రాజధాని అమరావతి (Capital Amaravati) అభివృద్ధి కోసం చేపట్టిన రెండో దశ భూ-సమీకరణ ప్రక్రియ (Second Phase Land Pooling Process – LPP) ఆశించిన వేగంతో ముందుకు సాగడం లేదని తెలుస్తుంది. జనవరి 7న నోటిఫికేషన్ జారీ చేసినప్పటి నుంచి ఇప్పటివరకు కేవలం 664 ఎకరాల భూమి మాత్రమే పూలింగు కిందకు రావడం ప్రభుత్వ అంచనాలకు భిన్నంగా మారింది. తొలుత పెద్ద ఎత్తున ప్రచారం, హడావుడి జరిగినప్పటికీ స్థానిక రైతుల్లో గణనీయమైన స్పందన కనిపించడం లేదు.
రెండో దశలో వడ్డమాను, పెదమద్దూరు, యండ్రాయి, కర్లపూడి రెవెన్యూ గ్రామాలకు నోటిఫికేషన్ ఇవ్వగా, వడ్డమాను మినహా మిగిలిన గ్రామాలు తెలుగుదేశం పార్టీ(TDP)కి అనుకూల ప్రాంతాలుగా గుర్తింపు పొందాయి. పెదకూరపాడు నియోజకవర్గ పరిధిలోని అమరావతి మండలంలో ఉండటంతో రైతులు ముందుకొచ్చి భూములు ఇస్తారని ప్రభుత్వం ఆశించింది. స్థానిక ఎమ్మెల్యే భాష్యం ప్రవీణ్ కూడా 2024లోనే ముఖ్యమంత్రికి లేఖ రాసి భూముల సమీకరణకు మద్దతు తెలిపారు. అప్పట్లో రైల్వే ప్రాజెక్టు, కేంద్రం భూములు స్వాధీనం చేసుకుంటుందనే ప్రచారం నేపథ్యంలో రైతులు పూలింగుపై ఆసక్తి చూపారు.
అయితే ప్రస్తుత సమాచారం ప్రకారం యండ్రాయి రెవెన్యూలో 291 ఎకరాలు, పెదమద్దూరులో 192 ఎకరాలు, కర్లపూడిలో 181 ఎకరాలు మాత్రమే పూలింగు కిందకు వచ్చాయి. ఇందులోనూ ఎక్కువ భూములు స్థానిక రైతులవి కాకుండా, పూలింగు కోసం ముందే కొనుగోలు చేసినవారివే కావడం గమనార్హం. నోటిఫికేషన్ సమయంలో జరిగిన గ్రామసభల్లో రైతులు కౌలు పరిహారం పెంపు, రుణమాఫీ, అవిభాజ్య హక్కుల సమస్యలు, గ్రామకంఠాల నిర్ధారణ వంటి అంశాలను ప్రస్తావించినప్పటికీ, వాటికి ఇప్పటివరకు స్పష్టమైన పరిష్కారం కనిపించలేదు.
అదనంగా రిటర్నబుల్ ప్లాట్లు ఎక్కడ, ఎలా కేటాయిస్తారు? ఒకేచోట ఇస్తారా లేక విడివిడిగా ఇస్తారా? అన్న అంశాలపై ప్రభుత్వ వైపు నుంచి స్పష్టత లేకపోవడం రైతుల్లో అనిశ్చితిని పెంచుతోంది. వడ్డమానులో రైతుల నిరసనలు కూడా చోటుచేసుకోవడం ఈ అసంతృప్తిని స్పష్టంగా చూపిస్తోంది. వేగంగా ముందుకు సాగుతుందని భావించిన ప్రాంతంలోనే భూ-సమీకరణ ప్రక్రియలో జాప్యం జరగడం అమరావతి ప్రాజెక్టుకు సవాలుగా మారిందనే అభిప్రాయం వ్యక్తమవుతోంది.
