ఆంధ్రప్రదేశ్ (Andhra Pradesh) రాష్ట్రంలో నెలకొన్న పరిస్థితులపై ప్రతిపక్ష నాయకులు వైయస్ జగన్ (Y. S. Jagan Mohan Reddy) తన సోషల్ మీడియా కాతా ద్వారా హలో ఇండియా అంతూ స్పందించారు. ఎవరైనా బ్రతకడానికి పాలు (Milk), నీళ్లు (Water) తాగుతారు. కానీ ఆంధ్రప్రదేశ్లో మాత్రం ఆ రెండు ప్రాణాంతకంగా మారుతున్నాయనే వాస్తవం ప్రజలను కలవరపెడుతోంది. రాష్ట్రంలోని పలు ప్రాంతాల్లో కల్తీ పాలు, కలుషిత నీరు (Contaminated Water) కారణంగా ప్రజలు ప్రాణాలు కోల్పోతుండటం ఆందోళన కలిగిస్తోంది. ప్రతి కుటుంబానికి అత్యవసరమైన పాలు, నీటి పేరు వింటేనే భయం పట్టుకునే పరిస్థితి నెలకొంది.
టీడీపీ(TDP) నేతృత్వంలోని కూటమి ప్రభుత్వం, ముఖ్యమంత్రి చంద్రబాబునాయుడు (Nara Chandrababu Naidu) పాలనలో డయేరియా (Diarrhea), ఫుడ్ పాయిజన్ (Food Poisoning) ఘటనలు వరుసగా వెలుగుచూస్తున్నాయి. రాష్ట్ర ప్రజారోగ్య వ్యవస్థ కుప్పకూలిన దుస్థితిని ఈ సంఘటనలు స్పష్టంగా ప్రతిబింబిస్తున్నాయి. పరిపాలనపై పట్టు కోల్పోయిన ప్రభుత్వం ప్రతిపక్షాలపై ఆరోపణలు చేయడం, అసత్య ప్రచారాలకు పాల్పడడం వంటి చర్యలకే పరిమితమైందనే విమర్శలు వినిపిస్తున్నాయి. ప్రజారోగ్యం, భద్రత వంటి ప్రాథమిక అంశాలు పక్కనపడుతున్నాయనే ఆందోళన వ్యక్తమవుతోంది.
కురుపాం గిరిజన సంక్షేమ బాలికల పాఠశాలలో (Tribal Welfare Girls School) 16 మంది విద్యార్థినులు డయేరియాతో అస్వస్థతకు గురికాగా, ఐదుగురిని ఆస్పత్రికి తరలించాల్సి వచ్చింది. ఇదే పాఠశాలలో గతంలో కలుషిత నీటి కారణంగా పచ్చకామెర్లతో ఇద్దరు విద్యార్థినులు మృతి చెందగా, దాదాపు 100 మంది ఆస్పత్రి పాలయ్యారు. ఇంతటి ఘటనలు జరిగినప్పటికీ సమస్యకు శాశ్వత పరిష్కారం దిశగా చర్యలు చేపట్టలేదనే విమర్శలు వెల్లువెత్తుతున్నాయి.
గత 14 నెలల్లో రాష్ట్రవ్యాప్తంగా హాస్టళ్లు, విద్యాసంస్థల్లో ఫుడ్ పాయిజన్, కలుషిత నీరు, అపరిశుభ్రత కారణంగా దాదాపు 25 ఘటనలు చోటుచేసుకున్నాయి. 15 జిల్లాల్లో 900 మందికి పైగా విద్యార్థులు అస్వస్థతకు గురయ్యారు. జాతీయ మీడియా కూడా ఈ దారుణ పరిస్థితులను ప్రముఖంగా ప్రస్తావించింది. పరిశుభ్రత కొరవడి ఉండటం, నీటి నాణ్యత పర్యవేక్షణలో లోపాలు, ఆహార భద్రత ప్రమాణాల అమలులో నిర్లక్ష్యం వంటి అంశాలు ప్రధాన కారణాలుగా నిలుస్తున్నాయి.
గత వారం శ్రీకాకుళంలో (Srikakulam) కలుషిత నీటి కారణంగా తీవ్రమైన డయేరియా వ్యాప్తి చెంది ఐదుగురు ప్రాణాలు కోల్పోయారు. దాదాపు 200 మంది ఆస్పత్రుల పాలయ్యారు. అదే వారం రాజమహేంద్రవరం నగరంలో కల్తీ పాల కారణంగా ఏడుగురు మరణించగా, మరికొందరు ప్రాణాపాయ స్థితిలో చికిత్స పొందుతున్నారు. పోషణ అందించాల్సిన పాలు మరణానికి కారణమవడం ఆహార భద్రత వ్యవస్థలో తీవ్రమైన లోపాలను బయటపెడుతోంది.
ఇప్పటికైనా ప్రభుత్వం సమగ్ర సమీక్ష చేపట్టి లోపాలను గుర్తించి సరిదిద్దాల్సిన అవసరం ఉంది. సురక్షిత నీటి సరఫరా వ్యవస్థను బలోపేతం చేయడం, ఆహార భద్రత పర్యవేక్షణను కఠినతరం చేయడం, హాస్టళ్లలో పరిశుభ్రత ప్రమాణాలను ఖచ్చితంగా అమలు చేయడం అత్యవసరం. ప్రజలు అద్భుతాలు కోరుకోవడం లేదు; మరిన్ని ప్రాణాలు కోల్పోకముందే బాధ్యతాయుత చర్యలు తీసుకోవాలని మాత్రమే కోరుకుంటున్న అంటూ జగన్ స్పందించారు.
