తూర్పు ఉక్రెయిన్‌లోని (Ukraine) క్రామటోర్స్క్(Kramatorsk) నగరంలో రష్యా(Russia) జరిపిన గ్లైడ్ బాంబు దాడి (Glide Bomb Attack) తీవ్ర విషాదాన్ని మిగిల్చింది. రద్దీగా ఉన్న సమయంలో బస్టాప్‌ను (Bus Stop) లక్ష్యంగా చేసుకుని జరిగిన ఈ దాడిలో 33 మంది పౌరులు ప్రాణాలు కోల్పోయారు. మరో 18 మంది తీవ్రంగా గాయపడినట్లు ఉక్రెయిన్ అత్యవసర సేవల విభాగం వెల్లడించింది. ఈ దాడిలో రెండు బస్సులు (Buses) ధ్వంసమయ్యాయి. సమీప ప్రాంతంలో జరిగిన మరో దాడిలో ముగ్గురు మరణించినట్లు అధికారులు తెలిపారు.
దాడి తీవ్రతకు మృతుల శరీరాలు తీవ్రంగా దెబ్బతినడంతో కొందరిని గుర్తించడం కూడా కష్టంగా మారిందని ఉక్రెయిన్ అధ్యక్షుడు వ్లాదిమిర్ జెలెన్స్కీ(Volodymyr Zelenskyy) ఆవేదన వ్యక్తం చేశారు. గాయపడిన వారిలో పలువురి పరిస్థితి విషమంగా ఉందని, దీంతో మృతుల సంఖ్య మరింత పెరిగే అవకాశం ఉందని తెలిపారు.
పౌరులను లక్ష్యంగా చేసుకుని రష్యా సైన్యం దాడులు చేస్తోందని జెలెన్స్కీ ఆరోపించిన కొద్ది రోజులకే క్రామటోర్స్క్‌లో ఈ ఘటన చోటుచేసుకుంది. పౌరులను ఉద్దేశపూర్వకంగా లక్ష్యంగా చేసుకోవడం అంతర్జాతీయ మానవతా చట్టాల (International Humanitarian Law) ప్రకారం తీవ్రమైన ఉల్లంఘనగా పరిగణించబడుతుంది.
రష్యా-ఉక్రెయిన్ యుద్ధం (Russia-Ukraine War) ప్రారంభమైనప్పటి నుంచి ఉక్రెయిన్‌లోని పలు ప్రాంతాలపై వైమానిక దాడులు కొనసాగుతున్నాయి. రష్యా దాడుల కారణంగా భవనాలు, మౌలిక వసతులు దెబ్బతింటున్నాయని, ప్రజల్లో భయాందోళనలు నెలకొంటున్నాయని ఉక్రెయిన్ మానవ హక్కుల కమిషనర్ డిమిత్రో లుబినెట్స్ (Dmytro Lubinets) ఆరోపించారు.
తాజా దాడి క్రామటోర్స్క్ రవాణా వ్యవస్థపైనా ప్రభావం చూపింది. మరిన్ని దాడులు జరిగే ప్రమాదం ఉందన్న హెచ్చరికల నేపథ్యంలో క్రామటోర్స్క్‌తో పాటు సమీపంలోని స్లోవియాన్స్క్(Sloviansk) నగరాల్లో ప్రజారవాణాను నిలిపివేసినట్లు ప్రాంతీయ గవర్నర్(Regional Governor) వాడిమ్ ఫిలాష్కిన్(Vadym Filashkin) తెలిపారు.
