జనసేన కార్యకర్త అనుదీప్ మృతి చుట్టూ అనుమానాలు ముసురుకుంటున్న వేళ, న్యాయం చేయాలంటూ గొంతెత్తిన వారిపైనే క్రమశిక్షణ చర్యలు తీసుకోవడం రాజకీయంగా చర్చనీయాంశమైంది. పవన్ కళ్యాణ్ నాయకత్వంలోని జనసేన పార్టీ తీసుకున్న ఈ నిర్ణయం కార్యకర్తల్లో అసంతృప్తిని రగిలిస్తోంది.
చట్రాయిలో జరిగిన అనుదీప్ మృతిని హత్యగా పేర్కొంటూ నిజానిజాలు బయటకు తేవాలని డిమాండ్ చేసిన నూజివీడు నియోజకవర్గ గౌడ సంఘం నేత మరీదు శివరామకృష్ణ, అలాగే సోషల్ మీడియా కార్యకర్త మమ్మలనేని సునీల్ కుమార్పై పార్టీ వేటు వేయడం సంచలనంగా మారింది. బాధిత కుటుంబంతో కలిసి ప్రభుత్వాన్ని ప్రశ్నించిన వారినే పార్టీ దూరం పెట్టడం పట్ల తీవ్ర విమర్శలు వ్యక్తమవుతున్నాయి.
ఈ ఘటనలో మంత్రి కొలుసు పార్ధసారధి వ్యాఖ్యలను బహిరంగంగా ఖండించిన మరీదు శివరామకృష్ణ, పార్టీ ధర్మాన్ని ఉల్లంఘించారని పేర్కొంటూ చర్యలు తీసుకున్నట్టు జనసేన కేంద్ర కార్యాలయం ప్రకటించింది. ఇకపై వారి కార్యక్రమాలకు పార్టీకి ఎటువంటి సంబంధం లేదని స్పష్టం చేసింది.
అయితే, ఒక కార్యకర్త మృతి విషయంలో న్యాయం కోరిన వారిపైనే చర్యలు తీసుకోవడం పార్టీ అంతర్గత ప్రజాస్వామ్యంపై ప్రశ్నలు లేవనెత్తుతోంది. కూటమి రాజకీయాల్లో జనసేనకు తగిన ప్రాధాన్యం దక్కుతోందా లేదా అనే సందేహాలు కార్యకర్తల్లో పెరుగుతున్నాయి.
పార్టీ నిర్ణయాలపై ఇప్పటికే అసంతృప్తి వ్యక్తం చేస్తున్న పలువురు కార్యకర్తలు, ఇలాంటి చర్యలు కొనసాగితే జనసేన భవిష్యత్తు ప్రశ్నార్థకంగా మారుతుందని ఆందోళన వ్యక్తం చేస్తున్నారు. పవన్ కళ్యాణ్ నేతృత్వం తీసుకుంటున్న నిర్ణయాలు పార్టీ బలపరుస్తాయా లేక మరింత విభేదాలకు దారితీస్తాయా అన్నది ఇప్పుడు కీలక ప్రశ్నగా మారింది.
