“రాజకీయం పార్ట్ టైమ్ కాదు”… రాహుల్ గాంధీ నాయకత్వంపై ప్రణబ్ ముఖర్జీ కుమార్తె శర్మిష్టా ఘాటు విమర్శలు

మాజీ రాష్ట్రపతి (Former President) ప్రణబ్ ముఖర్జీ (Pranab Mukherjee) కుమార్తె శర్మిష్టా ముఖర్జీ (Sharmistha Mukherjee) కాంగ్రెస్ అగ్రనేత రాహుల్ గాంధీ (Rahul Gandhi) నాయకత్వంపై తీవ్ర విమర్శలు గుప్పించారు. రాజకీయాలు (Politics) కొంతకాలం ప్రజల్లో కనిపించి, మళ్లీ కనిపించకుండా పోయే వ్యవహారం కాదని ఆమె స్పష్టం చేశారు. రాజకీయం అనేది 24 గంటలు, ఏడాది పొడవునా ప్రజలతో మమేకమై కొనసాగాల్సిన పూర్తి సమయ బాధ్యత అని పేర్కొన్నారు. ఒక మీడియా సంస్థకు ఇచ్చిన ఇంటర్వ్యూలో ఆమె ఈ వ్యాఖ్యలు చేశారు.

2014లో రాహుల్ గాంధీ కాంగ్రెస్ ప్రధాన నాయకత్వ బాధ్యతలు చేపట్టిన తర్వాత పార్టీ వరుస ఎన్నికల్లో ఆశించిన ఫలితాలు సాధించలేకపోయిందని శర్మిష్టా (Sharmistha Mukherjee) అన్నారు. ఈ పరాజయాలకు నాయకత్వ వైఫల్యం కూడా ఒక ప్రధాన కారణంగా పరిగణించాల్సి ఉంటుందని ఆమె అభిప్రాయపడ్డారు. ప్రజల విశ్వాసాన్ని తిరిగి సంపాదించడంలో కాంగ్రెస్ (Congress) ఇప్పటికీ సఫలీకృతం కాలేదని వ్యాఖ్యానించారు.

2024 లోక్‌సభ ఎన్నికలకు ముందు చేపట్టిన భారత్ జోడో యాత్ర (Bharat Jodo Yatra) కాంగ్రెస్‌కు కొంత రాజకీయ ప్రయోజనం చేకూర్చిందని ఆమె అంగీకరించారు. అయితే యాత్రలు, భారీ కార్యక్రమాల్లో మాత్రమే రాహుల్ గాంధీ (Rahul Gandhi) కనిపించి, ఆ తర్వాత ప్రజలకు అందుబాటులో లేకపోవడం నాయకత్వానికి సరైన విధానం కాదని విమర్శించారు. భారత్ జోడో యాత్ర మొదటి వార్షికోత్సవ సమయంలో రాహుల్ గాంధీ ఎక్కడ ఉన్నారని ప్రశ్నించారు.

రాజకీయ నాయకుడు కేవలం 2 రోజులు ప్రజల్లో తిరిగి, సభల్లో ప్రసంగించి, తర్వాత ఎక్కువకాలం ప్రజలకు దూరంగా ఉండకూడదని శర్మిష్టా అన్నారు. ప్రజలతో నిరంతర సంబంధం కొనసాగిస్తూ వారి సమస్యలను తెలుసుకోవడం, ప్రతి సందర్భంలో అందుబాటులో ఉండడం నాయకత్వ లక్షణమని ఆమె అభిప్రాయపడ్డారు.

కాంగ్రెస్ పార్టీ స్వంత సంస్థాగత బలాన్ని పెంచుకోవడం కంటే, ఇతర పార్టీలతో పొత్తులపై ఎక్కువగా ఆధారపడుతోందని శర్మిష్టా ఆరోపించారు. తాను కాంగ్రెస్‌లో పనిచేసిన సమయంలో కూడా పార్టీని బలోపేతం చేసే ప్రయత్నాల కంటే, ఎన్నికల్లో పొత్తుల ద్వారా విజయం సాధించాలనే ఆలోచనకే అధిక ప్రాధాన్యం ఇచ్చేవారని తెలిపారు. దీర్ఘకాలంలో ఈ విధానం పార్టీకి మేలు చేయదని ఆమె అభిప్రాయపడ్డారు.

ప్రధాని నరేంద్ర మోదీ (Narendra Modi) దేశవ్యాప్తంగా ప్రజాదరణ పొందిన నాయకుడిగా ఎదిగారని, ప్రజలు ఆయనకు స్పష్టమైన మెజారిటీతో పాలన చేసే అవకాశం కల్పించారని శర్మిష్టా పేర్కొన్నారు. అదే స్థాయిలో కాంగ్రెస్‌కు ప్రజా మద్దతు తీసుకురావడంలో రాహుల్ గాంధీ విఫలమయ్యారని ఆమె విమర్శించారు. బలమైన ప్రత్యామ్నాయంగా నిలవాలంటే కాంగ్రెస్ ముందుగా తన సంస్థాగత శక్తిని పెంచుకోవాల్సిన అవసరం ఉందని సూచించారు.

రాహుల్ గాంధీ(Rahul Gandhi), ప్రియాంకా గాంధీ (Priyanka Gandhi) నాయకత్వాన్ని పరస్పరం పోల్చడం తనకు ఇష్టం లేదని శర్మిష్టా స్పష్టం చేశారు. అయితే కాంగ్రెస్ భవిష్యత్తు కోసం పార్టీ పూర్తి స్థాయిలో ప్రజల మధ్య పనిచేసే నాయకత్వాన్ని నిర్మించుకోవడం అత్యవసరమని ఆమె అభిప్రాయపడ్డారు.