జంతర్ మంతర్ వద్ద నిరసనకు ముందే ఢిల్లీ పోలీసులు నిర్బంధించిన కాక్రోచ్ జనతా పార్టీ నేతలు అభిజీత్ దీప్కే, ఆశుతోష్ రంకా, సౌరవ్ దాస్‌కు ఊరట లభించింది. ఆదివారం ప్రత్యేక ఎగ్జిక్యూటివ్ మేజిస్ట్రేట్ కోర్టు ఆదేశాలతో ముగ్గురు నేతలు పోలీసుల నిర్బంధం నుంచి విడుదలయ్యారు. అయితే, రాబోయే ఏడాది పాటు శాంతిభద్రతలకు భంగం కలిగించే కార్యకలాపాల్లో పాల్గొనకూడదని కోర్టు షరతు విధించింది.
ప్రధాన ఎన్నికల కమిషనర్ జ్ఞానేశ్ కుమార్ రాజీనామా చేయాలని డిమాండ్ చేస్తూ CJP నేతలు ఢిల్లీలోని జంతర్ మంతర్ వద్ద నిరసన చేపట్టాలని నిర్ణయించారు. అయితే, ఈ నిరసనకు ఢిల్లీ పోలీసులు అనుమతి నిరాకరించారు. అక్టోబర్ 10న ముంబై నుంచి న్యూఢిల్లీకి వచ్చిన విమానం దిగిన కొద్దిసేపటికే ముగ్గురు నేతలను పోలీసులు అదుపులోకి తీసుకున్నట్లు సమాచారం. విమానంలోకి ప్రవేశించిన పోలీసులు, వారు బయటకు రాకముందే నిర్బంధించినట్లు పోలీసు వర్గాలు తెలిపాయి.
ఆదివారం ఉదయం ముగ్గురు నేతలను ప్రత్యేక ఎగ్జిక్యూటివ్ మేజిస్ట్రేట్ ఎదుట హాజరుపరచగా, వారిని విడుదల చేయాలని కోర్టు ఆదేశించింది. ఎన్నికల సంఘం పనితీరుపై తమ అభ్యంతరాలను వ్యక్తం చేస్తూ, ప్రధాన ఎన్నికల కమిషనర్ రాజీనామాను డిమాండ్ చేసేందుకు CJP ఈ నిరసనకు పిలుపునిచ్చింది. తాజా పరిణామాలతో ఢిల్లీలో ప్రతిపాదిత నిరసన చుట్టూ నెలకొన్న వివాదం మరో మలుపు తిరిగింది.
