మాకు అధికారం ఉంది… మేము తలచుకుంటే నరికేయగలం – బుచ్చయ్య చౌదరి అనుచిత వాఖ్యలు

ఆంధ్రప్రదేశ్ రాజకీయ వాతావరణం మళ్లీ ఉద్రిక్తంగా మారుతోంది. సీనియర్ తెలుగుదేశం పార్టీ నాయకుడు, రాజమహేంద్రవరం రూరల్ ఎమ్మెల్యే గోరంట్ల బుచ్చయ్యచౌదరి చేసిన వ్యాఖ్యలు రాజకీయ రంగంలో తీవ్ర చర్చకు దారి తీస్తున్నాయి. “మాకు అధికారం ఉంది… మేము తలచుకుంటే నరికేయగలం” అనే వ్యాఖ్యలు కేవలం మాటల పరిమితిలోనే ఉండకుండా, రాష్ట్ర రాజకీయ సంస్కృతిపై ప్రశ్నలను లేవనెత్తుతున్నాయి.

ఈ వ్యాఖ్యలపై వైసీపీ నాయకులతో పాటు పౌర సమాజం కూడా తీవ్ర ఆందోళన వ్యక్తం చేస్తోంది. కూటమి ప్రభుత్వం అధికారంలోకి వచ్చినప్పటి నుంచి “రెడ్ బుక్ పాలన” పేరుతో ప్రత్యర్థి పార్టీల కార్యకర్తలపై వేధింపులు, దాడులు, హత్యలు పెరిగాయని విమర్శలు వినిపిస్తున్నాయి. ప్రజాస్వామ్యంలో మాటల స్వేచ్ఛ, రాజకీయ భిన్నాభిప్రాయాలకు స్థానం ఉండాల్సిన సమయంలో, ఇలాంటి బెదిరింపులు రాజకీయ సంస్కృతిని దిగజార్చుతున్నాయని అభిప్రాయాలు వెల్లువెత్తుతున్నాయి.

గోరంట్ల బుచ్చయ్యచౌదరి చేసిన వ్యాఖ్యలు ప్రత్యేకంగా మాజీ మంత్రి అంబటి రాంబాబును లక్ష్యంగా చేసుకుని ఉండటం మరింత వివాదాస్పదమైంది. “మా కార్యకర్తలు తలచుకుంటే గుమ్మం దాటలేరు” వంటి వ్యాఖ్యలు కార్యకర్తలను రెచ్చగొట్టేలా ఉన్నాయని విమర్శకులు చెబుతున్నారు. ఇలాంటి వ్యాఖ్యలు ఇప్పటికే ఉద్రిక్తంగా ఉన్న రాజకీయ వాతావరణాన్ని మరింత విషమం చేసే ప్రమాదం ఉందని హెచ్చరిస్తున్నారు.

వైసీపీ నేతలు ఈ వ్యాఖ్యలకు గట్టిగా కౌంటర్ ఇస్తూ, తెలుగుదేశం పాలనలో హింసాత్మక రాజకీయాలకు చరిత్ర ఉందని ఆరోపిస్తున్నారు. వంగవీటి రంగా, పింగళి దశరథరాం, వైఎస్ రాజారెడ్డి వంటి నాయకుల హత్యలను ఉదాహరణగా చూపిస్తూ, హింసాత్మక రాజకీయాలు టీడీపీకి కొత్తవి కావని చెబుతున్నారు. అలాగే గతంలో ఎన్టీఆర్‌పై జరిగిన అవమానాలు, ఇతర ఘటనలను ప్రస్తావిస్తూ ద్వంద్వ వైఖరిని ప్రశ్నిస్తున్నారు.

ఇటీవలి 21 నెలల్లో రాష్ట్రంలో జరిగిన రాజకీయ హత్యల జాబితాను కూడా వైసీపీ నాయకులు ప్రస్తావిస్తున్నారు. పల్నాడు నుంచి శ్రీకాకుళం వరకు, నంద్యాల నుంచి ప్రకాశం వరకు పలు జిల్లాల్లో వైసీపీ కార్యకర్తలు—మందా సాల్మన్, కురుబ లింగమయ్య, రషీద్, సత్తారు గోపి, పెద్ద సుబ్బారాయుడు, గాలి బ్రహ్మయ్య, సుధాకర్ రెడ్డి—హత్యలకు గురయ్యారని ఆరోపిస్తున్నారు. ఈ ఘటనలు యాదృచ్ఛికం కాదని, వ్యవస్థాత్మకంగా జరుగుతున్నాయని వారు అంటున్నారు.

అంతేకాక, 2014–19 మధ్యకాలంలో కూడా బొగ్గవరపు వాసు, గజ్జెల రామిరెడ్డి, ఇందూరి ప్రభాకర్ రెడ్డి, పత్తికొండ వైసీపీ ఇన్‌చార్జ్ నారాయణరెడ్డి, బంకా నాగభూషణ రెడ్డి, అల్లం నరేంద్ర ఇలా అనేక మంది వైసీపీ కార్యకర్తలపై జరిగిన హత్యలను గుర్తుచేస్తూ, టీడీపీ పాలనలో రాజకీయ హింస ఒక నిరంతర సమస్యగా కొనసాగుతోందని పేర్కొంటున్నారు. ఈ నేపథ్యంలో ప్రస్తుతం జరుగుతున్న వ్యాఖ్యలు మరియు ఘటనలు రాష్ట్రంలో ప్రజాస్వామ్య విలువలు ఎంతవరకు కాపాడబడుతున్నాయనే ప్రశ్నను ముందుకు తెస్తున్నాయి.

రాజకీయాలు ప్రజల సేవ కోసం ఉండాలి గానీ, ప్రతీకారాల వేదికగా మారకూడదు. అధికారంలో ఉన్నవారు మరింత బాధ్యతతో వ్యవహరించాలి. లేకపోతే ప్రజల్లో భయం, అసంతృప్తి పెరిగి ప్రజాస్వామ్య వ్యవస్థపై నమ్మకం దెబ్బతినే ప్రమాదం ఉంది. ప్రత్యర్థి పార్టీలపై గొడ్డలి, కత్తి, బాకు అంటూ బ్రాండింగ్ చేస్తూ, దాని మాటున హింసాత్మక రాజకీయాలను కొనసాగించాలని ప్రయత్నిస్తే ప్రజలు అన్నింటినీ గమనిస్తూనే ఉంటారు. టీడీపీ “రెడ్ బుక్” రాజకీయాలను మానుకుని ప్రజాస్వామ్యబద్ధంగా పరిపాలన చేయాలని ప్రజలు, పౌర సమాజం అభిప్రాయపడుతోంది.