సినీ పరిశ్రమలో తీవ్ర విషాదం నెలకొంది. ప్రముఖ సంగీత దర్శకుడు దేవా (Deva) (75) కన్నుమూశారు. అనారోగ్యంతో చెన్నైలోని(Chennai) ఓ ప్రైవేటు ఆసుపత్రిలో చికిత్స పొందుతున్న ఆయన శనివారం తుదిశ్వాస విడిచినట్లు సమాచారం. తమిళం, తెలుగు, మలయాళం భాషల్లో 400కు పైగా చిత్రాలకు సంగీతం (Music) అందించిన దేవా మరణంతో సినీ ప్రముఖులు, అభిమానులు విషాదంలో మునిగిపోయారు.
చెన్నైలోని మైలాపూర్‌లో (Mylapore) జన్మించిన దేవా, 1986లో విడుదలైన ‘మాట్టుక్కార మన్నన్’(Mattukara Mannan) చిత్రంతో తమిళ సినీ పరిశ్రమలో సంగీత దర్శకుడిగా ప్రస్థానం ప్రారంభించారు. అనంతరం ప్రశాంత్ నటించిన ‘వైగాసి పొరంధాచ్చు’ (Vaigasi Porandhachu) సినిమాతో మంచి గుర్తింపు తెచ్చుకున్నారు. తనదైన సంగీత శైలితో దక్షిణాది ప్రేక్షకులకు చేరువయ్యారు.
దేవా తెలుగు ప్రేక్షకులకు కూడా సుపరిచితమే. ‘తొలిప్రేమ’, ‘మాస్టర్’, ‘ఆటోడ్రైవర్’, ‘ప్రేమ లేఖ’, ‘భాషా’, ‘పంచతంత్రం’, ‘నాగ’ వంటి చిత్రాలకు ఆయన సంగీతం అందించారు. విభిన్నమైన బాణీలతో ఎన్నో పాటలకు ప్రత్యేక గుర్తింపు తీసుకొచ్చారు.
తమిళ చిత్రసీమలో గానా పాటలకు ప్రాచుర్యం కల్పించడంలో దేవా కీలక పాత్ర పోషించారు. ఈ తరహా పాటలతో తనకంటూ ప్రత్యేక ముద్ర వేసుకున్నారు. ఇళయరాజా వంటి దిగ్గజ సంగీత దర్శకుల హవా కొనసాగుతున్న సమయంలోనూ తన ప్రత్యేక శైలితో ప్రేక్షకుల ఆదరణ పొందారు. తన సోదరుడు చంద్రబోస్‌తో కలిసి సంగీత బృందాన్ని కూడా నిర్వహించారు.
దశాబ్దాల పాటు తన సంగీతంతో ప్రేక్షకులను అలరించిన దేవా మరణం సినీ పరిశ్రమకు తీరని లోటుగా మారింది. ఆయన అందించిన పాటలు, బాణీలు అభిమానుల జ్ఞాపకాల్లో చిరస్థాయిగా నిలిచిపోనున్నాయి. ఆయన మృతిపై సినీ ప్రముఖులు, అభిమానులు సంతాపం వ్యక్తం చేస్తున్నారు.
