దేశవ్యాప్తంగా సామాన్య, మధ్యతరగతి ప్రజలకు (People) చమురు మార్కెటింగ్ సంస్థలు (Oil Marketing Companies) మరో భారీ షాక్ ఇచ్చాయి. అంతర్జాతీయ మార్కెట్లో ఒడిదొడుకులు కొనసాగుతున్నాయనే కారణంతో పెట్రోల్(Petrol), డీజిల్ (Diesel) ధరలను మళ్లీ భారీగా పెంచేశాయి. ఇప్పటికే వరుస ధరల పెంపులతో ఇబ్బందులు ఎదుర్కొంటున్న వాహనదారులపై ఈ తాజా నిర్ణయం మరింత భారంగా మారింది. ముఖ్యంగా గత 10 రోజుల వ్యవధిలోనే ఇది నాలుగోసారి ధరలు పెరగడం ప్రజల్లో తీవ్ర ఆగ్రహానికి దారితీస్తోంది.
ఈ రోజు ప్రకటించిన తాజా సవరణల ప్రకారం లీటర్ పెట్రోల్పై ₹2.84, లీటర్ డీజిల్పై ₹2.86 చొప్పున పెంపు చేశారు. పెరిగిన ధరలు ఈరోజు ఉదయం 6 గంటల నుంచే దేశవ్యాప్తంగా అమల్లోకి వచ్చాయి. దీంతో తెల్లవారుజామునే బంకులకు వెళ్లిన వాహనదారులు కొత్త రేట్లు చూసి షాక్కు గురయ్యారు. ఇప్పటికే అధిక ఖర్చులతో సతమతమవుతున్న ప్రజలకు ఈ పెంపు మరింత ఆర్థిక భారాన్ని మోపుతోంది.
ఒకేసారి ₹5 లేదా ₹6 వరకు ధరలు పెంచితే ప్రజల నుంచి తీవ్ర వ్యతిరేకత వచ్చే అవకాశం ఉందనే ఉద్దేశంతోనే చమురు సంస్థలు విడతల వారీగా ధరలు పెంచుతున్నాయనే విమర్శలు వినిపిస్తున్నాయి. ప్రతి 2 లేదా 3 రోజులకు ఒకసారి పైసల్లో కాకుండా ఏకంగా ₹2కు పైగా పెంపులు చేస్తూ ఉండటంతో ఇంధన ధరలు కొత్త రికార్డుల దిశగా పరుగులు తీస్తున్నాయి.
పెట్రోల్, డీజిల్ ధరల పెంపు (Price Hike) ప్రభావం కేవలం వాహనదారులకే (Vehicle Owners) పరిమితం కాదు. రవాణా ఖర్చులు (Transportation Costs) పెరగడం వల్ల మార్కెట్కు వచ్చే కూరగాయలు, పప్పులు, పాలు, ఇతర నిత్యావసర వస్తువుల ధరలు (Essential Commodities) కూడా పెరిగే అవకాశాలు కనిపిస్తున్నాయి. దీంతో ఇప్పటికే పెరిగిన జీవన వ్యయంతో ఇబ్బంది పడుతున్న ప్రజలపై మరో అదనపు భారం పడనుంది.
