తమిళనాడు ప్రభుత్వం (Tamil Nadu Government) ప్రభుత్వ పాఠశాలల్లో (Government Schools) విద్యార్థుల (Students) హాజరు శాతాన్ని పెంచడంతో పాటు వారికి మరింత పోషకాహారం అందించే దిశగా కొత్త ఆలోచన చేస్తోంది. ఇప్పటికే దేశానికి ఆదర్శంగా నిలిచిన మిడ్డే మీల్ పథకాన్ని (Mid-Day Meal Scheme) మరింత ఆకర్షణీయంగా మార్చేందుకు వారానికి 1 రోజు చికెన్ బిర్యానీని (Chicken Biryani) మెనూలో చేర్చే ప్రతిపాదనను అధికారులు పరిశీలిస్తున్నట్లు సమాచారం. ప్రస్తుతం విద్యార్థులకు గుడ్లు, పండ్లు, పాలు వంటి పోషకాహారాన్ని అందిస్తున్న ప్రభుత్వం, చికెన్ బిర్యానీని (Chicken Biryani) కూడా చేర్చడం ద్వారా అవసరమైన ప్రోటీన్లు, ఇతర పోషకాలు మరింతగా అందుతాయని భావిస్తున్నట్లు తెలుస్తోంది.
ఈ ప్రతిపాదన అమల్లోకి వస్తే ప్రభుత్వ పాఠశాలలపై విద్యార్థులు(Students), తల్లిదండ్రుల్లో(Parents) మరింత ఆసక్తి పెరిగే అవకాశముందని విద్యాశాఖ వర్గాలు అంచనా వేస్తున్నాయి. ముఖ్యంగా ప్రభుత్వ పాఠశాలల్లో చేరికలు పెరగడంతో పాటు రోజువారీ హాజరు శాతం కూడా మెరుగుపడే అవకాశం ఉందని అధికారులు భావిస్తున్నారు. అదే సమయంలో విద్యార్థుల ఆరోగ్య పరిస్థితి కూడా మెరుగవుతుందని అభిప్రాయపడుతున్నారు.
అయితే ప్రస్తుతం ఇది కేవలం పరిశీలన దశలో ఉన్న ప్రతిపాదన మాత్రమేనని, దీనిపై ఇంకా ఎలాంటి తుది నిర్ణయం తీసుకోలేదని సమాచారం. చికెన్ బిర్యానీని మిడ్డే మీల్లో చేర్చేందుకు అయ్యే వ్యయభారం, అమలు విధానం, సరఫరా వ్యవస్థ వంటి అంశాలపై సమగ్ర అధ్యయనం చేసిన తర్వాతే ప్రభుత్వం అధికారికంగా నిర్ణయం ప్రకటించే అవకాశం ఉందని తెలుస్తోంది.
ఈ ప్రతిపాదనకు ప్రభుత్వం గ్రీన్ సిగ్నల్ ఇస్తే దేశవ్యాప్తంగా మిడ్డే మీల్ పథకంలో ఇది మరో వినూత్న అడుగుగా నిలిచే అవకాశముందని విశ్లేషకులు అభిప్రాయపడుతున్నారు. విద్యార్థుల పోషకాహారం, హాజరు శాతం పెంపు లక్ష్యంగా తీసుకొస్తున్న ఈ నిర్ణయం అమలైతే దేశంలోని ఇతర రాష్ట్రాలు కూడా ఇదే తరహా విధానాన్ని పరిశీలించే అవకాశం ఉందని భావిస్తున్నారు.
