2024 ఆంధ్రప్రదేశ్‌ అసెంబ్లీ ఎన్నికల ఫలితాలు, ఈవీఎంల నిర్వహణ, ఓట్ల లెక్కింపు ప్రక్రియపై మరోసారి రాజకీయ చర్చ మొదలైంది. వైఎస్సార్‌సీపీ అధినేత, మాజీ ముఖ్యమంత్రి వైఎస్‌ జగన్‌మోహన్‌ రెడ్డి ఓటమిపై తెలంగాణ కాంగ్రెస్‌ సీనియర్‌ నాయకుడు కోమటిరెడ్డి వెంకట్‌రెడ్డి చేసిన వ్యాఖ్యలు ఈ అంశాన్ని మరోసారి తెరపైకి తీసుకొచ్చాయి.
గత ఎన్నికల్లో జగన్ ప్రభుత్వం అనేక సంక్షేమ పథకాలను అమలు చేసి, బడుగు, బలహీన వర్గాలతో పాటు రైతులకు అండగా నిలిచిందని ఆయన గుర్తుచేశారు. ఇన్ని సంక్షేమ కార్యక్రమాలు అమలైనప్పటికీ జగన్ ఎందుకు ఓటమి పాలయ్యారనే అంశంపై ప్రతి ఒక్కరూ ఆలోచించాలని అభిప్రాయపడ్డారు. ఎన్నికల సంఘం వ్యవహారశైలిపై కూడా ఆయన విమర్శలు చేసినట్లు పేర్కొన్నారు.
ఇదే విషయంలో ఇప్పటికే సీపీఎం కేంద్ర కమిటీ సభ్యుడు తమ్మినేని వీరభద్రం సైతం 2024 ఏపీ ఎన్నికల ఫలితాలపై అనుమానాలు వ్యక్తం చేశారు. సామాజికవేత్త పరకాల ప్రభాకర్‌ చేసిన సర్వే, విశ్లేషణల్లో పోలింగ్‌ కేంద్రాల్లో నమోదైన ఓట్లు, ఓట్ల లెక్కింపు గణాంకాలకు సంబంధించి కొన్ని అనుమానాలు ఉన్నట్లు వెల్లడైందని తమ్మినేని పేర్కొన్నారు.
కొన్ని పోలింగ్‌ కేంద్రాల్లో ఓట్ల నమోదుకు సంబంధించిన గణాంకాలపై స్పష్టత అవసరమని ఆయన అభిప్రాయపడ్డారు. డేటా సైంటిస్టులు, నిపుణులు ఈ అంశాలను పరిశీలించి ఎన్నికల సంఘానికి వివరాలు అందించినట్లు తెలిపారు. 2024 ఎన్నికల్లో ఈవీఎంల నిర్వహణ, ఓట్ల లెక్కింపు ప్రక్రియపై వస్తున్న ఆరోపణలు, సందేహాల నేపథ్యంలో సమగ్ర పరిశీలన జరగాలని ఆయన కోరిన విషయం తెలిసిందే.
