అమరావతి రాజధానిలో(Amaravati Capital) నిర్మాణంలో ఉన్న హెచ్ఓడీ టవర్లకు (HOD Towers) సంబంధించిన వ్యయం ఇప్పుడు పెద్ద చర్చనీయాంశంగా మారుతోంది. ఈ టవర్లలో సదుపాయాల కల్పన కోసం రూ.2,316.88 కోట్లకు పరిపాలనా అనుమతులు మంజూరయ్యాయి. పట్టణాభివృద్ధి శాఖ ముఖ్యకార్యదర్శి సురేష్కుమార్ (Suresh Kumar) మంగళవారం ఉత్తర్వులు జారీ చేస్తూ, ఎలక్ట్రికల్, ఎసి, ఫైర్ ప్రొటెక్షన్, లిఫ్టులు, అలారం వ్యవస్థలు, పబ్లిక్ అడ్రస్ సిస్టమ్, ప్లంబింగ్ వంటి కీలక పనులను చేపట్టాలని ఆదేశించారు. 59వ అథారిటీ సమావేశంలో తీసుకున్న తీర్మానం మేరకు ఈ నిర్ణయం తీసుకున్నట్లు వెల్లడించారు.
డిజైన్ బిల్డ్ పద్ధతిలో (Design-Build Method) కాంట్రాక్టులు ఇవ్వాలని నిర్ణయించగా, అవసరమైన చర్యలు తీసుకునే అధికారాలను అమరావతి గ్రోత్ అండ్ ఇన్ఫ్రాస్ట్రక్చర్ కార్పొరేషన్ లిమిటెడ్ (ఏజీఐసిఎల్) (AGICL) ఎమ్డికి అప్పగించారు. నాలుగు హెచ్ఓడీ టవర్లు (బేస్మెంట్ + గ్రౌండ్ + 39 అంతస్తులు) ఆధునిక స్టీల్ డైగ్రిడ్ టెక్నాలజీతో నిర్మించబడుతున్నాయి. టవర్లు 1 & 2లో 28,41,675 చదరపు అడుగులు, టవర్లు 3 & 4లో 23,42,956 చదరపు అడుగుల విస్తీర్ణం కలిగి ఉంటాయి. ఈ ప్రాజెక్ట్ను 2028 అక్టోబర్ నాటికి పూర్తి చేయాలని లక్ష్యంగా పెట్టుకున్నారు.
అయితే, ఈ భారీ ఖర్చు నేపథ్యంలో విమర్శలు వెల్లువెత్తుతున్నాయి. భారతదేశ కొత్త పార్లమెంట్ భవనం (India’s New Parliament Building) నిర్మాణానికి సుమారు రూ.971 కోట్ల ప్రారంభ అంచనా ఉండగా, పెరిగిన వ్యయంతో అది రూ.1,250 కోట్లకు చేరింది. దాదాపు 6.5 లక్షల చదరపు అడుగుల విస్తీర్ణంతో నిర్మితమైన ఆ పూర్తి భవనంతో పోలిస్తే, అమరావతి హెచ్ఓడీ టవర్ల వ్యయం మరింత ఎక్కువగా ఉండటం ప్రశ్నలను రేకెత్తిస్తోంది. ప్రభుత్వ ఖర్చుల ప్రాధాన్యతలపై ఇప్పుడు ప్రజల్లో చర్చ మరింత వేడెక్కుతోంది.
