ఆంధ్రప్రదేశ్లో (Andhra Pradesh) మెగా డీఎస్సీ నియామకాలపై (Mega DSC Recruitment) మరోసారి రాజకీయ వేడి రాజుకుంది. డీఎస్సీ రిక్రూట్మెంట్లో భారీ స్థాయిలో అక్రమాలు జరిగాయని, ఈ వ్యవహారం లక్షలాది మంది నిరుద్యోగుల జీవితాలతో ఆటలాడిందని వైఎస్సార్సీపీ(YSRCP) అధినేత, మాజీ ముఖ్యమంత్రి వైఎస్ జగన్ మోహన్రెడ్డి(Y. S. Jagan Mohan Reddy) తీవ్ర ఆరోపణలు చేశారు. గురువారం తాడేపల్లిలోని పార్టీ కేంద్ర కార్యాలయంలో మీడియాతో మాట్లాడిన ఆయన చంద్రబాబు ప్రభుత్వంపై తీవ్ర స్థాయిలో విమర్శలు గుప్పించారు.
చంద్రబాబు పాలన (Chandrababu Administration) మొత్తం మోసాలు (Frauds), అబద్ధాలు(Lies), స్కాములతో (Scams) నిండిపోయిందని జగన్ విమర్శించారు. వెన్నుపోటు, మోసానికి రూపం ఇస్తే అది చంద్రబాబేనని వ్యాఖ్యానించారు. అధికారంలోకి వచ్చిన వెంటనే తొలి సంతకం (First Signature) పేరుతో ప్రజలను మోసం చేశారని, మెగా డీఎస్సీ పేరుతో మరో పెద్ద స్కామ్కు తెరలేపారని ఆరోపించారు. లక్షలాది మంది నిరుద్యోగ యువత నమ్మకాన్ని చంద్రబాబు (Chandrababu), నారా లోకేశ్ (Nara Lokesh) వమ్ము చేశారని మండిపడ్డారు.
ఆంధ్రప్రదేశ్ (Andhra Pradesh) చరిత్రలో ఇంత దారుణంగా ఉద్యోగ నియామకాలు ఎప్పుడూ జరగలేదని జగన్ పేర్కొన్నారు. తమ ప్రభుత్వ హయాంలోనే 6,100 పోస్టులకు నోటిఫికేషన్ విడుదల చేశామని, కానీ ఆ నియామకాలను కావాలనే నిలిపివేసి, ఆ తర్వాత కొత్త నోటిఫికేషన్ తీసుకొచ్చారని విమర్శించారు. ఇదే చంద్రబాబు తొలి సంతకం అసలు స్వరూపమని అన్నారు.
మెగా డీఎస్సీ అంటూ పెద్ద ఎత్తున ప్రచారం చేసుకున్నారని, కానీ 16 వేల పోస్టుల భర్తీలోనే లీకులు, అవకతవకలు బయటపడుతున్నాయని జగన్ వ్యాఖ్యానించారు. అసలు దీనిని మెగా డీఎస్సీ అని పిలిచే అర్హతే లేదన్నారు. వైఎస్సార్సీపీ ప్రభుత్వంలో లక్షలాది మంది ఉద్యోగ పరీక్షలు రాసినా ఒక్క తప్పు కూడా జరగలేదని గుర్తుచేశారు.
దేశ చరిత్రలోనే ఒకే ఏడాది, ఒకే నోటిఫికేషన్ ద్వారా 1.30 లక్షల ఉద్యోగాలను భర్తీ చేసిన ఘనత వైఎస్సార్సీపీ ప్రభుత్వానిదేనని జగన్ తెలిపారు. గ్రామ స్వరాజ్యం, సుపరిపాలన లక్ష్యంగా తీసుకున్న ఆ నిర్ణయం ఉద్యోగాల చరిత్రలో సువర్ణ అధ్యాయమని చెప్పారు. అది ఎవరూ బద్దలు కొట్టలేని రికార్డని పేర్కొన్నారు.
మే 30, 2019న ముఖ్యమంత్రిగా ప్రమాణస్వీకారం చేసిన తర్వాత కేవలం 50 రోజుల్లోనే జూలై 19న జీవో(GO) జారీ చేశామని జగన్ వివరించారు. జూలై 25 నుంచి 27 మధ్య నోటిఫికేషన్లు విడుదల చేసి, జూలై 27 నుంచి ఆగస్టు 10 వరకు దరఖాస్తులు స్వీకరించామని చెప్పారు. సెప్టెంబర్ 1 నుంచి 8 వరకు పరీక్షలు నిర్వహించామని గుర్తుచేశారు.
మొత్తం 2,800 పరీక్షా కేంద్రాల్లో 19 లక్షల మంది అభ్యర్థులు పరీక్షలు రాశారని జగన్ తెలిపారు. ఎక్కడా ఒక్క తప్పు జరగకుండా, అత్యంత పారదర్శకంగా నియామకాలు చేపట్టామని చెప్పారు. 1.30 లక్షల శాశ్వత ఉద్యోగాలను ఇచ్చామని, ప్రస్తుతం ఆ ఉద్యోగులు గ్రామాల్లో ప్రజలకు సేవలు అందిస్తున్నారని పేర్కొన్నారు. అక్టోబర్ 2 గాంధీ జయంతి (Gandhi Jayanti) నాటికి మొత్తం ప్రక్రియ పూర్తి చేశామని తెలిపారు.
కేవలం 4 నెలల్లోనే ఎలాంటి లోపాలు లేకుండా చరిత్ర సృష్టించామని జగన్ అన్నారు. కానీ ప్రస్తుతం మెగా డీఎస్సీ పేరుతో 16 వేల ఉద్యోగాల భర్తీ ప్రక్రియలో గందరగోళం నెలకొందని విమర్శించారు. ఈ నియామకాల కారణంగా ఎన్నో కుటుంబాలు ఆవేదనకు గురవుతున్నాయని, నిరుద్యోగులు కన్నీళ్లు పెడుతున్నారని చంద్రబాబును నిలదీశారు.
