టాలీవుడ్ యువ హీరో కిరణ్ అబ్బవరం (Kiran Abbavaram) వరుస సినిమాలతో బిజీగా కొనసాగుతున్నారు. నటుడిగా, నిర్మాతగా తనదైన గుర్తింపు తెచ్చుకున్న ఆయన.. ఇప్పుడు దర్శకుడిగానూ కొత్త ప్రయాణాన్ని ప్రారంభిస్తున్నారు. తన కెరీర్‌లో 13వ సినిమాకు స్వయంగా దర్శకత్వం (Direction) వహిస్తున్న కిరణ్.. ఈ చిత్రానికి ‘రియాలిటీ’(Reality) అనే టైటిల్‌ను ఖరారు చేశారు.
తాజాగా ‘రియాలిటీ’ టైటిల్ గ్లింప్స్‌ను (Title Glimpse) చిత్రబృందం విడుదల చేసింది. ఈ గ్లింప్స్‌ను బట్టి సినిమా విభిన్నమైన కాన్సెప్ట్‌తో పాటు హృదయాన్ని హత్తుకునే భావోద్వేగాలు, కుటుంబ అంశాలతో తెరకెక్కుతున్నట్లు తెలుస్తోంది. గ్లింప్స్‌తోనే సినిమా విడుదల తేదీని కూడా మేకర్స్ ప్రకటించారు.
డిసెంబర్ 25న ‘రియాలిటీ’ చిత్రాన్ని ప్రపంచవ్యాప్తంగా గ్రాండ్‌గా థియేటర్లలో విడుదల చేయనున్నట్లు చిత్రబృందం వెల్లడించింది. దీంతో కిరణ్ అబ్బవరం సినిమా క్రిస్మస్ రేసులోకి (Christmas Race) అడుగుపెట్టింది. డిసెంబర్ 24న నందమూరి బాలకృష్ణ నటిస్తున్న ‘దాదా’, నాగార్జున నటిస్తున్న ‘కింగ్ 100’ సినిమాలు కూడా ప్రేక్షకుల ముందుకు రానున్నాయి.
ఓవర్సీస్ డిస్ట్రిబ్యూటర్‌గా కొనసాగుతున్న సుధాకర్ చాగంటి (Sudhakar Chaganti) ‘రియాలిటీ’ సినిమాతో నిర్మాతగా మారుతున్నారు. జాయ్ ఫిల్మ్స్ బ్యానర్‌పై ఈ చిత్రాన్ని నిర్మిస్తున్నారు. భీమ్స్ సిసిరోలియో (Bheems Ceciroleo) సంగీతం అందిస్తున్న ఈ సినిమా ప్రస్తుతం షూటింగ్ దశలో ఉంది.
దర్శకుడిగా కిరణ్ అబ్బవరం ఎలా మెప్పిస్తారనే ఆసక్తి అభిమానుల్లో నెలకొంది. నటుడిగా ఇప్పటికే తనకంటూ ప్రత్యేక గుర్తింపు తెచ్చుకున్న కిరణ్.. ‘రియాలిటీ’తో దర్శకుడిగా ఎలాంటి కొత్త అనుభూతిని అందిస్తారో చూడాలి.
