దక్షిణ అమెరికా (South America) దేశమైన వెనెజువెలాను (Venezuela) వరుసగా సంభవించిన రెండు(Two) భారీ భూకంపాలు (Earthquakes) వణికించాయి. రాజధాని కరాకస్కు (Caracas) పశ్చిమంగా కేవలం 39 సెకన్ల వ్యవధిలోనే రిక్టర్ స్కేలుపై 7.2, అనంతరం 7.5 తీవ్రతతో రెండు భూకంపాలు నమోదైనట్లు అమెరికా భూగర్భ సర్వే (United States Geological Survey – USGS) వెల్లడించింది. ప్రకంపనలతో కరాకస్తో పాటు పలు నగరాల్లో భవనాలు (Buildings) కూలిపోగా, వందలాది మంది శిథిలాల కింద చిక్కుకున్నట్లు సమాచారం.
భూకంపాల తీవ్రత దృష్ట్యా భారీ ప్రాణనష్టం సంభవించే అవకాశం ఉందని శాస్త్రవేత్తలు హెచ్చరిస్తున్నారు. ప్రాథమిక అంచనాల ప్రకారం మరణాల సంఖ్య 10 వేల నుంచి 1 లక్ష వరకు చేరే ప్రమాదం ఉందని అమెరికా భూగర్భ సర్వే పేర్కొంది. సహాయక చర్యలు కొనసాగుతుండటంతో తుది నష్టం వివరాలు ఇంకా వెల్లడికాలేదు.
ప్రభుత్వం దేశవ్యాప్తంగా అత్యవసర పరిస్థితిని ప్రకటించి సహాయక బృందాలను (Rescue Teams) రంగంలోకి దింపింది. శిథిలాల (Rubble) కింద చిక్కుకున్న వారిని రక్షించేందుకు యుద్ధ ప్రాతిపదికన గాలింపు చర్యలు కొనసాగుతున్నాయి. చాకావో ప్రాంతంలో రెండు భారీ భవనాలు పూర్తిగా కూలిపోయినట్లు స్థానిక అధికారులు తెలిపారు.
భూకంపం సమయంలో జాతీయ సెలవు కారణంగా ఎక్కువ మంది ఇళ్లలోనే ఉండటంతో ప్రజలు తీవ్ర భయాందోళనకు గురయ్యారు. ప్రత్యక్ష సాక్షులు భయానక ప్రకంపనలతో ఇళ్ల నుంచి రోడ్లపైకి పరుగులు తీశామని తెలిపారు. పలువురు గతంలో ఎన్నడూ ఇలాంటి భూకంపాన్ని చూడలేదని ఆవేదన వ్యక్తం చేశారు.
కరాకస్లోని ప్రధాన ఆసుపత్రులకు (Major Hospitals) భారీ సంఖ్యలో క్షతగాత్రులను తరలిస్తుండగా, వైద్య సేవలను ప్రభుత్వం విస్తరించింది. మరోవైపు కరాకస్ అంతర్జాతీయ విమానాశ్రయంలో నష్టం సంభవించడంతో విమాన సేవలకు అంతరాయం ఏర్పడినట్లు సమాచారం. తీరప్రాంత నగరాల్లో కూడా భారీ ఆస్తి నష్టం నమోదైంది.
భూకంపం అనంతరం ప్యూర్టో రికో(Puerto Rico), వర్జిన్ దీవులు(Virgin Islands), అరుబా(Aruba), బొనైర్ (Bonaire) ప్రాంతాలకు సునామీ హెచ్చరికలు జారీ చేసిన అధికారులు, అనంతరం వాటిని ఉపసంహరించుకున్నారు. ప్రస్తుతం వెనెజువెలాలో సహాయక చర్యలు కొనసాగుతుండగా, ప్రాణనష్టం, ఆస్తి నష్టంపై పూర్తి వివరాలు ఇంకా వెలువడాల్సి ఉంది.
