ఆంధ్రప్రదేశ్‌లో సంచలనం రేపిన గాదే సాయికృష్ణ (Gade Sai Krishna) కస్టడీ మృతి (Custodial Death) కేసులో కీలక పరిణామం చోటుచేసుకుంది. ఈ కేసు దర్యాప్తును కేంద్ర దర్యాప్తు సంస్థ (సీబీఐ)కి(CBI) అప్పగిస్తూ ఆంధ్రప్రదేశ్ హైకోర్టు (Andhra Pradesh High Court) కీలక ఆదేశాలు జారీ చేసింది. అంతేకాకుండా, సాయికృష్ణ తల్లి గాదే విజయలక్ష్మికి (Gade Vijayalakshmi) నాలుగు వారాల్లోగా రూ.25 లక్షల పరిహారం చెల్లించాలని రాష్ట్ర ప్రభుత్వాన్ని ఆదేశించింది. రాష్ట్ర పోలీసుల దర్యాప్తుపై అనేక సందేహాలు వ్యక్తమవుతున్న నేపథ్యంలో హైకోర్టు తీసుకున్న ఈ నిర్ణయం ప్రాధాన్యత సంతరించుకుంది.
విజయవాడకు చెందిన 25 ఏళ్ల గాదే సాయికృష్ణను 2026 మే నెలలో పోలీసులు అదుపులోకి తీసుకున్నట్లు ఆరోపణలు ఉన్నాయి. అనంతరం అతడి ఆచూకీ తెలియకపోవడంతో కుటుంబ సభ్యులు ఆందోళన వ్యక్తం చేశారు. ఈ వ్యవహారంపై విచారణ చేపట్టిన రాష్ట్ర ప్రభుత్వం ప్రత్యేక దర్యాప్తు బృందాన్ని (సిట్‌) (SIT) ఏర్పాటు చేసింది. సిట్‌ దాఖలు చేసిన చార్జిషీట్‌ ప్రకారం, మే 12వ తేదీ రాత్రి పోలీసుల చిత్రహింసల కారణంగా సాయికృష్ణ మృతి చెందినట్లు పేర్కొన్నారు.
సాయికృష్ణ కేసులో స్వతంత్ర దర్యాప్తు కోరుతూ దాఖలైన పిటిషన్లను (Petitions) హైకోర్టు విచారించింది. రాష్ట్ర ప్రభుత్వం ఏర్పాటు చేసిన సిట్‌ దర్యాప్తు చేసినప్పటికీ, ఉన్నతస్థాయి పోలీసు అధికారుల పాత్రపై సమగ్ర విచారణ జరగలేదనే అభ్యంతరాలు వ్యక్తమయ్యాయి. టాస్క్‌ఫోర్స్‌ పనిచేసిన పరిధికి సంబంధించిన ఉన్నతాధికారుల పాత్రను పరిశీలించడంలో దర్యాప్తు బృందం విఫలమైందనే ప్రశ్నలు కూడా తెరపైకి వచ్చాయి. ముఖ్యంగా, సంబంధిత పోలీస్‌ కమిషనర్‌ పేరును సిట్‌ చార్జిషీట్‌లో ఎందుకు చేర్చలేదనే అంశం చర్చనీయాంశమైంది.
ఈ నేపథ్యంలో కేసును సీబీఐకి(CBI) బదిలీ చేయాలని హైకోర్టు ఆదేశించింది. ఇప్పటికే సేకరించిన ఆధారాలు, ఎఫ్‌ఐఆర్‌, నిందితుల వాంగ్మూలాలు, పోలీస్‌ స్టేషన్‌ రికార్డులు, సీసీటీవీ ఫుటేజీ అందుబాటులో లేకపోవడానికి గల కారణాలు, సాయికృష్ణ మృతదేహం ఆచూకీ తదితర అంశాలను సీబీఐ పరిశీలించనుంది. పోలీసుల అదుపులోకి తీసుకున్నప్పటి నుంచి అతడి మృతి వరకు చోటుచేసుకున్న పరిణామాలపై స్వతంత్రంగా దర్యాప్తు చేయనుంది.
