ప్రధానమంత్రి నరేంద్ర మోదీ (Narendra Modi) అధ్యక్షతన జరిగిన ఆర్థిక వ్యవహారాల కేబినెట్ కమిటీ సమావేశంలో ఆంధ్రప్రదేశ్ (Andhra Pradesh) రాజధాని అమరావతిలో (Amaravati) కేంద్ర ప్రభుత్వ జనరల్ పూల్ ఆఫీస్ అకామడేషన్ (General Pool Office Accommodation) నిర్మాణానికి రూ.1,299.08 కోట్ల వ్యయంతో ఆమోదం లభించింది. సుమారు 5.53 ఎకరాల విస్తీర్ణంలో 23.25 లక్షల చదరపు అడుగుల నిర్మాణంతో ఈ ప్రాజెక్టు రూపుదిద్దుకోనుంది. రెండు భారీ కార్యాలయ భవనాలు, సుమారు 8,000 మంది అధికారులు, ఉద్యోగులకు అవసరమైన వసతులు, 1,800 కార్ల పార్కింగ్, బ్యాంకు, పోస్టాఫీస్, కాన్ఫరెన్స్ హాల్, మల్టీపర్పస్ హాల్, క్యాంటీన్లు వంటి ఆధునిక సదుపాయాలతో ఈ ప్రాజెక్టును కేంద్ర ప్రభుత్వం రూపొందిస్తోంది.
అత్యున్నత గ్రీన్ బిల్డింగ్ (Green Building) ప్రమాణాలకు అనుగుణంగా నిర్మించబడనున్న ఈ ప్రాజెక్టు కనీసం గ్రీన్ రేటింగ్ ఫర్ ఇంటిగ్రేటెడ్ హ్యాబిటాట్ అసెస్మెంట్ (GRIHA) 4-స్టార్ రేటింగ్ సాధించేలా ప్రణాళిక రూపొందించారు. శక్తి సామర్థ్యం, నీటి సంరక్షణ, పర్యావరణ పరిరక్షణ, దివ్యాంగులకు అనుకూలమైన అవరోధ రహిత నిర్మాణం వంటి అంశాలకు ప్రత్యేక ప్రాధాన్యం ఇవ్వబడింది. నిర్మాణ దశలో ఏటా సుమారు 7 లక్షల పనిదినాలు, అనంతరం ప్రతి సంవత్సరం మరో 50 వేల పనిదినాల ఉపాధి అవకాశాలు లభిస్తాయని అంచనా వేస్తున్నారు.
అయితే ఈ కేంద్ర ప్రాజెక్టు వ్యయం వెలుగులోకి రావడంతో అమరావతిలో రాష్ట్ర ప్రభుత్వం చేపడుతున్న నిర్మాణాల ఖర్చులపై మరోసారి చర్చ మొదలైంది. కేంద్ర ప్రభుత్వం సుమారు చదరపు అడుగుకు రూ.5 వేల లోపే ఆధునిక కార్యాలయాలు, నివాస సముదాయాలను నిర్మిస్తున్నట్లు లెక్కలు సూచిస్తుండగా, రాష్ట్ర ప్రభుత్వం అదే అమరావతిలో చేపడుతున్న కొన్ని ప్రభుత్వ భవనాలకు చదరపు అడుగుకు రూ.20 వేలకుపైగా ఖర్చు అవుతుందనే ఆరోపణలు రాజకీయ వర్గాల్లో వినిపిస్తున్నాయి.
ఈ నేపథ్యంలో అమరావతి నిర్మాణ వ్యయాలపై పారదర్శకత, టెండర్ విధానాలు, అంచనా ఖర్చులపై ప్రభుత్వం స్పష్టత ఇవ్వాలనే డిమాండ్లు బలపడుతున్నాయి. కేంద్రం తక్కువ వ్యయంతో భారీ నిర్మాణాలను చేపడుతుండగా, రాష్ట్ర ప్రాజెక్టుల వ్యయం ఎందుకు అధికంగా ఉందనే ప్రశ్నలు మరోసారి ప్రజా చర్చకు దారితీశాయి. అమరావతి అభివృద్ధి పేరుతో జరుగుతున్న ఖర్చులపై సమగ్ర వివరాలు వెల్లడించాలని ప్రతిపక్షాలు, రాజకీయ విశ్లేషకులు కోరుతున్నారు.
