చంద్రబాబు రైతులను కూడా మోసం చేశారు.. అన్నదాత సుఖీభవ ఎంతమందికి ఇచ్చారు?: సజ్జల ఫైర్

వైఎస్సార్ కాంగ్రెస్ పార్టీ (YSR Congress Party) రాష్ట్ర సమన్వయకర్త సజ్జల రామకృష్ణారెడ్డి (Sajjala Ramakrishna Reddy) రాష్ట్ర ప్రభుత్వంపై తీవ్ర విమర్శలు చేశారు. ముఖ్యమంత్రి చంద్రబాబు నాయుడు (Chandrababu Naidu) రైతులను(Farmers) కూడా మోసం చేశారని ఆరోపించారు. ముఖ్యంగా అన్నదాత సుఖీభవ పథకం కింద ఎంతమంది రైతులకు లబ్ధి అందిందో ప్రభుత్వం స్పష్టమైన లెక్కలు చెప్పడం లేదని మండిపడ్డారు.

వైఎస్సార్ కాంగ్రెస్ పార్టీకి రైతులు ఎంతో ముఖ్యమని సజ్జల తెలిపారు. పార్టీ పేరులోనే రైతు అనే పదం ఉందని గుర్తు చేశారు. మాజీ ముఖ్యమంత్రి వైఎస్ జగన్ మోహన్ రెడ్డి (YS Jagan Mohan Reddy) పాలనలో వ్యవసాయ రంగానికి ప్రత్యేక ప్రాధాన్యం ఇచ్చారని పేర్కొన్నారు.

ప్రస్తుతం రాష్ట్రంలో ఏ పంటకూ గిట్టుబాటు ధర (Remunerative Price) లేదని ఆయన విమర్శించారు. వ్యవసాయ రంగం తీవ్ర సంక్షోభంలో ఉందని, దళారులు మరియు అధికార పార్టీ నేతలు కలిసి రైతులను మోసం చేస్తున్నారని ఆరోపించారు.

వైఎస్ జగన్ పాలనలో రైతాంగ సమస్య ఏదైనా వెంటనే పరిష్కరించామని సజ్జల అన్నారు. కరోనా సమయంలో కూడా రైతు భరోసా నిధులు అందించామని గుర్తు చేశారు. రైతుల పట్ల తమ ప్రభుత్వానికి ఉన్న చిత్తశుద్ధిని ప్రజలు గుర్తుంచుకున్నారని చెప్పారు.

రైతులు ఇబ్బందులు పడుతున్న సమయంలో మంత్రి అచ్చెన్నాయుడు (Atchannaidu) సింగపూర్ పర్యటనలో ఉన్నారని సజ్జల విమర్శించారు. రైతాంగ సమస్యలను పక్కనపెట్టి ఇతర విషయాలపై మాట్లాడుతున్నారని అన్నారు.

రాష్ట్ర ప్రభుత్వం అమలు చేస్తున్న రైతు వ్యతిరేక విధానాలపై గట్టిగా పోరాడాలని పార్టీ శ్రేణులకు పిలుపునిచ్చారు. రైతులకు న్యాయం జరిగే వరకు వైఎస్సార్ కాంగ్రెస్ పార్టీ పోరాటం కొనసాగుతుందని స్పష్టం చేశారు.