భారతీయ చిత్రసీమలో తనదైన నటనతో ప్రత్యేక గుర్తింపు తెచ్చుకున్న సీనియర్ నటి ‘షావుకారు’ జానకి (Sowcar Janaki) (94) కన్నుమూశారు. చెన్నైలోని(Chennai) కావేరి ఆసుపత్రిలో(Kauvery Hospital) చికిత్స పొందుతూ తుదిశ్వాస విడిచారు. 7 దశాబ్దాలకు పైగా సాగిన సినీ ప్రయాణంలో బ్లాక్ అండ్ వైట్ కాలం నుంచి నేటి తరం వరకు దాదాపు 400 చిత్రాల్లో నటించి ప్రేక్షకుల అభిమానాన్ని సొంతం చేసుకున్నారు.
రాజమండ్రి నుంచి వెండితెర వరకు..
1931 డిసెంబరు 12న రాజమండ్రిలో (Rajahmundry) జన్మించిన జానకి చిన్న వయసులోనే కళలపై ఆసక్తి పెంచుకున్నారు. 11వ ఏట రేడియో కార్యక్రమాల్లో పాల్గొన్న ఆమె.. 1949లో ‘రక్షరేఖ’(Raksharekha) చిత్రంతో సినీ రంగ ప్రవేశం చేశారు.
‘షావుకారు’తో శాశ్వత గుర్తింపు..
1950లో ఎల్.వి. ప్రసాద్ (L.V. Prasad) దర్శకత్వంలో తెరకెక్కిన ‘షావుకారు’ చిత్రం ఆమె జీవితాన్ని మలుపుతిప్పింది. ఇందులో ‘సుబ్బులు’ పాత్రలో అద్భుతంగా నటించిన జానకి.. ఆ సినిమా పేరుతోనే ‘షావుకారు’ జానకిగా ప్రేక్షకుల హృదయాల్లో నిలిచిపోయారు. ఈ చిత్రమే ఎన్టీఆర్(NTR), జానకి జంటగా నటించిన తొలి సినిమా కూడా కావడం విశేషం.
5 భాషల్లో 385కు పైగా చిత్రాలు..
తెలుగు, తమిళం, కన్నడ, హిందీ, మలయాళ భాషల్లో 385కు పైగా చిత్రాల్లో నటించిన జానకి.. 200కు పైగా సినిమాల్లో కథానాయికగా మెప్పించారు. ఎన్టీఆర్, అక్కినేని నాగేశ్వరరావు, ఎంజీఆర్, శివాజీ గణేశన్, డాక్టర్ రాజ్కుమార్ వంటి అగ్ర నటులతో కలిసి పనిచేశారు.
4 మంది ముఖ్యమంత్రులతో నటించిన అరుదైన ఘనత..
ఎన్టీఆర్, ఎంజీఆర్, జయలలిత, కరుణానిధి వంటి 4 మంది ముఖ్యమంత్రులతో (Chief Ministers) కలిసి నటించిన అరుదైన ఘనత జానకి సొంతం. వివిధ తరాల అగ్ర నటులతో కలిసి పనిచేసి తనకంటూ ప్రత్యేక గుర్తింపు తెచ్చుకున్నారు.
క్యారెక్టర్ ఆర్టిస్ట్గా మరో ఇన్నింగ్స్..
1975 తర్వాత కథానాయిక పాత్రల నుంచి క్యారెక్టర్ ఆర్టిస్ట్గా మారిన జానకి ‘సంసారం ఒక చదరంగం’ చిత్రంలోని చిలకమ్మ పాత్రకు నంది అవార్డు అందుకున్నారు. ‘రోజులు మారాయి’, ‘మంచి మనసులు’, ‘డాక్టర్ చక్రవర్తి’, ‘గీతాంజలి’, ‘తాయారమ్మ బంగారమ్మ’ వంటి చిత్రాల్లో గుర్తుండిపోయే పాత్రలు పోషించారు.
పద్మశ్రీతో గౌరవం.. చివరి చిత్రం ఇదే..
2023లో వచ్చిన ‘అన్నీ మంచి శకునములే’ ఆమె చివరి చిత్రం. కళారంగానికి చేసిన సేవలకు గుర్తింపుగా అరిజోనా విశ్వవిద్యాలయం నుంచి గౌరవ డాక్టరేట్ అందుకున్న ఆమెను.. కేంద్ర ప్రభుత్వం 2022లో పద్మశ్రీతో సత్కరించింది.
దాదాపు 7 దశాబ్దాల పాటు వెండితెరపై అలరించిన షావుకారు జానకి మృతి చిత్రపరిశ్రమకు తీరని లోటుగా మారింది. ఆమె పోషించిన పాత్రలు, అందించిన కళాసేవలు ఎప్పటికీ ప్రేక్షకుల జ్ఞాపకాల్లో నిలిచిపోతాయి.
