విశాఖపట్నం జిల్లా ఆనందపురం మండలం తర్లువాడ గ్రామంలో గూగుల్ డేటా సెంటర్ పనులు ప్రారంభించేందుకు అధికారులు సిద్ధమవుతున్న సమయంలో, నిర్వాసిత రైతులు తీవ్ర అభ్యంతరం వ్యక్తం చేశారు. ప్రభుత్వం ఇచ్చిన హామీలు అమలు చేయకుండానే పనులు చేపట్టడం అన్యాయమని వారు స్పష్టం చేశారు. బంజరు భూముల పథకం కింద సుమారు 580 మందికి ఇచ్చిన భూముల్లో జీడి, మామిడి తోటలు సాగు చేస్తూ జీవనోపాధి పొందుతున్నామని రైతులు తెలిపారు. అయితే, ఆ భూములను డేటా సెంటర్ కోసం స్వాధీనం చేసుకుంటూ ఇప్పటివరకు సరైన నష్టపరిహారం చెల్లించకపోవడంపై వారు ఆవేదన వ్యక్తం చేశారు.
ప్రతి రైతుకూ ఇళ్ల స్థలం, పూర్తి పరిహారం వంటి హామీలు ఇచ్చినా అవి అమలు కాలేదని రైతులు ఆరోపించారు. హామీలు నెరవేర్చిన తరువాతే పనులు కొనసాగించాలని వారు డిమాండ్ చేస్తూ శంకుస్థాపన పనులను అడ్డుకున్నారు. పరిస్థితి ఉద్రిక్తంగా మారడంతో అధికారులు, పోలీసులు అక్కడికి చేరుకుని రైతులతో చర్చలు జరిపారు. సమస్యలను ఉన్నతాధికారుల దృష్టికి తీసుకెళ్తామని హామీ ఇవ్వడంతో పాటు పనులను తాత్కాలికంగా నిలిపివేయడంతో రైతులు ఆందోళన విరమించారు.
ఈ నేపథ్యంలో ప్రభుత్వం ఈ నెల 28న గూగుల్ డేటా సెంటర్కు శంకుస్థాపన చేయాలని యోచిస్తోంది. విశాఖపట్నం, అనకాపల్లి జిల్లాల్లో మూడు ప్రాంతాలను ఎంపిక చేయగా, తర్లువాడలోనే తొలి దశ పనులు చేపట్టేందుకు సిద్ధమవుతున్నారు. అయితే రైతుల భూములపై పరిహారం, ఉపాధి హామీల అమలు వంటి అంశాలు ఇంకా పరిష్కారం కావాల్సి ఉంది.
ప్రారంభంలో రైతులు భూములివ్వడానికి నిరాకరించినప్పటికీ, ప్రభుత్వం ఎకరానికి రూ.50 లక్షల పరిహారం, ఇంటికి ఒకరికి ఉద్యోగం, అదనంగా ఇళ్ల స్థలం వంటి పలు హామీలు ఇవ్వడంతో పరిస్థితి కొంతమేర సర్దుబాటైంది. అయినప్పటికీ, ఆ హామీలు పూర్తిగా అమలు కావాల్సిన అవసరం ఉందని రైతులు స్పష్టం చేస్తున్నారు. ఈ పరిణామాలు గూగుల్ డేటా సెంటర్ నిర్మాణంపై మరింత ఆసక్తిని, అలాగే అనిశ్చితిని కలిగిస్తున్నాయి.
