అమరావతి కాంట్రాక్టులపై ముదురుతున్న వివాదం?

అమరావతి రాజధాని నిర్మాణం చుట్టూ మరోసారి తీవ్రమైన వివాదం చెలరేగుతోంది. వైఎస్సార్‌సీపీ అధినేత జగన్ చేసిన ఆరోపణలు ఈ ప్రాజెక్ట్‌పై కొత్త అనుమానాలను రేకెత్తిస్తున్నాయి. ఆయన ప్రకారం, అమరావతి ప్రజల రాజధాని కాదని, భారీ కుంభకోణాల కేంద్రంగా మారిందని విమర్శించారు.

2018లో ప్రారంభమైన టెండర్ ప్రక్రియలో అప్పటి అంచనాల కంటే భారీగా వ్యయాలు పెరగడం, అదే కంపెనీలకు మళ్లీ కాంట్రాక్టులు దక్కడం అనుమానాలకు దారితీస్తోంది. ముఖ్యంగా ఎల్ అండ్ టీ, షాపూర్జీ పల్లోంజీ వంటి సంస్థలు తిరిగి టెండర్లను దక్కించుకోవడం రాజకీయంగా చర్చనీయాంశమైంది.

ఈ కంపెనీలు దాదాపు ఒకే విధమైన ‘ఎక్సెస్’ శాతం (సుమారు 4.5%)తో బిడ్లు వేయడం వెనుక టెండర్ రిగ్గింగ్ జరిగిందనే ఆరోపణలు వినిపిస్తున్నాయి. ఈ ప్రక్రియ వల్ల ప్రభుత్వ ఖజానాపై సుమారు రూ.158 కోట్ల అదనపు భారం పడిందని అంచనాలు చెబుతున్నాయి.

ఇక నిర్మాణ వ్యయాలు కూడా అనూహ్యంగా పెరిగాయి. ఉదాహరణకు, 2018లో రూ.932 కోట్లుగా ఉన్న టవర్-1 ప్రాజెక్ట్ విలువ ప్రస్తుతం అన్ని మినహాయింపులతో కలిపి రూ.1762 కోట్లకు చేరింది. టవర్-2 కూడా రూ.762 కోట్ల నుండి రూ.1545 కోట్లకు పెరిగింది. జీఏడీ టవర్ ఖర్చు కూడా రూ.554 కోట్ల నుండి రూ.1046 కోట్లకు పెరిగింది. చదరపు అడుగుకు రూ.11,000 నుండి రూ.14,000 వరకు చూపిస్తున్న వ్యయం, ఇతర మెట్రో నగరాలతో పోలిస్తే చాలా అధికంగా ఉందనే విమర్శలు వస్తున్నాయి.

గతంలో ఈ ప్రాజెక్టులకు సంబంధించి ఆదాయపు పన్ను శాఖ విచారణలు కూడా జరిగాయి. కొన్ని కంపెనీల ద్వారా బోగస్ సబ్-కాంట్రాక్టులు సృష్టించి నిధులు మళ్లించారనే ఆరోపణలు వెలువడ్డాయి. ఈ కేసుల్లో అప్పటి ముఖ్యమంత్రి చంద్రబాబు కు సంబంధించిన ఆరోపణలు కూడా వెలుగులోకి వచ్చాయి. పనులు చేయకుండానే షాపూర్జీ పల్లోంజీ మరియు ఎల్ అండ్ టీ వంటి సంస్థల నుండి నిధులు మళ్లించి, చంద్రబాబు నాయుడు పీఏ శ్రీనివాస్ ద్వారా నగదు రూపంలో చేరవేశారని పరదసాని వాంగ్మూలం ఇచ్చినట్లు వార్తలు వచ్చాయి.

ఇప్పుడు మళ్లీ అదే సంస్థలకు అధిక ధరలకు కాంట్రాక్టులు ఇవ్వడం వల్ల పారదర్శకతపై ప్రశ్నలు తలెత్తుతున్నాయి. భారీ మినహాయింపులు (భూమి, ఇసుక, జీఎస్టీ, కరెంట్) ఉన్నప్పటికీ నిర్మాణ ఖర్చులు పెరగడం వెనుక అసలు కారణం ఏమిటన్నది కీలక ప్రశ్నగా మారింది.

అమరావతి నిర్మాణంపై ప్రభుత్వం ఒకవైపు అభివృద్ధి అంటూ ముందుకు సాగుతుండగా, మరోవైపు ఈ కాంట్రాక్టులపై అవినీతి ఆరోపణలు ప్రజల్లో అనుమానాలను పెంచుతున్నాయి. ఈ వివాదం భవిష్యత్తులో రాజకీయంగా మరింత వేడెక్కే అవకాశాలు కనిపిస్తున్నాయి.