శ్రీలంక (Sri Lanka) వేదికగా జూన్ నెలలో జరగనున్న వన్డే ట్రై-సిరీస్ (ODI Tri-Series) కోసం భారత క్రికెట్ నియంత్రణ మండలి (BCCI) ఇండియా-A (India-A) జట్టును ప్రకటించింది. ఈ త్రిముఖ పోరులో భారత్(India), శ్రీలంక(Sri Lanka), ఆఫ్ఘనిస్తాన్ (Afghanistan) దేశాల ‘ఏ’ జట్లు తలపడనున్నాయి. యువ ఆటగాళ్ల ప్రతిభను అంతర్జాతీయ స్థాయిలో పరీక్షించేందుకు ఈ సిరీస్ కీలకంగా మారనుంది. డాంబుల్లా వేదికగా జరగనున్న ఈ మ్యాచ్లు వైట్ బాల్ ఫార్మాట్లో అభిమానులకు మంచి ఉత్కంఠను అందించనున్నాయి.
ఈ సిరీస్కు యువ సంచలనం తిలక్ వర్మను (Tilak Varma) కెప్టెన్గా ఎంపిక చేయగా, రియాన్ పరాగ్ (Riyan Parag) వైస్ కెప్టెన్ బాధ్యతలు చేపట్టనున్నాడు. దేశవాళీ క్రికెట్లో అద్భుత ప్రదర్శనలు చేస్తున్న పలువురు యువ ఆటగాళ్లకు ఈ జట్టులో అవకాశం దక్కింది. ముఖ్యంగా వైభవ్ సూర్యవంశికి చోటు దక్కడం క్రికెట్ వర్గాల్లో ఆసక్తిని రేకెత్తిస్తోంది.
బ్యాటింగ్ విభాగంలో ప్రియాంశ్ ఆర్య, వైభవ్ సూర్యవంశి(Vaibhav Suryavanshi), అయుష్ బడోని వంటి ప్రతిభావంతులైన యువ ఆటగాళ్లు చోటు సంపాదించారు. అలాగే నిశాంత్ సింధు, హర్ష్ దుబే, సూర్యాంశ్ షెడ్జ్ వంటి ఆల్రౌండర్లకు కూడా అవకాశం లభించింది. వికెట్ కీపర్లుగా ప్రభ్సిమ్రన్ సింగ్, కుమార్ కుషాగ్ర ఎంపికయ్యారు.
బౌలింగ్ విభాగంలో యశ్ ఠాకూర్, యుధ్వీర్ సింగ్, అంశుల్ కాంబోజ్, అర్షద్ ఖాన్, విప్రాజ్ నిగం వంటి యువ బౌలర్లు తమ సత్తా చాటేందుకు సిద్ధమవుతున్నారు. భవిష్యత్తులో సీనియర్ టీమ్కు బలమైన బ్యాకప్ ఆటగాళ్లను తయారుచేసే దిశగా ఈ ట్రై-సిరీస్ ఎంతో కీలకంగా భావిస్తున్నారు.
