ఇరాన్ కమాండర్ సంచలన ప్రకటన.. అమెరికా సైనికుడిని పట్టుకున్నా, చంపినా భారీ బహుమతి..!

అమెరికా(US), ఇరాన్(Iran) మధ్య ఉద్రిక్తతలు మరింత ముదురుతున్న వేళ ఇరాన్ సైనిక కమాండర్(Iranian Military Commander) అమీర్ హతామీ (Amir Hatami) చేసినట్లు చెబుతున్న ఓ ప్రకటన సంచలనంగా మారింది. అమెరికా సైనికుడిని(US Soldier) పట్టుకున్నా లేదా చంపినా 30,000 అమెరికన్ డాలర్ల (30,000 US Dollars) బహుమతి అందిస్తామని ఆయన ప్రకటించినట్లు వార్తలు వెలువడ్డాయి.

ఇరాన్‌కు చెందిన తస్నిమ్ వార్తా సంస్థ (Tasnim News Agency) ప్రకారం.. ఆగస్టు 16న టెహ్రాన్‌లో (Tehran) ప్రసంగించిన అమీర్ హతామీ ఈ వ్యాఖ్యలు చేశారు. అమెరికా సైనికుడిని పట్టుకోవడం లేదా చంపడం జరిగితే ఇరాన్ ప్రజల తరఫున ఈ బహుమతి అందిస్తామని పేర్కొన్నట్లు రాయిటర్స్ (Reuters) నివేదించింది. ఈ మొత్తం సుమారు 5 బిలియన్ ఇరానియన్ టోమన్‌లకు సమానమని సమాచారం.

శాంతి చర్చల్లో పురోగతి లేకుండానే..

అమెరికా, ఇరాన్ మధ్య శాంతి చర్చల్లో స్పష్టమైన పురోగతి కనిపించని సమయంలో ఈ ప్రకటన వెలువడింది. మరోవైపు వ్యూహాత్మకంగా కీలకమైన హార్ముజ్ జలసంధి (Strait of Hormuz) ద్వారా చమురు ట్యాంకర్ల రాకపోకలపై కూడా ఆందోళనలు కొనసాగుతున్నాయి. ఇరుదేశాల మధ్య కాల్పుల విరమణకు సంబంధించి ఇప్పటివరకు స్పష్టమైన సంకేతాలు కనిపించడం లేదని నివేదికలు పేర్కొంటున్నాయి.

అరేబియా సముద్రంలో యూఎస్ఎస్ లింకన్

మధ్యప్రాచ్యంలో ఉద్రిక్తతల నేపథ్యంలో అమెరికా సెంట్రల్ కమాండ్ అధిపతి అడ్మిరల్ బ్రాడ్ కూపర్ (Admiral Brad Cooper) అరేబియా సముద్రంలో మోహరించిన యూఎస్ఎస్ లింకన్ విమాన వాహక నౌకను సందర్శించారు. ఇరాన్‌కు సంబంధించిన అమెరికా సైనిక చర్యల్లో ఈ నౌక కీలక పాత్ర పోషిస్తున్నట్లు సమాచారం.

యూఎస్ఎస్ లింకన్ (USS Lincoln) జనవరిలో మధ్యప్రాచ్యానికి చేరుకుంది. 240 రోజులకు పైగా నిరంతరాయంగా సముద్రంలో ఉండటం ద్వారా రికార్డు సృష్టించినట్లు తెలుస్తోంది. ఈ నౌకలో సుమారు 5,000 మంది నావికులు, మెరైన్లకు వసతి కల్పించే సామర్థ్యం ఉంది.

దక్షిణ లెబనాన్‌లో ఇజ్రాయెల్ దాడులు

ఇదిలా ఉండగా, దక్షిణ లెబనాన్‌లో ఇజ్రాయెల్ (Israel) జరిపిన 2 దాడుల్లో కనీసం 11 మంది మరణించినట్లు సమాచారం. హిజ్బుల్లా సీనియర్ కమాండర్లు అబు హసన్ అలా(Abu Hassan Ala), అలీ సమీర్ అల్-హజ్ హసన్‌లను (Ali Samir Al-Haj Hassan) లక్ష్యంగా చేసుకున్నట్లు ఇజ్రాయెల్ సైన్యం తెలిపింది.

గాజా కాల్పుల విరమణపై చర్చలు

మరోవైపు గాజాలో కాల్పుల విరమణపై చర్చలు కొనసాగుతున్నాయి. హమాస్ ప్రతినిధి బృందం ఈజిప్టు రాజధాని కైరోలో చర్చలు జరుపుతున్నట్లు సమాచారం. ఇరాన్, అమెరికా ఉద్రిక్తతలు, ఇజ్రాయెల్, హిజ్బుల్లా ఘర్షణలు, గాజా కాల్పుల విరమణ చర్చలు ఒకేసారి కొనసాగుతుండటంతో మధ్యప్రాచ్య పరిస్థితులు మరింత సంక్లిష్టంగా మారుతున్నాయి.