పెళ్లి హడావుడి, కుటుంబ గొడవలు, తెలంగాణ పల్లెటూరి వాతావరణానికి బోల్డ్ కామెడీని జోడిస్తూ ప్రేక్షకుల ముందుకు వచ్చింది ‘క్రేజీ కల్యాణం’ ట్రైలర్. తరుణ్ భాస్కర్, అనుపమ పరమేశ్వరన్, అఖిల్ రాజ్ ప్రధాన పాత్రల్లో నటించిన ఈ చిత్రానికి బద్రప్ప గాజుల దర్శకత్వం వహించారు. తాజాగా విడుదలైన ట్రైలర్‌లో సహజమైన సంభాషణలు, ఊహించని మలుపులు ఆకట్టుకుంటున్నాయి.
“నాకు ఈ పెళ్లి ఇష్టం లేదు.. నేనొకరిని ప్రేమిస్తున్నా” అంటూ హీరోయిన్ చెప్పే మాటలతో కథలో ఆసక్తికరమైన మలుపు మొదలవుతుంది. ఆ వెంటనే పెళ్లి కొడుకు అడిగే బోల్డ్ ప్రశ్న ట్రైలర్‌లో ప్రత్యేక ఆకర్షణగా నిలుస్తోంది. కుటుంబ బంధాల మధ్య ఆధునిక ఆలోచనలను హాస్యంతో మేళవించిన తీరు ప్రేక్షకుల్లో ఆసక్తిని పెంచుతోంది.
ట్రైలర్ ప్రారంభంలో మందు తాగుతూ, ఉదయాన్నే బొట్లు పెట్టుకుని పూజలు చేసే పెద్దల్లుడు బాలరాజు పాత్ర కనిపిస్తుంది. “చిన్నదానికి మంచి సంబంధం తెచ్చి ఊళ్లో నా పోయిన పరువు తెచ్చుకుంటా” అనే డైలాగ్ పల్లెటూరి వాతావరణాన్ని ప్రతిబింబిస్తోంది. తరుణ్ భాస్కర్ సహజమైన నటన, తెలంగాణ యాసలోని సంభాషణలు ట్రైలర్‌కు ప్రత్యేక ఆకర్షణగా నిలుస్తున్నాయి.
విలేజ్ ఫ్యామిలీ కామెడీగా రూపొందిన ఈ సినిమా అక్టోబర్ 16న థియేటర్లలో విడుదల కానుంది. బోల్డ్ డైలాగ్స్, పెళ్లి చుట్టూ జరిగే గందరగోళంతో ట్రైలర్ సినిమాపై అంచనాలు పెంచుతోంది. మరి వెండితెరపై ఈ కామెడీ ఎంతవరకు నవ్వులు పూయిస్తుందో చూడాలి.
