్తుతం ఆయన రాజీనామాతో అక్టోబర్ 25న ముందస్తు పార్లమెంటరీ ఎన్నికలు, అనంతరం అధ్యక్ష ఎన్నికలు జరగనున్నాయి.
నోవి సాద్ రైల్వే స్టేషన్ (Novi Sad Railway Station) పైకప్పు కూలి 16 మంది మరణించిన ఘటన తర్వాత 2024 నవంబర్‌లో సెర్బియాలో విద్యార్థుల నిరసనలు ప్రారంభమయ్యాయి. అవి అవినీతి(Corruption), ప్రభుత్వ జవాబుదారీతనం(Government Accountability), దర్యాప్తు పారదర్శకత వంటి అంశాలపై విస్తరించాయి. ముందస్తు ఎన్నికలు నిర్వహించాలనే డిమాండ్లు కూడా వినిపించాయి.
రాజీనామాకు ముందు వుసిచ్ 49 మందికి క్షమాభిక్ష మంజూరు చేసినట్లు ప్రకటించారు. వీరిలో 23 మంది ఇటీవలి నిరసనలకు సంబంధించిన కేసుల్లో ఉన్నవారని తెలిపారు.
అధ్యక్ష పదవికి రాజీనామా చేసినప్పటికీ వుసిచ్ రాజకీయాల్లో కొనసాగనున్నారు. దీంతో సెర్బియా త్వరలో పార్లమెంటరీ, అధ్యక్ష ఎన్నికలను ఎదుర్కోనుంది.
